Luka 23

¹ Chatawhcha ahmaopakhypa zydua cha thyu ei ta, Zisu cha Pila lâta a chhi ei ta.

² “He chyhsa heta eima chizy paraoparâ ta, Kaisara hnohta chhiechei pakhâ ta, Mesia abeipa a tahpa eima thei,” tahpa ta leih ei ta.

³ Pila ta a hnohta, “Zuzy beipa na châ ma?” tahpa ta hiahri ta. Ano chata a hnohta, “Ei châpa ta na reih,” tah ta a chhy ta.

⁴ Pila ta theihthaipa abeizy nata zawpizy hnohna chata, “He chyhsa chô liana heta khâpahmah moleina hmô va na,” tah ta.

⁵ Châhrasala âmo chata, “Kalili râh liata pathao ta, he su taihna heta Zudah râh khi to liata pachupa ta chyhsa zydua a patypahrei tyh,” tahpa ta tei rili ei ta.

⁶ Pila ta cha cha a thei nahta, cha chyhsa cha Kalili râh mo a châ nahta châ lei hiahri ta.

⁷ Chatanachata Herawda a vaopa liatahpa a châ tahpa a pahnopa ta nahta, Herawda lâta tuah ha ta, cha nona chata ano chhao cha Zerusale khih liata y hra ta.

⁸ Herawda ta Zisu a hmô nahta aly ngaita ta, a thâtih a theipa vâta, cha hlâ tawh raita hmô khoh kaw ta, a hmonoâhpa taopa kheihawhpa chhâ hmô awpa a hnabeisei ta.

⁹ Chatawhcha bie hluhpi hiahri ta; châhrasala a kheihawhpa hmah a chhy tlôh va.

¹⁰ Theihthaipa abeizy nata Ryhpa pachutuhpazy chata a duahpa ta thata leih ei ta.

¹¹ Herawda nata a pheisaihzy chata Zisu mohnao ei ta, pahneisaisona châta hmâh ei ta; poh rônah ngaitapa pabusapa ta, Pila lâta tuah ha heih ta.

¹² Cha nona tlai chata Herawda nata Pila cha a chho thai kaw ei ta, cha hlâ zydua cha adyh leipa ei ta.

¹³ Pila ta theihthaipa abeizy, hyutuhpazy, chyhsa zydua aw pakhy ta,

¹⁴ ama hnohta, “Chyhsazy a paraoparâ tahpa ta, he chyhsa he kei lâta namâ vaw chhipa kha châ ta; nama hmiakô liata padai na ta, nama leih-na kyh liana khata, he chyhsa chô liana heta khâpahmah a moleina hmô va na;

¹⁵ Herawda chhaota hmô hra vei, keimo lâta a vaw tuah heih hih. Hmeiseihpa ta la, thina tlâh taihta khâpahmah tao vei;

¹⁶ chatanachata chhei aw na ta, ei pathlie aw,” tah ta.

¹⁷ Zawpakhô kyhchhi maihta Pila ta atâhpa pakha a papuapa tyh ei.

¹⁸ Châhrasala â raoh ngaitapa ta awh ei ta. “He chyhsa he pahleipadia la, Baraba tlao maniah papuapa teh,” tah ei ta.

¹⁹ Cha chyhsa cha khihpi liata atyna kheihawhpa vâ nata liany a cheihpa vâta atâhna o liata patâhpa a châ.

²⁰ Pila deikua chata Zisu papua khoh ta, ama hnohta bie reih heih ta;

²¹ châhrasala awh ei ta, ‘Kraws liata khaipâ teh, kraws liata khaipâ teh!” tah ei ta.

²² Ano chata a ei thôhna ta ama hnohta, “Khazia maw, he chyhsa heta khâpa ma a parao? Thina tlâh taihta a chô liata khâpahmah hmô va na; chatanachata chhei aw na ta, ei pathlie aw,” tah ta.

²³ Âmo deikua chata ao paro ngaitapa ta, kraws liata khaipâ awpa ta a haw ei ta. Chatawhcha ama ao chata pahnie ha ta.

²⁴ Pila chata amâ hawpa hawhta tao awpa ta bie pathlâ ta.

²⁵ Atyna nata lianycheina vâta atâhna o liata patâhpa ama hiapa kha papua ta; Zisu deikua cha ama khopa hawhta tao awpa ta pie ta.

²⁶ Amâ chhi nota Saimaw Kurinia khihpa, lyurâhpa lâ tawhta a vypa patu ei ta. Zisu hnôh lâta a pia awpa ta a chô liata kraws cha pahnieh ei ta.

²⁷ Zawpi a hluhpi nata chanô pachârôhkheipa ta a cha ngâpazy ta zi ei ta.

²⁸ Zisu deikua chata âmo lâ a heih ta, “Zerusale sawchanôzy saih u, nâ chakhei khah u, nâmo nata nama sawzy châta cha teh u.

²⁹ Pachâ teh u, noh a vaw tlô aw, cha nohzy liana chata, ‘Chanô saw leipazy, saw phaoh beih leina chhizy, saw pazy beih leipa sâhpizy cha a nohlao na!’ ama tah aw.

