2 Abeizy 10

¹ Ahaba ta Samari liana chata sawchapawpa sysari hnei ta, Zehu ta Samari liata Zezrel khih hyutuhpa, machâ zy hnohta nata Ahaba sawzy a vaw chhytuhpa zy hnohna chata,

² He châ he nama hmô pata nahta nama zibeipa sawchapawpa zy cha nama hnohta ama ypa cha ta, talaili zy, arâ zy, kuh a hneipa khih zy chhao, chariah chhaichhi chhaota hnei eichi ta,

³ nama zydua zibeipa sawchapawpa zy hry liatahpa a pha chaipa nata a sia chaipa tlua ula, a paw abeidyuhchhai liata patyusa ula, nama zibeipa chhôhkha zy adyuhpa cha adyuhkhei teh u,” tahpa ropa cha paphao ta.

⁴ Châhrasala âmo chata chi ngaita ei ta, “Abei pano chhao kha ama pahnie khao leipa châ ta, keimo ta kheihta e eima pahnie thei aw?” tah ei ta.

⁵ Abei o chhôh liata hyutuh chaipa zy, khihpi a vaotuhpa zy, machâ sahlao zy, hawti sahlao a vaw chhytuhpa zy chhao chata Zehu hnohta, “Na chakaotuhpa zy eima châ, tao awpa ta maniah na chhopa maih cha eima tao lymâ aw. Ahyhmah ta abei ta tao aw ma pi; nâma ta a pha na tahpa hawhta tao mah y,” tahpa ta chyhsa tuah ei ta.

⁶ Châ sânona ama hnohta paphao heih ta, “Kei chhâh a châpa ta, ei bie namâ ngiah awpa khiahtala, nama zibeipa sawchapawpa zy luh vaw cheih ula, mylâ atahmâ ti hlâna heta Zezrel liata kei lâta a vy teh u,” tahpa ta. Abeipa sawchapawpa zy cha sysari châ ei ta, khihpi molaipa sahlao âmo a chhytuhpa hnohna chata y ei ta.

⁷ Cha cha ama hmô nahta abeipa sawchapawpa zy cha patu ei ta, a sysari ta thie ei ta, ama luh cha hrâbyh zy liata soh ei ta, Zezrel liata ano lâta paphao ei ta.

⁸ zikyu a râpa vaw tlô nah ta, “Abei sawchapawpa luh cha ama vaw cheih haw,” tahpa ta chho ta, ano chata, “Kuh a ngiana chhikao liata su no lâta pacho ula, mylâ taihta y mawh sy,” tah ta.

⁹ A mylâ ta cha kei pua ta, ei zibeipa cha tei na ta, thie haw na ta; cha khiahla he sahlao zydua he ahy thiepa a châ?

¹⁰ ABEIPA ta Ahaba chhôhkha zy kyh a reipa ABEIPA bie cha leilô liana heta lei chacheita aw vei, tahpa pahno teh u; ABEIPA ta a chakaotuhpa Elaiza hmâpa ta a reipa kha a vaw patlô haw hih,” tah ta.

¹¹ Zehu chata Zezrel liata Ahaba chhôhkha a laibâhpa zydua nata a molaipa zydua nata a viasa zydua nata a theihthaipa zy cha pakha hmah pahlôh leipa ta thie ha ta.

¹² Chatawhcha thyu ta, pua ta, Samari lâta sie haw ta. Lâpi liata mietahku vaihtuhpa zy, mietahkupa hmi ngyuna o a kei tlô nah ta,

¹³ Zehu chata Zudah beipa Ahaziah unawhpa sahlao hmô ta, “Ahyzy nama châ?” tah ta. Âmo chata, “Ahaziah unawhpa zy châ pi ta, abei sawzy sahlao nata abeinô saw zy sahlao eima zâ naoh aw,” tahpa ta a chhy ei ta.

¹⁴ Ano chata, “A hrohpa ta patu teh u,” tah ta. Chatanachata a hrohpa ta patu ei ta, mietahkupa hmi ngyu na o khaohtlô kiapâh liana chata thie ei ta, chyhsa sypalih nata pano tlai châ ei ta; pakha hmahta pahlôh vei.

¹⁵ Cha tawhtapa a pua tawhna chata Rekhabi sawchapawpa Zehônada ano dy awpa ta a vypa kei hmô ta; a naoh ta, a hnohta, “Na chô liata palôhrupa adopa ei phaohpa hawhna heta palôhrupa a dopa na phaoh hra tlyma?” tah ta. Zehônada chata, “Phaoh cha,” tahpa ta a chhy ta. “Cha khiahla na ku na vaw hlâ tua,” Zehu ta, tah ta. Zehônada a ku cha kei hlâ ta. Ano chata a hnohta a talaili chhôh liata pangiasa ta.

¹⁶ Zehu chata, “Ei hnohta vaw sie hra la, ABEIPA chata phahnai ei ngiahna zie he vaw hmô hra tua,” tah ta. A talaili liana chata pasiesa haw hra ta.

