Malureina 32

¹ Rubena nata Kada pathlazy chata sahroh hnei ngaita ei ta; Zaza râh nata Kilia râh ama hmô nahta, a su cha sahroh châta su pha ngaitapa châpa ta pahno ei ta.

² Kada pathlazy nata Rubena pathlazy chata Mawsi nata theihthaipa Eliaza nata pôhpakhypa sahlao pawhrâhpazy cha bie chho ei ta.

³ “Izarel pôhpakhypa sahlao hmiakô liata ABEIPA ta a panawhpa râh, Atarô zy, Dibô zy, Zaza zy, Nimrah zy, Hesbaw zy, Eliale zy, Seba zy, Nebô zy, Biôna zy ch.

⁴ sahroh châta a pha ngaitapa râh châ ta; na chakaotuhpazy heta sahroh hnei pi ta.

⁵ â ryh na tah khiahtala he râh he eima pahrâ awpa ta maniah pie la, Zawdâh maniah chakâhsa leipa ta,” tah ei ta.

⁶ Mawsi chata Kada pathlazy nata Rubena pathlazy hnohta, “Nama unawhpazy cha adyuhna lâta sie aw ei ta. Nâmo cha he liana heta nama vaw y thlâh ha aw mâ.

⁷ Khazia e ABEIPA ta a piepa râh liata a ngia lei awpa ta Izarel pathlazy palôhrupa riah nama pachhie aw?

⁸ Kadesabania tawhta râh a kei mohparu awpa ta ei tua nona khata he hawhna heta nama mahpawzy chata tao ei ta.

⁹ Eskawl saikao ama kaw tlô nona khata râh cha hmô ei ta, ABEIPA ta râh a piepa liana chata amâ ngia lei nawpa ta Izarel pathlazy palôhrupa riah pachhie ei ta.

¹⁰ Cha noh liana chata ABEIPA pathi-ia ta.

¹¹ Izi râh tawhta a vaw puapa, kô syno tawhta a chô lâta chyhsa rai chata Abaraha zy, Aisika zy, Zakaw zy hnohta chhiesakhâhpa ta ei piepa râh cha ahyhmah ta hmô aw veih ei, eina zi hmeihseih leipa vâta.

¹² Keni chyhsa Zephuna sawchapawpa Kaleba nata Nuna sawchapawpa Zawsua zy dei leipa ta cha, âmo chata ABEIPA cha ama zi hmeihseihpa vâta,’ tahpa ta chhie sakhâh ta.

¹³ Izarel sahlaozy chô liata ABEIPA pathi cha ia ta, ABEIPA mohmô liata hmo pha leipa a taotuhpa chhâ zydua ama leidia khai hlâ lei cha râhpathohpa liata kô sypalih paviavisa ta.

¹⁴ Izarelzy chô liata ABEIPA pathi-iana chichhih ngaitapa baichhapa ta nâmo chhâ moleipa heta nama mahpawzy â thla haw eichi ta.

¹⁵ ABEIPA zi leipa ta nama y khiahtala, âmo sahlao he râhpathohpa liata paysa heih aw ta, he chyhsa zydua he nama pahleipadia aw mâh tâh,” tah ta.

¹⁶ A kei hnia ei ta, a hnohta, “He liana heta eima sahroh châta mietahkupa sahdôzy nata eima sawnawhzy châta khihzy tao aw pi ta.

¹⁷ keimo deikua cha eima su awpa eima tlô hlâ lei ta Izarel pathlazy hmiakô liata sie lymâ awpa ta chariah chhaichhi eimâ tobi aw na; he râh liata chyhsazy vâna heta eima sawnawhzy cha kuhdôhpa khihzy liata y aw ei ta.

¹⁸ Izarel pathla chyhsa tota, ama to awpa ama to chyu hlâ lei cha eima o lâta a di aw ma pi.

¹⁹ Eima to awpa cha heisâ lâ Zawdâh nochhi lâ a châpa vâta, Zawdâh haosâ khô lâ cha to aw ma pi,” tah ei ta.

²⁰ Mawsi ta ama hnohta, “Cha hawhta tahpa ta adyuhna liata ABEIPA hmiakô liata sie awpa ta chariah chhaichhi a tobipa ta.