³⁰ Cha tina chata chyhsazy ta tlâhpizy lâta, ‘Maniah vi teh,’ tah aw ei ta; tlâh byupazy lâta, ‘Maniah khu teh,’ ama tah aw.

³¹ Tho hrohpa liata hmahta he hawhta ama tao khiahta cha, a raohpa liana cha kha tluta ma ama tao aw tly?” tah ta.

³² Chatawhcha a hnohta mo hropa pano moleipa thie awpa ta a chhi hra ei ta.

³³ Luh-ru ama tahpa su cha ama tlô nahta, cha liana chata kraws liata khaipâ ei ta. moleipazy chhaota, a chachâh lâta pakha, a chavei lâta pakha.

³⁴ Zisu ta, “Ei Pâ y, âmo he a ngiahthai teh; ama hmotaopa he ama pahno vei na,’ tah ta. Chatawhcha a chysiazy cha a rai awpa ta pachao ei ta.

³⁵ Chatawhcha vâtlâh sahlao chata aduahpa ta sai ei ta; hyutuhpazy chhaota, ‘Mo hropa hmahta a pachha tyh mâ tâh; Khazohpa a tlypa Mesia a châ tlai khiahta cha ano chhao a pachha se!” tahpa ta taola ei ta.

³⁶ Chatawhcha pheisaihzy chhaota ano cha pahneisaisona ta hmâh ei ta, ano lâ a vy ei ta, sahma thaopa pie ei ta.

³⁷ “Zuzy beipa na châ tlai khiahtala, nâsasyh ta a pachha teh!” tah ei ta.

³⁸ Chatawhcha a chô lâna chata, “He he Zuzy Beipa a châ,” tahpa ta ropa ta a y.

³⁹ Moleipa ama khaipâpa pakha chata Zisu ra ta, “Mesia cha châ va chi mâ? A pachha la, keimo chhao maniah pachha teh!” tah ta.

⁴⁰ Châhrasala pakha chata a chhypa ta ra ta, “Khazohpa tlai chhao na chi tla maw, miakhasai ta ama cha hriepa he?

⁴¹ Keimo la hrie tlâh rai eima châ; eima hmotaopa ty dei a hmôpa eima châ; he chyhsa he la khâpahmah parao vei,” tah ta.

⁴² Chatawhcha, “Zisu, na Khihnarâh na tlô tita nâ thei thlâh ha mah y,” tah ta.

⁴³ Ano chata a hnohta, “Hmeiseihta ta, ei cha chho hih, atanoh he ei hnohta Paradi liata na y hra aw,” tah ta.

⁴⁴ Dawh hrawhleino rachhôh châ ta, cha tawhna chata zâlâ dawh thôh taihta râh tlokhuh vaw zoh ha ta,

⁴⁵ noh khaih khao leipa ta, Khazohpa achhyna-o poh-raipa cha a liahliah ta a vaw hrie ha ta.

⁴⁶ Zisu ao paro ngaitapa ta awh ta, “Ei Pâ y, na ku liata ei thlahpa ei cha pavaosa!” tah ta. A tah khai nahta a thlahpa pathlie ha ta.

⁴⁷ Chatawhcha pheisaih zakha hyutuhpa chata hmo yzie cha a hmô nahta, “He chyhsa he chyhsa siapa a châ tlai na!” tahpa ta, Khazohpa rei thai ta.

⁴⁸ Cha moh phapa cha sai awpa ta a vaw pakhypa zydua chata, hmo yzie zydua ama hmô nahta ama chachôhnazy a chôpata a di haw ei ta.

⁴⁹ Chatawhcha a pahnopatheipa zydua nata chanô Kalili râh tawhta a vaw zipazy cha, cha hmozy cha saipa ta lâhlapi ta aduah ei ta.

⁵⁰ Chyhsa pakha a moh Zawsi, ryureituhpa, chyhsa sia ngaitapa y ta,

⁵¹ ama reipa nata ama hmotaopa chhao kha a ryh ta tah leipa rai châ ta, Zu chyhsa Arimathai khihpa, Khazohpa Khihnarâh hnabei a seih tyhpa châ ta.

⁵² Cha chyhsa cha Pila lâta vawh ta, Zisu ri hiah ta.

⁵³ Chatawhcha la ta, poh rih dipa ta pahly ta, thlâ alô khiepa ahyhmah ama pazia beih leina liata pazia ta.

⁵⁴ Cha noh cha Pachyhnoh châ ta, pahânoh vaw châ daihmâ ha tlôh ta.

⁵⁵ Chanô Kalili râh tawhta a hnohta a vypazy khata zi lymâ ei ta, thlâ nata a ri pazianazie cha hmô ei ta.

⁵⁶ Chatawhcha a di ei ta, khâpaleipa rohpahâhpazy nata sathaw rohpahâhpazy a chhuahnoh ei ta. Pahânoh chata ryhpa biepiepa hawhta a pahâ ei ta.;