Hlazy 35

¹ Hy ABEIPA, nâ eituhpazy cha ei la; nâ dyuhtuhpazy cha a dyuh mah y!

² Vyhphao nata pakhâna patu la, na bao awpa ta thyu teh!

³ A sei chhao phia la, nâ chadaituhpa pakhâ mah y! Ei hrona hnohna cha,” Kei he na pachhana ei châ,” tah mah y.

⁴ Ei hrona pahlei a chhuahpa ta a tluatuhpa zy cha pamaophyupa ta nopazapa ta y ei se! Na parao awpa ta a pachâtuhpa zy cha parâpaisapa ta patypamâpa ta y ei se!

⁵ ABEIPA vâlyuhchâpa ta to lymâna chôta saviah thlih ta a phaohpa hawhta y ei se!

⁶ ABEIPA vâlyuhchâpa ta a chadai lymâpa ta, ama lâpi cha zohkaluhpa nata pahnia ngaitapa châ mawh sy!

⁷ A chhâpa y leipa ta ama sao cha na chôhkhâh ei ta; a chhâpa y leipa ta ei hrona he khaotlô ama chao khâh.

⁸ Amâ pachyh hlâta ama chôta paraona tlô mawh sy! Ama sao chôpa liana cha âmosasyh ta a ao ei se; cha liana cha tla sao ei se!

⁹ Chatawhcha ei thlahpa cha ABEIPA liata thapha aw ta, a pachhana liana chata aly aw.

¹⁰ Ei rupa zydua chata, “Hy ABEIPA, sipasapa a khoh thei rimâ leipa tawhtapa a pachhatuhpa, sipasapa nata dyhchhiepa a parao khohtuhpa tawhtapa a pachhatuhpa nâ hawhpa he ahy e a y?” a tah aw.

¹¹ Pahnokheituhpa sia leipa zy thyu ei ta; hmo ei pahno beih leipa zy eina hiahri ei.

¹² Hmo phapa vyuhpa ta moleina ta viari na thô ei ta; ei hrona pahleina taih tlaita.

¹³ Keima deikua chata ama tlâh lei nona cha latho poh a bu na ta. nie leipa ta keimasasyh ta rie ei pathei. Ei thlahchhâna cha keima lâ tlaita vaw kua heih ta,

¹⁴ ei viasa tlyma, unawhpa tlyma rai châ sala ama chô liata ei yzie awpa hawhta na ei y; chyhsa a no a chakheituhpa hawhta mâchhiesapa ta a bôh na ta.

¹⁵ Ei chapia nona chata thaphapa ta apakhy ei ta, keima nâ dyuh awpa ei ta, a pahmaohpakhy ei ta; cha cha pahno leipa na ta, bâh leipa ta na taochhie ei ta;

¹⁶ thata pahneiparâsaopa ta na taola ei ta, ama hâhzy cha eina charieh chie ei.

¹⁷ Hy ABEIPA, nâ ta khachâ e na moh aw ei? Ei hrona he parao amâ chhuahna tawhta na pachha la. ei hrona he chakeibarôhneipa zy tawhta na pachha mah y!

¹⁸ Apakhyna rôhnahpa liana chata alyna bie ei cha hlâ aw; chyhsa hluhpi hryta ei cha reithai aw.

¹⁹ Ei khakhaipa ei chôta moleina kyh ta a taotuhpa zy cha ei chôta ama thaphapa pasaih leipa la, hrao leipa ta nâ haotuhpa zy cha ama mo ta ama chho awpa pasaih kha y.

²⁰ Adyhna bie rai reih tlôh leipa ei ta, he râh liata a y molo thlâh hapa zy dôveina bie tlao ama pachâ tyh.

²¹ Ama pakah ta thata na reipachhie ei ta;” Khaw, khaw, eima mo ta a hmô haw,” ama tah tyh.

²² Hy ABEIPA, na hmô haw; a chalihsa kha y! Hy ABEIPA, rie nâ hla kha y!

²³ Ei Khazohpa nata ei Beipa, na pachia awpa ta, ei bie na châkhei awpa ta thyu la, a hra teh!

²⁴ Hy ABEIPA, ei Khazohpa, na siana kyh hawhta na pachia la; ei chô liana chata aly kha ei se!

²⁵ Âmo chata, “Khaw, cha hawhpa cha na eima khoh!” tah kha ei se. Âmo chata, “Eima palâ khai haw,” tah hra kha ei se.

²⁶ Ei vâchhiena kyh liata alypa zydua cha maophyuhpa ta nata nôpopa ta y ei se! Ei chô liata apalaipa zy cha maophyuna nata nozana pabusapa ta y ei se!

²⁷ Ei siana kyh liata aly khohpa zy cha thapha nata alypa ta awh ei se,” A chakaotuhpa vâhneina liata aly tyhpa, ABEIPA Rôhnahpa cha reithai viata y mawh sy,” tah ei se.

²⁸ Chatawhcha ei paleih heta na siana bie reih aw ta, na reithaina chhao noh noh y ta ei palyupalih aw.