Luka 7

¹ Zawpizy theipa ta bie zydua a rei khai nahta Kapynia khih liata a ngia ta.

² Pheisaih zakha hyutuhpa sei kho ngaitapa ahy tlyma tlâh leipa ta, thi daihmâ ta.

³ Zisu thâtih a thei nahta, a hnohta a vypa ta nahta a sei patlâhpa ta hia awpa ta, Zu machâzy tuah ta.

⁴ Âmo cha Zisu lâ va tlô ei ta, phahnai khoh ngaitapa ta hiapa ta, “Ano chata he he na tao pa awpa tlai a châ,

⁵ eima phozy kyhpachâ ta, eima apakhyna o chhao ano ta maniah a sapa,” tah ei ta.

⁶ Zisu cha ama hnohta a vy ta. O a tlô chy ta, pheisaih zakha hyutuhpa chata a viasazy tuah ta, “Abeipa, a vy khoh khâ, o chhôh nâ ngiana tlâh chhao châ vei. Bie deita reih la, ei hawti cha a tlâh thlâh ha aw.

⁸ Kei chhao chyhsa ry ta a ypa châ na ta, ei ry ta pheisaihzy ama y hra: chyhsa pakha hnohta, ‘Sie la,’ tah na ta a sie tyh; a hropa hnohta, ‘A vy teh,’ tah na ta a vy tyh; ei sei hnohta chhao ‘He he tao teh’, tah na ta a tao ty,” tah ta.

⁹ Zisu ta cha cha a thei nahta a chôta a noâh ngâsâ ta, a heih ta, zawpi a zituhpazy hnohna chata, “Ei cha chho ei chuh, Izarelzy hry liata chhao he tlupo ta ngiapâna he hmô va na,” tah ta.

¹⁰ Chatawhcha a chyhsa tuapazy cha o lâ amâ di nahta, sei cha a tlâhpa ta hmô ha ei ta.

¹¹ Cha khai tawhna chata Nain khih liata a kei ngia ta, a pachupazy nata zawpi hluhpi chhao a hnohta sie hra ei ta.

¹² Khih hawka cha a vaw hnia nahta, chyhsa athihpa a vaw sy ei ta, a no cha nôhmeipa châ ta, a sawchapaw matlupa a châ, ama khih mo hluhpi chhaota a hnohta y ei ta.

¹³ Abeipa chata nôhmei cha a hmô nahta, ngiachhie kaw ta, ano hnohta, “Cha khâ,” tah ta.

¹⁴ A kei hnia ta, a syna cha hria ta, a sytuhpazy cha a duah ei ta. “Satliapa, thyu teh, ei cha tah na,” tah ta.

¹⁵ Athihpa cha a vaw tyuh ta, bie vaw reih ha ta. Zisu chata a nô hnohta pie ha ta

¹⁶ Ama zydua ta chi ei ta; Khazohpa reithai ei ta, “Eima hryta hrohsopa rôhnahpa a vaw y he!” tah ei ta, “Khazohpa ta a chyhsazy a vaw tly he!” tah hra ei ta.

¹⁷ Cha thâtih cha Zudia râh zydua liata nata râh zydua liata pathâh ha ta.

¹⁸ Cha bie zydua cha Zawhana pachupazy chata Zawhana chho ei ta.

¹⁹ Zawhana chata a pachupa pano aw ta, Abeipa lâna chata tuah ta, “A vy awpa cha na châ ma, chyhsa hropa eima hâ aw ma?” tahpa ta.

²⁰ Chyhsazy cha ano lâ ama kei tlô nahta, “Bâtituhpa Zawhana ta, ‘A vy awpa cha na châ ma, chyhsa hropa eima hâ aw ma?’ tahpa ta nâ lâta maniah a tuah,” tah ei ta.

²¹ Cha noh liana tlai chata Zisu ta hri-ohpa hluhpi nata chieh-leipazy nata ahripa patupazy a hluhpi patlâh ta, mochaopa hluhpi chhao mopavâna pie ta.

²² Ama hnohta, “Kua ula, hmo nama hmôpa nata nama theipazy he Zawhana va chho teh u: mochaopazy ama mo pavâ ta, pheisypazy phei ta sie ei ta, aphawhpazy pathaih ei ta, nahpâpazy nah pavâ ta, athihpazy pathyupa ta y ei ta, dyhchhiepazy hnohta Thâtihpha chhopa châ ta.

²³ Chatawhcha ahyrai ei chôta palôhcha leina a hnei leipa cha a nohlao na,” tah ta.

²⁴ Zawhana tuapazy cha ama kua nahta, Zisu ta zawpizy hnohta Zawhana thâtih reih pathao ta: “Khâpa mo awpa ta ma râhpathohpa lâ kha nama sie khaw? Lothi ziza ta a chalyupa ma?

²⁵ Cha leipa ta khâpa mo awpa tlaita ma namâ zu khaw? Poh-naipa ta a tobipa ma? Pachâ teh u, poh rôhnahpa a bupazy nata chyhsa hneirôhpazy cha abei ozy liata tlao ama y tyh.

²⁶ Cha leipa ta khâpa mo awpa ta ma nama zu khaw? Hrohsopa ma? A cha tlai kha, ei cha tah ei chu, hrohsopa hlâta a rôhnah viapa.

