Ryhpachaneina 32

¹ “Nah pachôh teh u, avâzy saih u,ei reih aw na; ei reikah puapa leilô ta thei se."

² Vâsua hawhta ei bie cha a suah aw, diati hawhta ei bie cha a tla aw, sibie panyupa chô liata vâsuah haw ta, nata sipopa chô liata vâsuah haw ta.

³ ABEIPA moh cha ei phuah aw na. Rôhnahna cha eima Khazohpa pie teh u!

⁴ Lôpanô, a hmotaopa cha a sia paki; a yzie zydua cha siana a châ. Khazohpa ngâchhihpa hmo paraona hnei leipa, siapa nata phapa a châ,

⁵ Pha lei ngaitapa ta a chô liata tao ei ta, a sawzy cha vei ei, ama molei hapa vâta, chhâ dyutlai leipa nata chhorupa ama châ.

⁶ Hy ahrupa nata a so leipa saih u, cha hawhta ma ABEIPA cha viari nama thô aw? Châ taotuhpa ei cha nama paw châ vei mâ? Cha tao ta, cha pa-i vei mâ?

⁷ Hlâno nohzy cha a thei thlâh ha la, chhâ hluhpi kôzy cha pachâ tua; na paw hiahri la a cha chho aw; na machâ zy chhaota ama cha chho aw.

⁸ Chônôchaipa ta phopi khihnarâh a pie nota, chyhsa saw zy a pachhai nona khata; phozy râhri pakhâh ta, Izarel pathlazy hluhna zie ta.

⁹ ABEIPA tovyuh cha a chyhsa zy châ ei ta, Zakaw sahlao cha a ryuto ama châ.

¹⁰ Râhchawhpa râh liata a huah ta, râhpathohpa ruapa dâhpa liata a chheipa ta ypa ta mohôh ta,a mo sawzy hawh tlaita.

¹¹ Pahmôpi ta a bu liata a taw pahra ta, a taw chô liata a mathlaw pakai ta; a mathlaw zy pakai ta, la ta, a mathlaw ta a cheih tyhpa hawhta.

¹² ABEIPA deita ta a chhi tyh ta, râh hropa khazoh cha a hnohta y vei.

¹³ Alei su sâhpa liata zy pakiasa ta, lyu liata a veihpa zy ri ta; lôpanô tawhta kheihti pasysa ta; lôsoh tawhta thaw chhao chata.

¹⁴ Viahchao sâhpiti kuapa nata mietahkupa sâhpiti, mietahkupa taw nata mietahkupa tôhpa thaw zy ta; Basana râh viahchao hri nata miezy, viah sâh lopa thawzy chhaota kresawti saipa, kre tawhtapa doh chi ta.

¹⁵ “Zakaw cha nie ta, a rih bie ta, Zesuru cha vaw thawh ta aty haw; vaw thawh chi ta, mihpa ta, na pahly; Khazohpa cha taotuhpa na siesai haw, na pachhana lôpanô mohnao tlôh chi.

¹⁶ Râh hropa khazoh ta a hia patlia ta hmo pasichhipa ta a hie pahâhpa ta.

¹⁷ Khazoh a châ leipa hripa zy lâta a theih ei ta, ama pahno beih leipa khazoh zy lâta, khazoh thipa zy a hnôh lâ pi ta a vaw ypa, nama mahpaw zy chi beih leipa hnohta.

¹⁸ Châ satuhpa Lôpanô pasasa va chi, châ taotuhpa Khazohpa na my hra.

¹⁹ Cha cha ABEIPA ta hmô ta â hao, a sawchapaw zy nata a sawchanô zy hie pahâhpa vâta.

²⁰ ‘Anyusai aw na ta, kheihta ma ama y rai, chhâ dyutlai leipa ama châ, ngâchhih leipa saw zy.

²¹ Khazoh a châ leipa hmo ta a hia patlia ei ta; ama hmo khâpa hrao leipa ta ei hie na pahâh ei ta. Chi ta rei leipa zy ta hia patlia aw na ta, pho hrupa zy ta hie ei pahâh aw.

²² Mei chata ei pathi-ia ta, Sheol chao ki lâ a kâ, leilô a kô veihna chhaota a kâ khai, tlâh bôna zy a kâ.

²³ ‘Ama chô liata raona pachô aw na ta, ama chô liata li ei pathlie aw;

²⁴ nodipa ta pahâpahaoh aw ei ta, mei nata paraona diathlâpa ta châ leipa ta a kâ patlô aw; ama chô liata lyurâhpa sa hâh zy tuah aw na ta; doh lei liata alyhpa zy châmaih chhao.

²⁵ Khôtho lâta zaozi ta thie aw ei ta, chhôh liata thlazohpa ta, satlia nata laihsa, sapi a ngipa, sa pawpazy chhao tai.

