Theihthaina 25

¹ ABEIPA ta Sinai Tlâh liata Mawsi chho ta.

² Izarel pathlazy chho la, ama hnohta, râh ei cha piepa ei nama tlô tita râh cha ABEIPA lâta pahânoh a ô hra aw.

³ Na lyu liata kô charu chhôh chi cheih aw chi ta, na kresadô cha kô charu chhôh chhawpa ta panyuhsa aw chi ta, a theilâpazy hria aw chi ta.

⁴ a kô sari kô deikua cha, râh châta pahânoh pahâna ABEIPA lâta pahâna châ aw ta; na lyu liata chi na cheih awpa châ leipa ta, na kresadô chhawpata na panyuhsa awpa châ hra vei.

⁵ Na sâh sawhlipa na hria awpa châ leipata, na mohôh leipa cha na lyu awpa châ vei, râh pahâna pathaihpa kô a châ aw.

⁶ Râh pahâ kô liatahpa cha nama nie chhyh châta a châ aw, na châta zy, na seichapaw nata na seichanô châta zy, châ hlaopa châta zy, na hnohta a ypa râh hropa chyhsa châta zy.

⁷ na viahchao zaw châta zy, na râh liata sahroh châta zy, cha liata a patheihpa zydua cha nie chhyhpa châta a châ aw.

⁸ Chatawhcha pahâ kô, kô sari cha reih aw chi ta, kô sari suh sari châ aw ta, pahâ kô, kô sari chhôh cha kô sypalih nata kô chaki châ aw ta.

⁹ Cha tawhta thla sarina noh hrawh noh ta chiahmie paro ngaitapa cha, nama patôsa awpa châ ta, aryhna noh liana chata nama râh zydua liata chiahmie nama patôsa awpa a châ.

¹⁰ Chatawhcha kô sypangawhna cha aly aw ei chi ta, râh chhôh zydua liata, cha liata a ypa zydua hnohta khotalaina kyh nama phuah awpa a châ; nama châta zubili châ aw ta, chyhsa to ta ama eih chyu ama hnei heih aw, chyhsa to ama chhôhkha chyu liata nama y heih aw.

¹¹ Cha kô sypangawhna cha nama châta zubili châ aw ta; khâpahmah chi cheih leipa aw eichi ta, a sawhlipa chhao la leipa aw eichi ta, kre mohôh leipa thei cha nama lyu awpa châ hra vei.

¹² Zubili châ tlôh ta; nama châta pathaipa châ aw ta; cha nama lyu liata apatheihpa cha nama nie awpa a châ.

¹³ “He zubili kô liana heta chyhsa to ta âmo eih tlai ama hnei heih chyu awpa a châ.

¹⁴ Na vaih hnohta khâpa tlyma zuapata, na vaih tawhta khâpa tlyma na chaleipa chhaota, namâ dô rairieh awpa châ vei.

¹⁵ Zubili tawhta a kô hluhzie lymâ hawhta na vaih hmo chalei aw chi ta, sâh kô veihna hluhna yzie ta na hnohta a zuah awpa a châ.

¹⁶ A kô hluhna yzie lymâ ta a ty cha papôh aw chi ta, chatawhcha a kô chyhna yzie lymâ ta a ty cha pahnai aw chi ta, sâh veihna kô hluhna yzie ta nâma lâta zuapa a châ aw.

¹⁷ Namâ dô rairieh awpa châ leipata, na Khazohpa cha na chi awpa a châ: Kei he ABEIPA nama Khazohpa cha, châ tlôh na ta.

¹⁸ “Chavâta ei bie raopazy cha zyhpata, ei pachiapazy cha a pyhpata, na chi awpa a châ; cha râh liana chata thlalôh ngaitapa ta nama pahrâ aw.

¹⁹ Râh chata a theilâpa pathei aw ta, rihbiepa ta y aw eichi ta, thlalôh ngaitapa ta nama pahrâ aw.

