2 Thatihzy Rona 23

¹ A kô sari kô liana chata Zehôiada cha a tha a patlô ta, pheisaih za kha hyutuhpa Zehôra sawchapawpa Azariah zy, Zehôhana sawchapawpa Maasei zy, Zikri sawchapawpa Elisapha zy hnohta bie hraih ta."

² Zudah râh chahryh ei ta, Zudah râh khi to liata Livai mozy nata Izarel zy chhôhkha pawhrâhpa zy pakhy ei ta, Zerusale tlô ei ta.

³ Chatawhcha ahmaohpakhypa zydua chata Khazohpa o liata ABEIPA lâta bie hraih ei ta. Zehôiada ta ama hnohta, “ABEIPA ta Davi sawchapawpa zy kyh a vaw reipa hawhta, abei sawchapawpa cha abei awpa a châ.

⁴ Nama tao awpa cha he hawhpa he a châ: theihthaipa zy nata Livai mo pahânoh ta a vy tyhpa zy cha su thôh pachhaih ta su kha ochhivaihtuhpa zy cha aw eichi ta,

⁵ su thôh pachhaih ta su kha cha kuh chhikao liata; zawpi zydua cha ABEIPA o dôhpachhôh liata ama y aw.

⁶ Theihthaipa zy nata chakaotuhpa Livai sahlao zy dei leipa ta cha ahyhmah ABEIPA o liata a ngia khah se; arao cha ama pathaipa vâta a ngia aw ei ta, zawpi zydua deikua cha ABEIPA hâpa ta ama y awpa a châ.

⁷ Livai mozy ta ama chaihraih chabapa ta beipa cha pado aw ei ta; ahyrai o liata a vaw ngiapa cha thie awpa châ ta. Abei cha a puapa nata a ngiana maihta ano hnohta y lymâ teh u,” tah ta.

⁸ Livai mo nata Zudah zydua chata theihthaipa Zehôida biepiepa zydua hawhna chata tao ei ta. Ama hyutuhpa zy chyu pahânoh ta a vy awpazy nata pahânoh ta a pai awpa zy cha chhihtha ei ta; theihthaipa Zehôida chata a pai awpa sahlao cha papaisa tlôh lei khâh ta.

⁹ Chatawhcha theihthaipa Zehôida chata pheisaih za kha hyutuhpa zy cha ABEIPA o liata a ypa Abei Davi asei nata vyhphao chyhpa nata vyhphao laipa zy pie ta;

¹⁰ chyhsa zy cha chaihrai chaba chyupa ta o chachâh lâchhâh tawhta chavei lâchhâh taihta maisâh nata o padôpa ta abei padosa ta.

¹¹ Chatanachata abeipa sawchapawpa cha a vaw chhi ei ta, abei lakho pakho ei ta, bie pahnosana cha pie ei ta; abei ta tao ei ta, Zehôida nata a sawchapawpa zy chata sathaw thu ei ta, “Khazohpa ta abei cha hrôbieh mawh sy,” tah ei ta.

¹² Athaliah ta zawpi abeipa palyupalihpa ta amâ chavia silipa pyu cha a thei nahta ABEIPA o lâta zawpi hry lâna chata vawh ta;

¹³ moh ta. chhikao liata otôh thaby liana cha abeipa cha aduah ta, a kiapâh liata pheisaih hyutuhpa zy nata chiahmie a tôtuhpa zy chhaota, cha râh liata chyhsa zydua cha thapha ngaitapa ta y ei ta, chiahmie zy thata tô ei ta, hla satuhpa zy chata ama hmo paro theipa zy tôpa ta reithaina hla sa ei ta. Athaliah chata a pohzy hriepa ta, “Sathisahlaina! Sathisahlaina!” tah ta.

¹⁴ Chatawhcha theihthaipa Zehôida chata pheisaih zy chô liata hyutuhpa ta raopa pheisaih za kha hyutuhpa zy cha a chhi ta ama hnohta, “Pheisaih sahlao likaw ta Athaliah cha papuasa ula; ahyrai a zipa maih cha zaozi ta chhawh saopa châ mawh sy,” tah ta. Theithaipa chata, “ABEIPA o liata la thie awpa châ vei,” tah haw tlôh ta.

¹⁵ Chatanachata lâpi tlei ei ta; arâ angiana chhikao lâta abeipa o lâta sie ta, cha liana chata ama thie.

¹⁶ Zehôida chata ano nata zawpi zydua nata abeipa likawh liana chata ABEIPA chyhsa zy cha awpa ta bie hraih haw ta.

¹⁷ Chatawhcha zawpi zydua cha Baal o lâta vawh ei ta, parao ei ta; a maisâh zy, khazoh nohthlahpa zy, padi sao khai ei ta, Baal theihthaipa Matana cha maisâh thaby liata thie ei ta.

¹⁸ Chatawhcha Zehôida chata Mawsi ryhpa châbu liata a ropa hawhta thapha ngaitapa nata hlâna hla awpa ta Davi biepiepa hawhta ABEIPA achhyna-o a vaihtuh awpa zy cha rao ta.

¹⁹ Pathaih leipa maih cha amâ ngia lei nawpa ta ABEIPA o ochhi vaihtuhpa zy rao ta.

²⁰ Chatawhcha za kha chô liata hyutuhpa zy, chyhsa phapa zy, zawpi a vaotuhpa zy, cha râh liatahpa zydua cha a chhi ta; ABEIPA o liata abei o lâta sie ei ta. Abeipa cha ama khihnarâh abeidyuchhai liana chata patyusa ei ta.

²¹ Chatanachata cha râh liata chyhsa zydua cha thapha ngaitapa ta y ei ta; khih cha thlahlôhpa ta y ta; Athaliah cha zaozi ta thie ei ta.