²⁶ Âmo cha chhawh pathla awpa nahta, ama pahno thlâhna zydua chhao ei pahlei aw,

²⁷ châhrasala ama khakhaipa zy reipachhiena cha ei chi, âmo chata he hawhna heta reipa ta, “Eima tiah haw, ABEIPA baona a hlao leipa ta,” ama tah aw.

²⁸ “Sona a hnei leipa pho châ ei ta, âmo liata novâhna y vei.

²⁹ Âmo so mawh sala, hezy he pahnothai aw ei ta, ama hnoh lâ kyh ama pachâ awpa tlai!

³⁰ Kheihta e pakha ta a sâh kha â chadai aw ta, pano ta thy kha amâ chadaipai aw, ama Lôpanô ta âmo zuapa ta, ABEIPA ta a piepa ama châ tlôh vei khiahta cha?

³¹ Ama lôpanô cha eima Lôpanô hawhpa châ tlôh va, eima khakhaipa zy tlai pachâna zie chhaota.

³² Ama krezô cha Sawdawma krezô Kawmawra râh liatahpa a châ, a krezy cha châmaih kre a châ,a saozy cha a pa-ia

³³ ama kresawti zy cha parih châmaih, nata vâzi châmaih chi chhih ngaitapa a châ.

³⁴ Cha cha ei pakhy, ei ryubyh liata baipa châ vei ma?

³⁵ Phuh lapa nata viarithôpa cha keima tao awpa a châ, ama pheibu â phie tita ama raona noh cha â vaw hnia haw; ama chô liata hmo a vaw tlô awpazy cha a vaw tlô patoh aw.

³⁶ ABEIPA chata a chyhsa zy ryurei aw ta, a chakaotuhpa zy no a paza aw, ama thatlôna y khao leipa aw ta, a hroh thei awpa cha ama sôh.

³⁷ ‘Khataih liata e ama khazoh; tahpa ta ama lôpanô ama ngâpa cha,

³⁸ ama theina thaw a nietuhpa, ama dopa hlâna kresawti a dohtuhpa zy cha? Vaw thyupa ta, cha bao ei sala, nâmo cha pabohtuhpa châ mawh sy!

³⁹ ‘Kei, keima tlai ei châpa he, pahno ula, khazoh hropa y veih ei; thie tyh na ta, ei pahro tyh hra; hmah paphao tyh na ta, ei patlâh tyh hra; ei ku tawhtapa na chhu theipa rai y veih ei.

⁴⁰ Avâ lâta ei ku pazawh na ta, ei hrona reipa ta ei reih.

⁴¹ Ei zaozi diehpa chata na ta, ei ku ta pachiana a patupa cha ta, ei khakhaipa zy chô liata phuh la aw na ta, nâ haotuhpa zy cha viari ei thô aw.

⁴² Ei châtai zy cha thisaih ta parisa aw na ta, ei zaozi ta sapa a palâ aw, thiepa nata seizy thisaih chhaota, khakhaipa hyutuhpa zy luh tawhta ei tao,’ a tah aw.

⁴³ “Hy nâmo pho to saih u, a chyhsa zy chhaota aly teh u; a chakaotuhpa zy thisaih phuh cha a la aw, ano a dyuhtuhpa zy chô liata phuh a la aw, a khihnarâh nata a chyhsa zy chata aryhna pakipa a tao aw,” tahpa ta.

⁴⁴ Zawpi zy nahkhao theina liata cha hla bie zydua cha Mawsi ta reih ta, ano nata Nuna sawchapawpa Zawsua chhaota.

⁴⁵ Mawsi ta cha bie zydua cha Izarel mo zydua hnohta a rei khai nahta,

⁴⁶ ama hnohta, “Atanoh nama hnohta bie ei cha pahnosapa liata nama pathipalôh khâchâ pachhô ula, he ryhpa bie zydua he a chado ngaitapa ta zyh awpa ta nama sawzy bie pie teh u.

⁴⁷ Nama châta hmo khâpa hrao leipa châ leipa ta nama hrona châ tlôh ta; chatawhcha he hmozy taopa heta hnei awpa ta Zawdâh nama chakapa râh liana chata nama hro a pareih aw” tah ta.

⁴⁸ Cha noh lilaw liana chata ABEIPA ta Mawsi chho ta.

⁴⁹ “Môaba râh liata Zerikô dady ta Abari lâthlôh liata Nebô Tlâh lâna chata khy la, Izarel pathlazy hnei awpa ta ei piepa Kana râh cha sai teh;

⁵⁰ chatanachata na unawhpa Arawna, Hôra Tlâh liata thi ta, a chizy lâta pahlypa a châ hawpa hawhna khata na kiana liana chata thi aw chi ta, na chizy lâta pahlypa na châ aw;

⁵¹ Zin râhpathohpa liata Kedesa liata Meriba ti liata Izarel pathlazy hry liata eina palyupalih leipa vâna chi khata.

⁵² Râh cha hmô aw chi ta, châhrasala Izarel pathlazy ei piepa râh liana chata a ngia aw va chi,” tahpa ta.;