Esthy 5

¹ A noh thôh noh na chata Esthy chata a abei chysia a tobi ta, abei o dady ta abei o dôhpachhôh liana chata a kei duah ta. Abei cha abei o liana chata a abeidyuchhai liata a o a ngiana dadyta liata a tyuh ta;

² Beinô Esthy cha abei tlyhmia dôhpachhôh liata aduahpa abei ta a hmô nahta a chô liata aly ta, abei chata a ngôh chôhchahrei a chabapa cha Esthy lâta hy ta. Chatanachata Esthy chata a kei hnia ta, abei chôhchahrei pawhmao cha kei hria ta.:

⁴ Esthy chata. “Abei ta a pha a tahna zie a châ khiahtala, atanoh châta kyhchhi na châta ei chhuahnohpa nie awpa ta abei nata Hama a vy ei se.” tah ta.

⁵ Abei chata, “Esthy reipa hawhta châ awpa ta Hama cha a parah mawh sy,” tah ta. Chatanachata abei nata Hama chata Esthy kyhchhi a chhuahnohpa cha nie awpa ta vawh ei ta.

⁶ Chatawhcha kresawti kyhchhina liana chata abei ta Esthy hnohta, “Khâpa na hiah aw? Piepa na châ aw. Khâpa na khoh? Ei khihnarâh khophie taih chhao piepa na châ aw,” tah ta.

⁷ Châhrasala Esthy chata “Ei hmo hiapa nata a hawpa cha:

⁸ Abei modypa ta ei châ nata ei hmo hiapa cha abei ta pie awpa ta a ryh a tahna zie a châ nahta, ei hmo hawpa cha tao awpa ta a ryh a tahna zie a châ khiahtala abei nata Hama châta ei kyhchhi a chhuahdypa cha nie awpa ta a vy ei sala, abei reipa hawhna chata mylâ ei tao aw,” tahpa ta a chhy ta.

⁹ Cha noh liana chata Hama cha thaphapa nata aly ngaitapa ta pua ta. Châhrasala Hama chata abei tlyhmia dôhpachhôh chhikao liata Môdekai cha a vaw duah leipa nata a piepâ leipa ta a hmô nahta a pathi-ia ngaita ta.

¹⁰ Anodeikuacha Hama cha a sohsi lyhlia ta a di ha ta; a viasa zy nata a lahpinô Zeresa cha pa-awsa ta.

¹¹ Hama chata a sôh nata a piah rôhnah zie zy, saw a hnei hluh zie zy, abei ta a pakiasâhna a sâhna hmo zydua zy, abei pawhrâhpa zy nata a chyhsa zy hropa hlâta a pachônôna zy ama hnohta reih ta.

¹² Cha dei châ leipa ta, “Abeinô Esthy chata a kyhchhi liana chata keima dei leipa ta cha ahy hmah ta abei hnohta pahlaosa leipa ta. Mylâ khi abei nata maniah a hrua.

¹³ Chârasala Zu chyhsa Môdekai, abei tlyhmia dôhpachhôh chhikao liata atyupa ei hmô chhôhta cha he zydua he ei châta khâpa hmah phahnaina y vei,” tah hra ta.

¹⁴ Chatanachata a lahpinô Zeresa nata a viasa zydua chata a hnohta, “Dy sypangaw a sâhpa ta pa-aosaona pataosa awpa ta myta abei chho la; kyhchhina lâna chata abei hnohta aly ngaitapa ta vawh teh,” tah ei ta. Cha chata Hama cha palysa ta. pa-aosaona cha pataosa ta.