1
Hy Khazohpa, Zaio liana chata reithaina a cha hâ thlâh ha na; chhiesakhâhna cha nâ liata patlôpa a châ aw.
2
Hy thlahchhâna a theituhpa! Nâ lâta sapa zydua cha amâ vy aw.
3
Hmoparaonazy chata eina pahnie tyh tarawpa ta, eima paraona zy la nâ ta na pasi aw na.
4
Chyhsa, nâ chhyna-o dôhpachhôh tlyhmia liata a y thei awpa ta nâ tlypa, na kiapâh na pangaisapa cha a nohhlao na! Na o phana chata lôhrâtlôpa ta eima y aw, na chhyna-o su pathaihpa phana chata!
5
Hy maniah pachhatuhpa Khazohpa, hmo rarôh ypa zy ta a sia ngaitapa ta maniah nâ chhy aw, na kaokih liata chyhsa zydua nata tilaipi chô lâhlapi liata a ypa zy ngâpa cha na châ;
6
hmotaotheina ta chai a saihpa ta ano thatlôna tlâhzy a pa-ituhpa châna cha.
7
Tilaipi pyu paro ngâpa, a chatlaona pyu paro ngâpa zy, zawpi a tlaokalina a chalihsatuhpa cha na châ;
8
kaoki chhâna liata a pahrâpazy chhao chata na pahnosana zy cha chi tyh ei ta; my nata zâ puana zy cha thaphapa ta na pa-awsa tyh.
9
Alei he tly chi ta, ti ta pasa chi ta, thata na papha tyh; Khazohpa chavah cha ti ta bie ta; alei he cha hawhta nâ chhuahnoh tawhna chata ama châta sâh na taopa tyh.
10
Alei he a lei paliena tlâhzy cha ti hluhpi ta bao chi ta, aleizai byuhpa zy cha pahnaisa chi ta, vâsua ti ta panai chi ta, a pyuhpa zy cha byhnâ na pie tyh.
11
Kô cha na phana pakhôsa chi ta; na siena lâpi zy cha hmophapa ta a di a ngie tyh.
12
Râhpathohpa su liana zy chata a di tla ta, tlâhzy chhao cha thaphana ta chahrypa ta y ta,
13
sibiepa suzy cha sahroh zaw ta a biepa ta y ta, saikaozy chhao cha sâh ta khu khaipa ta y ta, thaphapa ta awh ei ta, hla ama sa hra.