Theihthaina 3

¹ Hmohlâpa cha adyhna hlâpa atheihna châ sala, viahchao hri hry liatahpa a hlâ khiahtala, a chapawpa tlyma, a chanôpa tlyma rai châ sala, ABEIPA hmiakô liata seina a hnei leipa a hlâ awpa a châ.

² A hmohlâpa luh chô liana chata a ku pahnieh aw ta, ahmaohpakhyna poh-o chhikao thaby liata thie aw ta; Arawna sawchapawpa theihthaipazy chata maisâh cha thisaih chata ama hie awpa a châ.

³ Adyhna hlâpa atheihna liatahpa ABEIPA chata mei ta hlâpa hlâ aw ta, a chhohri thaw nata a rihrie zydua nata,

⁴ a lôpo miano nata a pahlypa thaw a pato liatahpa nata a pathi a pahlypa, a lôpo zy chhaota a la awpa a châ.

⁵ Chatawhcha Arawna sawchapawpazy ta maisâh liata mei liata tho a ypa chô liata raopa hlâpa chô liana chata ama rao awpa a châ; cha cha ABEIPA châta rohpahâh ngaitapa mei ta hlâpa a châ.

⁶ “Adyhna hlâpa atheihna ta ABEIPA châta a hmohlâpa cha mietahkupa zaw hry liatahpa a châ khiahtala, a chapawpa rai châ sala, a chanôpa rai châ sala, seina a hnei leipa a hlâ awpa a châ.

⁷ A hmohlâpa ta mietahkupa taw a hlâ khiahtala ABEIPA hmiako liata hlâ aw ta,

⁸ a hmohlâpa luh chô liana chata a ku pahnieh aw ta, ahmaohpakhyna poh-o tlyhmia liata thie aw ta; Arawna sawchapawpazy ta maisâh cha thisaih chata ama hie awpa a châ.

⁹ Chatanachata adyhna hlâpa atheihna liatahpa ABEIPA châta mei ta hlâpa a hla aw, a thawzy, a lahmei thawh ngaitapa a ualua ta, a ky ru taihta la khai aw ta, a chhôrih thawzy, a rihri zydua,

¹⁰ a lôpo miano nata a pahlypa thaw a pato liatahpa nata a pathi a pahlypa a lôpozy chhaota a la awpa a châ.

¹¹ Chatawhcha theihthaipa ta cha cha maisâh liata a rao awpa a châ, cha cha ABEIPA châta mei ta hlâpa niepa a châ.

¹² “A hmohlâpa cha mie a châ khiahtala ABEIPA hmiakô liata hlâ aw ta,

¹³ a luh chô liata a ku pahnieh aw ta, ahmaohpakhyna poh-o tlyhmia liata thie aw ta; Arawna sawchapawpazy ta maisâh cha thisaih chata ama hie awpa a châ.

¹⁴ Cha liata a hmohlâpa cha hlâ aw ta, ABEIPA chata mei ta hlâpa cha a chhôrih thaw nata a rihri zydua nat.

¹⁵ a lôpo miano nata a pahlypa a lôpozy chhaota a la awpa a châ.

¹⁶ Chazy cha theihthaipa ta maisâh liata a rao awpa a châ, rohpahâhpa chata mei ta hlâpa niepa châta a châ. A thaw zydua cha ABEIPA châta a châ.

¹⁷ Thaw tlyma, thisaih tlyma, nama nie lei awpa a châ tahpa he, nama pathla pachhuapazy taihta, nama yna maih liata chhâzaw bieraopa a châ aw, tah mah y,” tahpa ta.