Athaona 29

Студија

   

1 Zakaw cha sie lymâ ta, nochhi pathlazy râh cha tlô haw ta.

2 Kei mo ta, lyurâhpa liata tikhaohrei vaw y ta, a kiahpâh liana chata mietahkupa zaw hri thôh he a byu thlâh ha ei ta; cha tikhaohrei liatahpa mietahkupa zawzy cha ti ama padosa tyh. Tikhaohrei chhikao liata alô a ypa cha lai kaw ta,

3 Cha liana chata mietahku zaw zydua a pahmaohpakhy tyh ei ta. Tikhaohrei chhikao liata alô cha pahluah ei ta, mietahkupazy cha ti padosa ei ta. Alô cha tikhaohrei chhikao liata a yna ualua liana chata soh heih ei ta.

4 Zakaw chata âmo hnohta, “Ei viasa saih u, khaitaihlâ chyhsa e nama châ,” tah ta. Amo chata, “Harana liatahpa eima châ,” tah ei ta.

5 Ano chata ama hnohta, “Nahaw sawchapawpa Laba nama pahno ma?” tah ta. Amo chata, “Eima pahno,” tah ei ta.

6 Ano chata ama hnohta, “A tlâh no a châ ma?” tah ta. Amo chata, “A tlâh nota a châ na; moh teh, a sawchanônô Rakheli chhao mietahkupazy hryta a vy hao!” tah ei ta.

7 Ano chata, “Noh a sa chhei ha, sahroh hao a daih hra vei; mietahkupazy he ti padosa ula, a lao pabâsa teh u,” tah ta.

8 Amo chata, “Tao thei ma pi, mietahkupa zaw zydua pahmaohpakhypa ta, tikhaohrei chhikao liata alô he pahluapa ta a y hlâ lei ta cha; cha khai tawhna chata mietahkupazy cha ti eima padosa tyh,” tah ta.

9 Chatawhcha amo bie a chho nona chata, Rakheli cha a paw mietahkupazy vaihpa ta vaw tlô ta; ano ta vaih tyh tlôh ta.

10 Chatanachata Zakaw chata a kei hnia ta, tikhaohrei chhikao tawhta alô cha pahluah ta, a nô rilâhpa Laba mietahkupazy cha ti padosa ta.

11 Chatawhcha Zakaw chata Rakheli cha sy ta, ao paropata cha ta.

12 Chatawhcha Zakaw chata a paw tuapapa a châpa nata Rebeka sawchapawpa a châ tahpa, Rakheli cha chho ta; chatanachata Rakheli cha a râ ta a paw kei chho ta.

13 Chatawhcha Laba chata a sietanô sawchapawpa Zakaw thâtih cha a theipata nahta dy awpa ta a râ ta, a pyh ta, sy ta, a o lâ a chhi haw ta. Zakaw chata, cha bie zydua cha Laba chho ta.

14 Laba chata a hnohta, “Ei rupa nata ei sapa tlai na châ cha zaw!” tah ta. Chatawhcha thla kha ano hnohta y ta.

15 Chatawhcha Laba chata Zakaw hnohta “Ei tupapa na châpa vâta a saipa ta eina chakao awpa chi ma a châ rai? Khâpa e na hlao aw, na chho tua teh?” tah ta.

16 Laba chata sawchanô pano hnei ta; a uhtheipa moh cha Liah châ ta, a seihnaipa moh cha Rakheli a châ.

17 Liah cha a mo pha leipa ta, Rakheli deikua cha chhithai kawpa nata sabia phapa châ ta.

18 Zakaw chata Rakheli cha a kyh pachâ ta; a hnohta, “Na sawchanônô seihnaipa Rakheli hnei awpa ta kô sari ei cha chakao aw,” tah ta.

19 Laba chata, “Ano cha chyhsa hropa ei pie aw hlâta cha, nâ ei cha pie awpa a pha via aw; ei hnohta y thlâh ha teh,” tah ta.

20 Chatanachata Zakaw chata Rakheli hnei awpa ta kô sari cha chakao haw ta; châhrasala a kyh a pachâ kawpa vâta noh chyhta hawhta pahno ta.

21 Chatawhcha Zakaw chata Laba hnohta, “Ei zialâh thei nawpa ta ei lahpinô cha na pie teh, ei daihti a ki haw tlôh ta,” tah ta.

22 Laba chata cha su liata chyhsa zydua cha pakhy khai ta, kyhchhi tao ta.

23 Chatawhcha a zo thao dyupa ta a sawchanônô Liah cha a chhi ta, Zakaw lâta chhihtha ta, ano cha a zialâh ta.

24 (Laba chata a seichanônô Zilpah cha, a sawchanônô Liah hnohta, a seichanô châta pie ta.)

25 Chatawhcha my a vaw châ nata Liah vaw châ ha ta; Zakaw ta Laba hnohta, “Ei chô liata na hmo taopa he, kheihtazie ta ma a châ tly? Rakheli hnei awpa ta cha chakao vana mâ? Khâpa vâta e eina dô chi?” tah ta.

26 Laba chata, “Eima râh liana heta cha hawhta saw uhtheipa hlâta seihnaipa dyh pachâsa tuapa cha, yzie châ vei.

27 Ano châta noh sari he patloh chy tua la, chanachata kô sari hropa eina chakao heih awpa chi vyuhpa ta mo hropa chhao eima cha pie hra aw,” tah ta.

28 Zakaw chata cha hawhta tao ta, a noh sari cha patloh ta; chatanachata a sawchanônô Rakheli cha, a lahpinô châta pie ta.

29 Laba chata seichanônô Bilha cha a sawchanônô Rakheli hnohta a seichanô châta pie ta.

30 Rakheli cha a ziakhei hra ta, Liah hlâna chata Rakheli cha a kyhpachâ via ta, Laba cha kô sari hropa chakao heih ta.

31 Chatawhcha ABEIPA chata Liah cha a haopa ta a y tahpa pahno ta, chatanachata a chhi pahypa ta; Rakheli deikua cha saw leipa châ ta.

32 Liah cha saw phaoh ta, sawchapaw sa ta, a moh ta Rubena bi ta; “ABEIPA chata ei rietheizie a hmôpa vâta a châ hih; atahmâ la ei vahpa ta kyh eina pachâ ha aw,” tah ta.

33 Saw phaoh heih ta, “ABEIPA chata a haopa ta ei y tahpa a pahnopa vâta, he chhao he eina pie hih,” tah ta; a moh ta Simeôna bi ta.

34 Saw phaoh heih ta, sawchapaw sa heih ta, “Atahmâ la sawchapaw pathôh ei sapa haw vâta, ei vahpa ta eina zao ha aw,” tah ta; chavâta a moh ta Livai bi ta.

35 Saw phaoh heih ta, sawchapaw sa heih ta, “Atahmâ he cha ABEIPA ei reithai aw,” tah ta; chavâta a moh ta Zudah bi ta; chatawhcha saw sa heih khao mâh leipa ta.

   
Scroll to see more.