²⁷ Moh teh, ei lyuhchâpa na hmiakô liata ei tuah,ano chata na hmia lâta na lâpi a chhuahdy aw,’tahpa a thâtih ama ropa kha he chyhsa he a châ.

²⁸ Chanô sapa hry liata Zawhana hlâta a rôhnah viapa y veih ei; châhrasala Khazohpa Khihnarâh liata chyhsa chyh chaipa chhao, ano hlâta cha ama rôhnah via, ei cha tah ei chuh,” tah ta.

²⁹ Chyhsa zydua nata chhiekheituhpazy chata a bie reipa ama thei nahta Khazohpa thai pachâ ei ta, âmozy cha Zawhana hnohta bâti a châ chiehpazy ama châ;

³⁰ Pharisaizy nata Ryhpa pachutuhpazy chata âmo châta Khazohpa ryraona cha khoh veih ei, âmo cha a hnohta bâti a châ leipazy ama châ.

³¹ Zisu ta, “Atahmâ thyutliazy he khâpa nata e ei pakho aw tly, khâpa e ama lyu tly?

³² Hawti sôhdaona su liata a tyuh ta, âmo nata âmo a aw ngâpa he ama lyu,‘Ramo cha tôpa pi ta, la leipa eichi ta;cha chakhei pi ta, pachârôh tlôh eichi va,’tah ta.

³³ Bâtituhpa Zawhana cha a vy ta, viahchhâ nie leipa ta kresawti chhao doh leipa ta; nâmo ta, ‘Ahripa a hnei he,’ tah eichi ta.

³⁴ Chyhsa Sawchapawpa a vy ta, nie ta doh ta; nâmo ta, ‘Moh teh u, rihkawhpa nata kresawti parâpa, chhiekheituhpa nata moleipazy viasa huh!’ tah tlôh eichi ta.

³⁵ Châhrasala Khazohpa sona cha a saw zydua ta a do tahpa ama pasia haw,” tah ta.

³⁶ Pharisaizy hryta chyhsa pakha ta pati nie hrua ta, Pharisaipa o liana chata a ngia ta, pati doh ta.

³⁷ Cha khih liata chanô moleipa pakha chata Pharisai o liata pati dopa ta a tyuh tahpa a pahnopa ta nahta, alabasta sathaw rohpahâhpa ôh a vaw chei ta,

³⁸ a hnôh lâta a phei thaby liata chana chôta a duah ta, a mothlih ta a pheipazah padâ ta, a sâ ta hru ta, a pheipazah cha sy ta, sathaw rohpahâhpa hnia ta.

³⁹ A hruatuhpa Pharisaipa chata cha cha a hmô nahta a palôhrupa ta, “He chyhsa he hrohsopa a châ tlôh khiahta cha, a hriatuhpa chanô he ahy e a châ tahpa nata kheihawhpa chyhsa a châ tahpa a pahno thlyu awpa châ ta, ano cha moleipa chanô châ tlôh ta,” tah ta.

⁴⁰ Zisu ta a hnohta, “Saimaw, na hnohta bie kawh kha rei awpa ei hnei,” tah ta a chhy ta. Ano chata, “Khâpa maw, Pachutuhpa?” tah ta.

⁴¹ Zisu ta, “Tâkâ dyu a pacheisapa ahy tlyma chyhsa pano ta amâ bâhpa y ta; pakha ta tâkâ tlaw za pangawh a bâh ta, a hropa ta sypangawh.

⁴² Chatawhcha thôna ama hnei leipa vâta a ngiahthai rairieh ta. Chatanachata âmo hry liata ahyma ano kyh pachâ via aw?” tah ta.

⁴³ Saimaw chata, “Angiahthai hluh viapa cha a châ aw tahpa ei pangiasa,” tah ta a chhy ta. Ano chata a hnohta, “Na pasu na,” tah ta.

⁴⁴ Chanô lâ cha a heih ta, Saimaw hnohna chata, “He chanô he na hmô ma? Na hnohta a vaw ngia na ta, nâ ta ei pheipazah pasi nawpa ti na pie tlôh leipa chi ta, ano deikua chata a mothlih ta ei pheipazah padâ ta, a sâ ta hry haw ta.

⁴⁵ Nâ ta a sy rai na sy va chi, ano deikua heta ei vaw ngiapa ta nahta ei pheipazah a sypa bâh leipa ta.

⁴⁶ Nâ ta ei luh liata sathaw na thu leipa chi ta, ano deikua chata ei pheipazah liata sathaw rohpahâhpa a hnia.

⁴⁷ Chavâta ei cha chho chuh, a moleina hluhpi kha a ngiahthaipa ta a y haw, a kyhpachâna thata a palâsa hih; anodeikuacha a ngiahthaina chyhpa chata, kyh a pachâ chyh via tyh,” tah ta.

⁴⁸ Chatawhcha chanô hnohna chata, “Na moleinazy a ngiahthaipa a châ haw,” tah ta.

⁴⁹ A dolâhpazy ta, “Moleinazy chhao a ngiahthaipa he ahyma a châ tly?” a tah ei ta.

⁵⁰ Ano chata chanô hnohna chata, “Nâ ngiapâna ta a cha pachha hih; thlahlôhpa ta sie teh,” tah ta.;