Zakaria 1

¹ Daria a beina kô nona, thla chariena liana chata Idô sawchapawpa, Berekiah sawchapawpa hrohsopa Zekaria hnohna chata ABEIPA bie vaw tlô ta,

² “ABEIPA cha nama pawzy chô liana khata a palôh a châ lei ngaitapa a châ.

³ Chavâta he tana he ama hnohta reih teh: Pheisaihzy ABEIPA chata he tana he a tah. Kei lâ a vaw heih ula, Pheisaihzy ABEIPA ta a tah, kei chhao nâmo lâ ei vaw heih aw, Pheisaihzy ABEIPA ta a tah.

⁴ Hrohso hmiatuapazy ta, ‘Pheisaihzy ABEIPA chata nama yzie moleipa kha atahmâ a heisai ula, nama hmoparaopa cha a vaw heisai teh u,’ a tah,” tahpa ta. Nama pawzy ama chhopa chhaota nahthlie leipa ei ta, nah pachôh leipa ta ama ypa hawhna kha y khah u, ABEIPA ta a tah.

⁵ Nama pawzy cha khataihta e ama y? Hrohsopazy chhao chhâzaw ta ama hroh ma?

⁶ Ei bie nata ei bieraopazy, ei chakaotuhpa hrohsopazy hnohta ei pie nona khata, nama pawzy cha tlâ a ôpa kha châ vei ma? Chatanacha kua ei ta, Pheisaihzy ABEIPA chata eima chô liata tao a chhuah tyhpa hawhta eima yzie lymâ hawhta nata eima hmotaozie hawhta keimo liata a tao haw, ama tahpa kha,” tahpa ta.

⁷ Daria kô nona, thla hrawhleikhana, cha cha Shebat thla châ ta, noh syno nata noh palihna liana chata Idô sawchapawpa Berakiah sawchapawpa hrohsopa Zekaria hnohna chata ABEIPA bie vaw tlô ta;

⁸ “Zâ ta arâ saihpa chôta chyhsa pakha a kiahpa hmô na ta! Saikao liata myrtle tho hry liata a duah ta; a hnôh lâna chata arâ a saihpazy, a peipa zy, a râhpa zy y ei ta.

⁹ Cha liana chata kei chata, ‘Hy ei beipa, hezy he khâpa maw?’ tahna ta. Vâlyuhchâpa na chhotuhpa chata ei hnohta, ‘’Hezy he khâpama a châ, keima ta ei cha pamosa aw,” tah ta.

¹⁰ Chatawhcha chyhsa, myrtle tho hryta aduahpa khata achhy ta, ‘Hezy he ABEIPA ta aleilô zydua chahryh khai awpa ta a tuapazy cha ama châ hih,’ tah ta.

¹¹ Chatawhcha âmo chata ABEIPA vâlyuhchâpa myrtle kô hryta a duahpa cha a chhy ei ta, Alei zydua chahryh khai ha pi ta, alei cha y molo thlâh ha ta, a y thlâhthli,’ tah ei ta.

¹² Cha liana cha ABEIPA vâlyuhchâpa chata a chhy ta, ‘Hy Pheisaihzy ABEIPA y, Zerusale nata Zudah khihpi chôta he kô sysari na pathi-iana he khachâ e ngiachhie leipa ta na y aw tly?’ tah ta,

¹³ ABEIPA chata vâlyuhchâpa bie pha ngaitapa, bie thlahlôh chhih ngaitapa ta nâ chhytuhpa cha a chhy ta.

¹⁴ Chatanachata vâlyuhchâpa bie na chhotuhpa chata ei hnohta, ‘He tana he va aw teh, Pheisaihzy ABEIPA chata he tana he a tah: Zerusale nata Zaio he pachâ hmeihseihta ta pachâ na ta.

¹⁵ Chatawhcha pho, phasapa ta a ypazy liana chata ei palôh cha lei ngaita ta; ei palôh châ leipa dei a châ tarawpa ta, âmo chata hmopha leipa cha ama tao rili.

¹⁶ Chavâta ABEIPA chata he tana he a tah, zawngiahna chhaota Zerusale lâ a heih hai na ta, cha liana cha ei o cha sapa a châ aw.

¹⁷ He tana he Pheisaihzy ABEIPA ta a tah: Ei khihpizy cha thlaochhina vâta pawh heih aw ei ta, ABEIPA chata Zaio cha thlahpalôh heih aw ta. Zerusale cha a tly hei aw,’ tahpa ta va aw heih teh,” tah ta.

¹⁸ Chatawhcha mohmia kaw pasaih na ta, moh na ta, ki miapalih hmô na ta!

¹⁹ Vâlyuhchâpa bie na chhotuhpa hnohna chata, “Hezy he khâpama ama châ?” tah na ta, Ano chata, “Hezy he Zudah zy, Izarel zy, Zerusale zy apapaituhpa ki ama châ hih.” tahpa ta nâ chhy ta.

²⁰ ABEIPA chata syudaihpa papalih na pamosa ta.

²¹ Chatanachata kei chata, “Hezy he khâpa a vaw tah awpa ma ama châ?” tah na ta. Ano chata, “Haozy hao ahy hmah ta mohmia pasaih khao leina taihta Zuzy apapaituhpa ki cha châ ei ta; châhrasala hezy he, âmo palôh padua awpa nata Zudah râh papai awpa ta a vypa ama châ hih,” tahpa ta reih ta.