Hlazy 32

¹ A hmoparaopa a ngiahthaipa ta y ta, a moleina khupa ta a ypa cha a nohhlao na.

² Chyhsa, ABEIPA ta hmoparaona hnei leipa ta a pachâpa, a thlahpa liata haidihaiduana rai a y leipa cha a nohhlao na.

³ Ei moleina palâhâh leipa ta ei y nona kha, ei rupazy cha châ khai ha ta nohnoh y ta ei roh tyh.

⁴ A chhô a zâ ta na ku ta na vaih tlôh ta; ei thatlôna chhao chhiah noh sa hawhta pua a chawh haw. Selah

⁵ Ei moleina cha nâ lâta cha pahnosa na ta, ei paraona kyh chhao nyu va na; “ABEIPA lâna cha ei hmoparaona ei palâhâh aw,” tah na ta; chatanachata ei moleina thai leina na vaw ngiahthai haw. Selah

⁶ Chavâta Khazohpa a pachâpa chyhsa to ta hmo naopa ta na y nota nâ lâta thlahchhâ ei se; tilaipizy cha a vaw khô tina chata, ano cha vao chachei aw vei.

⁷ Nâ cha ei nyuna su châ chi ta, nôpona tawhtapa na hrôhbieh aw chi ta; pachhana hlazy chata eina chadôsa tyh chi. Selah

⁸ Na siena awpa lâpi cha cha chho aw na ta, ei cha pachu aw; ei mo ta moh lymâna chôta ary ei cha raopa aw.

⁹ Pahnona hnei leipa arâzy nata sabaitu hawhta y kha u, chazy chhaichhi cha chalihsa nawpa ta chhâri nata daophina ri châ ta, chata leipa ta la na kiapâh lâta a vy aw veih ei.’

¹⁰ Hmoparaopa châna chata pachârôhna a hluhpi y aw ta; ABEIPA angiapâtuhpa zy deikua cha a zawngiahna ta tlao a chadô.

¹¹ Chyhsa siapa saih u, ABEIPA liana cha alypa ta thapha teh u, palôhrupa dopa saih u, thapha ngaitapa ta rahao teh u!