²¹ a hmiakô tawhtapa a khakhaipazy topa ta, ABEIPA hmiakô liata râh cha pahniepa a châ hlâ lei ta, nama hry liata chariah chhaichhi atobipa zydua ta ABEIPA hmiakô liata Zawdâh nama chaka khai khiahtala.

²² noh hro a di aw eichi ta; ABEIPA chô liata nata Izarelzy chô liata thai lei châ aw veih eichi; chatanachata he râh he ABEIPA hmiakô liata nama to awpa châ aw ta.

²³ Anodeikuacha cha hawhta nama tah leipa khiahtala, ABEIPA chô liata a moleipa châ aw eichi ta, nama molei khiahtala a cha hmô tlai aw ei, tahpa pahno teh u.

²⁴ Nama sawnawhzy châta khihzy tao ula, nama mietahkupazy châta chhao sahdôzy tao ula; nama reipa hawhna chata tao teh u,” tah ta.

²⁵ Chatawhcha Kada pathlazy nata Rubena pathlazy chata Mawsi hnohta, “Na chakaotuhpazy heta eima zibeipa biepiepa hawhna heta eima tao aw na.

²⁶ Eima lahpinô nata sawzy, eima mietahkupa zawzy, eima sahlao zydua zy cha Kilia râh khih liana zy heta vaw y aw ei ta.

²⁷ anodeikuacha na chakaotuhpa a dyuh awpa ta chariah chhaichhi a tobipa zydua zy chata eima zibeipa a reipa hawhna chata ABEIPA hmiakô liata eima chakah aw na,” tahpa ta reih ei ta.

²⁸ Mawsi chata ama thâtih liana chata theihthaipa Eliaza zy, Nuna sawchapawpa Zawsua zy, Izarel pho chhôhkha pawhrâhpazy cha bie pie ta.

²⁹ Mawsi ta ama hnohta, “Kada pathlazy, Rubena pathlazy adyuh awpa ta chariah chhaichhi a tobipa zydua heta ABEIPA hmiakô liata Zawdâh cha chakah kheipa ta râh cha nama panawh khiahtala, Kilia râh cha ama ryutona châta nama pie awpa a châ.

³⁰ anodeikuacha chariah chhaichhi a tobipa ta ama cha chakah khei vei khiahtala, Kana râh liata nama hryta ama hlao aw,” tah ta.

³¹ Chatawhcha Kada pathlazy nata Rubena pathlazy chata, “Na chakaotuhpazy hnohta ABEIPA ta a reipa hawhna chata eima tao aw na.

³² Chariah chhaichhi a tobipa ta ABEIPA hmiakô liata chakapa ta Kana râh liata a ngia aw pi ta, chatanachata eima râh to awpa cha Zawdâh khô lâta a châ aw,” tahpa ta a chhy ei ta.

³³ Mawsi chata Kada pathlazy nata Rubena pathlazy nata Zawsi sawchapawpa Manase pathla pho khophie zy cha Amawri beipa Sihaw râh zy, Basana beipa Ôka râh, cha râhzy cha a khih a ypa zydua chhaota, a chheipâh râh khihzy chhaota pie ta.

³⁴ Kada pathlazy chata Dibô zy, Atarô zy, Arôera zy.

³⁵ Atarôsôpha zy, Zaza zy, Zôbeha zy.

³⁶ Benira zy, Behara zy tao ei ta, khihpi kuh a hneipa zy, mietahkupa sahdô zy chhaota.

³⁷ Rubena pathlazy chata Hesbaw zy, Eliale zy, Kiriathai zy.

³⁸ Nebô zy, Balama zy, (a mohzy he panano hawpa a châ), Sibmah zy tao ei ta; ama khih sapazy cha moh hropa bi ei ta.

³⁹ Manase sawchapawpa Makhi pathlazy cha Kilia râh lâta sie ei ta, la ei ta, Amawri mo, cha liata a ypazy cha papua ei ta.

⁴⁰ Mawsi ta Kilia râh cha Manase sawchapawpa Makhi pie ta, cha liana chata y ta.

⁴¹ Manase sawchapawpa Zaira chata cha khihzy cha la ta, Havôzaira bi ta.

⁴² Nôbah chata Kenatha la ta, a khih tawhzy chhaota, ano moh paphaopa ta Nôbah bi ta.