¹⁷ Samari a kei tlô nahta, Ahaba chhôhkha zy Samari liata a laibâhpa zy cha a pahleipadia khai hlâ lei cha thie lymâ ta, Elaiza hnohta a reipa ABEIPA biehawhna tlai kha ta.

¹⁸ Zehu ta zawpi sahlao zydua cha aw pakhy ta, ama hnohta, “Ahaba khata Baal he bâhta dei chakao ta; Zehu deikua cha thata a chakao aw.

¹⁹ Baal hrohsopa sahlao zydua a chhytuhpa zydua nata a theihthaipa zydua kei lâta aw pakhy teh u; ahyhmah ta a ki leipa ta y khah se, Baal lâna heta atheihna rôhnah ngaitapa hlâ awpa hnei na ta; ahyrai a ki leipa maih cha hroh chachei aw vei,” tah ta. Châhrasala Zehu chata Baal a chhytuhpa zy cha thie a chhuahpa ta piepie ngaitapa ta a tao.

²⁰ Zehu chata, “Baal moh ta pakhypi pathaihpa tao teh u,” tah ta. Cha cha pathâhsa haw ei ta.

²¹ Zehuchata Izarel zydua liana chata paphao ta; Baal a chhytuhpa zydua cha a vy ei ta, a hlao leiparai y veih ei. Baal o liana chata a ngia ei ta, Baal o cha chhikao tawhta chhôchâ taih ta bie haw ei ta.

²² A tobina poh a mokhâhtuhpa hnohta, “Baal a chhytuhpa zydua he a tobina poh lapa teh,” tah ta. Chatanachata a tobina poh zy cha vaw lapa ta.

²³ Zehu cha Rekhabi sawchapawpa Zehônada nata Baal o liana chata a ngia ei ta; Baal a chhytuhpa zy hnohna chata, “He liana heta Baal a chhytuhpa zy deita châ leipa ta ABEIPA chakaotuhpa zy ama y pathlei aw na, tlua ula, moh teh u,” tah ta.

²⁴ Chatawhcha atheihna zy nata raopa hlâna hlâ awpa ta a ngia ta.Zehu chata khôtho liata chyhsa sysari paduasa ta, “Hezy nama ku liata ei cha piepa ei he, ahyrai ama pathlie tlai khiahtala, a pathlietuhpa chata a hrona vyuhpa ta ano hrona cha a pahlei aw,” tah ta.

²⁵ Raopa hlâna a hlâ khai pata nahta Zehu chata a vaihtuhpa pheisaih nata ama hyutuhpa zy hnohta, “A kei ngia ula, thie teh u; ahyhmah ta pathlie khah u,” tah ta. Zaozi ta chhawh chaimâh ei ta, vaihtuhpa pheisaih nata ama hyutuhpa zy chata khôtho lâ thy ei ta; Baal o chhôh chhôhpadâhpa lâta angia ei ta,

²⁶ Baal o liata khazoh nohthlahpa zy cha puakhei ei ta, mei ta rao ei ta.

²⁷ Baal lôbô cha pacho ei ta, Baal o cha parao ei ta, lyupâh puana o ta hmâh haw ei ta, atanoh taihta ama hmâh.

²⁸ Cha hawhna chata Zehu ta Izarel râh tawhtapa Baal cha a pahleipadia.

²⁹ Châhrasala Neba sawchapawpa Zerôbaw moleina Izarel sahlao zy hmo paraosapa ta a taopa zy cha Zehu chata pathlei hlei vei, cha cha Bethel nata Dana liata ngôh viahchao taw nohthlahpa zy a chhypa a châ.

³⁰ ABEIPA ta Zehu hnohta, “Ei mo a dy ngaitapa hmo na taopa vâta nata ei palôhrupa kho viapa hawh tlaita Ahaba chhôhkha zy chô liata na taopa vâta, na sawchapawpa zy cha chhâ palihna taihta Izarel zy abeidyuchhai liata amâ tyuh aw,” tah ta.

³¹ Châhrasala Zehu chata ABEIPA Izarel zy Khazohpa ryhpa cha a pathipalôh zydua ta a pyh leipa ta; Zerôbaw ta Izarel sahlao zy hmo paraosapa ta a paraopa kha pathlei hlei leipa ta.

³² Cha nona chata ABEIPA ta Izarel zy cha pathlua pathao haw ta. Hazael ta Izarel râh zydua lâna chata pahnie lymâ ta;

³³ Zawdah tawhta nochhi lâ Kilia râh zydua Kada mozy, Rubena mozy, Manase mozyArnaw saikao liata Arôera tawhta Kilia nata Basana taihta.

³⁴ Zehu thâtih hropa zy, a hmotaopa zydua, a hmotaotheina zydua cha Izarel abei zy a bei no tahpa kyh rona châbu liana chata ropa ta y vei mâ?

³⁵ Zehu cha a mahpaw zy hnohta a mô ta, Samari liata pabu haw ei ta. A sawchapawpa Zehôhaza cha ano vyuhpa ta abei haw ta.

³⁶ Samari râh liata Izarel zy chô liata Zehu ryu a rei chhôh cha kô syno nata kô charie a châ.