²⁰ ‘Cha khiahta a kô sari kô chata, khâpa eima nie aw, pachâ teh, khâpahmah chi cheih tlôh leipa pi ta, eima theilâpazy hria tlôh leipa aw pi ta?’ nama tah khiahtala.

²¹ a kô charu kô chata ei byhnâ nama chô liata patlôsa aw na ta, kô thôh chhôh châta a thei a pathei aw.

²² a kô charie kô chata, chi cheih aw eichi ta, a patheipa nama pachôpa a parohpazy cha nie aw eichi ta; kô chaki taihta a daih heihna taihta nama pachôpa a parohpazy cha nama nie awpa a châ.

²³ Chhâzaw ta râh cha nama zuah pathlah awpa châ vei, râh cha kei eih châ tlôh ta; khichhaipa ei hnohta a pahrâpa dei châ tlôh eichi ta.

²⁴ Nama râh pahrâhpa zydua cha chatlai lilaw awpata nama pasaih awpa a châ.

²⁵ Na unawhpa cha a sipasapa ta a râh thokha zuah sala, a heinawh a hnia chaipa ta a unawhpata a zuapa cha a vaw chatlai awpa a châ.

²⁶ Chyhsa ta a chatlai patuhpa awpa hnei leipata, vaw hneirôhpa ta chatlaina a hnei khiahtala.

²⁷ a zuapa rakha kô cha, a laichadai sala a zuana laibâhpa cha pakua mawh sy, chatanachata a râh cha a pahrâ heih aw.

²⁸ Ano chata a chatlai lilaw thei leipa khiahta deikua cha a zuah hawpa cha zubili kô taihta a chaleituhpa liana chata y mawh sy; zubili kô ta pua heih aw ta ano chata a râh cha a pahrâ heih aw.

²⁹ Kuh a hneipa khih liata o, chyhsa ta a zuah khiahtala, a zua rakha tawhta kô kha chhôh chata a chatlai heih thei aw; kô kha bohlo chhôh chata chatlai theina a hnei aw.

³⁰ Kô kha chhôhta a chatlai thei leipa khiahtala, kuh a hneipa khih liata o cha chhâzaw ta a pathlazy taih chhaota a chaleituhpa eih châ ha aw ta; zubili liata chhao pua hlei aw vei.

³¹ Kuh a hnei leipa khih liata ozy deikua cha, tlâh râh hawhta pachâpa châ aw ta; chatlai theipa châ aw ta, zubili liata a pua aw.

³² Anodeikuacha Livai sahlaozy khih, ama hneipa khihpa liata ozy cha, Livai sahlaozy chata, khatino raita ama chatlai thei aw.

³³ Chatawhcha Livai sahlao hry liatahpa ta a chatlai leipa khiahtala zuah hawpa o nata a hneipa khih cha zubili liata pua aw ta; Livai sahlaozy khih liata ozy cha Izarel pathlazy hry liata ama hneipa châ tlôh ta.

³⁴ Ama khih kiapâh liata lyuzy deikua cha, zuah theipa châ leipa aw ta; chhâzaw ta ama hneipa châ tlôh ta.

³⁵ Chatawhcha na unawhpa a sipasapa ta a châ vaw chhai khiahtala, na deichhy awpa a châ; khichhaipa na hnohta a ypa hawhta na paysa awpa a châ.

³⁶ Ano liata tâkâ tlyma, hmo tlyma, a pôhna la khâ, Khazohpa tlao chi teh; na unawhpa cha na hnohta a y thei nawpa ta.

³⁷ A pôhna a chadaipa ta na sôh dyu na pacheisa awpa châ leipa ta, a pôhna a chadaipa ta na niepazy dyu pacheisa hra khâ.

³⁸ Kei he ABEIPA nama Khazohpa Kana râh cha pietuh awpa nata nama Khazohpa châ awpa ta Izi râh tawhtapa châ chhituhpa ei châ.

³⁹ Chatawhcha na unawhpa a sipasapa vâta na hnohta a cha zua hnao khiahtala, sei hawhta na hmâh awpa châ leipa ta.

⁴⁰ a hlaopa hawhta nata na hnohta a pahrâ hrapa hawhta na hnohta a y awpa a châ. Zubili kô taihta a cha chakao aw.

⁴¹ cha khai tawhna chata nâ tawhtapa pua aw ta, ano nata a sawzy chhaota, âmo chhôhkha ualuapa liata a ngia heih aw ei ta, ama mahpawzy o nata lyu ama pahrâ heih awpa a châ.

⁴² Izi râh tawhtapa ei chhihthapa ei chakaotuhpazy châ tlôh ei ta; sei zuapa hawhta zuah awpa châ vei.

⁴³ Nôchhie ngaitapa ta ano liata ryu na rei awpa châ leipa ta, na Khazohpa cha na chi awpa tlao a châ.

⁴⁴ Seichapaw nata seichanô ta na hnei thei awpazy cha; nama chheipâh phopizy hry liata seichapaw nata seichanô châta na chalei awpa a châ.

⁴⁵ nama hry liata a pahrâpa râh hropa chyhsa nata nama râh liata a pihpa ama sanawhzy hry liatahpazy chhao nama chalei thei hra aw, chazy cha nâma chyhsa ama châ aw.

⁴⁶ Nâma hnôh lâta nama sawzy ryuto châta ama chyhsa ta ama hnei awpa ta tao aw eichi ta; cha hry liatahpazy cha, chhâzaw ta nama sei ta nama hnei aw; anodeikua cha nama unawhpa Izarel pathlazy liana chata nôchhie ngaitapa ta ryu nama reih awpa châ vei.

⁴⁷ Râh hropa chyhsa tlyma na hnohta a ypa ahy tlyma, vaw hneirôh sala, a kiapâh liata na unawhpa a sipasa sala, na hnohta râh hropa chyhsa tlyma, na hnohta a ypa hnohta tlyma, râh hropa chyhsazy pathla chhôhkhapa hnohta tlyma, a zua hnao khiahtala.

⁴⁸ a zua ha tawh chhaota chatlai heih theipa châ aw ta, a unawhpazy hry liatahpa ta chatlai thei aw ei ta,

⁴⁹ a paw unawhpa tlyma, a paw unawhpa sawchapawpa tlyma ta a chatlai thei aw, a chiheihzy hry liata a heinawh a hniapa tlyma ta chatlai thei aw ta; ano chhao a vaw hneirôh khiahtala chatlai thei aw ta.

⁵⁰ A zuanapa nata a zua ha tawhta zubili kô heih awpa a laichadai sala, a zuana mâ cha a kô yzie ta châ aw ta; chatawhcha a hlapa ta hruapa laichadaina yzie lymâ hawhta a laichadaipa a châ aw.

⁵¹ Kô hluhpi a byuh khiahtala, a chatlaina mâ cha bâhta chhâ â phuhpa hawhta a pakua heih awpa a châ.

⁵² Zubili kô tlôna awpa kô chyhta deita a y khiahtala, a laichadai ei sala, a yna kô hluhpa yzie ta chatlaina mâ a pakua awpa a châ.

⁵³ Kô kha lymâ ta a hruapa, a hlaopa hawhta a y awpa a châ; na mohmô liata nôchhie ngaitapa ta a chô liata ryu a reih awpa châ vei.

⁵⁴ Cha yzie hawhta chatlaipa a châ leipa chhaota, zubili kô chata pua aw ta, ano nata a sawzy chhaota.

⁵⁵ Izarel pathlazy cha keima chakaotuhpazy châ tlôh ei ta, Izi râh tawhtapa ei chhithapa nâ chakaotuhpazy ama châ: Kei he ABEIPA nama Khazohpa cha ei châ.