Habaku 3

¹ Shigionoth aozie ta hrohsopa Habaku thlahchhâna.

² Hy ABEIPA, na thâtih ama chhopa thei na ta, chi na ta. Hy ABEIPA, he kô chhôh liana heta na raihria pathieh heih la, he kô chhôhzy liana heta pahnosa mah y; pathi-iana liata zawngiahna pahlao tyh mah y.

³ Temana râh tawhta Khazohpa a vy ta, Mo pathaihpa cha Paran Tlâh tawhta. A rôhnahna ta avâzy khi pahly ta, a reithaina ta alei bie ta. Selah

⁴ A pathliezie cha khaihna hawhta châ ta; a ku tawhta khaihna nori hawhta vaw pua ta, cha liana chata a hmotaotheina anyupa ta a y.

⁵ A hmia lâta sie ta, patlâhna cha, a hnôh lâta pachie pathlie ngâ ta.

⁶ A duah ta alei chalyusa ta; mohmia pasaih ta, phozy cha ama thlah pazoh ta; tlâh hlôpazy cha papai ta, chhâzaw bypizy chhao a bôh ei ta. A lâpizy cha chhâzaw tawhtapa ta a châ.

⁷ Kusa poh-ozy cha riethei taopa ta ei hmô; Midia pohraipazy cha a chalyu ei ta.

⁸ ABEIPA cha chavahzy chô liata palôh châ leipa ta a y ha ma? Chavah chô liana chata na pathi-iapa ta, tilaipi chô liata na pathi a ia ma, nâ arâ, na pachhana talaili chô liata na kiah haw?

⁹ Amâ chiehpa a châ na, na libaw, phozy châta chhiesapa â i na. Selah Na patlaw haw alei cha chavahzy chhaota.

¹⁰ Tlâhpizy ta cha hmô ei ta, ama cha chi; chalâhparâpazy chhao lytlâh ama khô haw; ti thu ngaitapazy ta ao ama papua, a sâh ngaitapa liata a bâh a pazawh haw.

¹¹ Noh nata thlâpâ ama dua, âmo su liata, na châtai a zawpa khaina liata nahta, na asei pathlie ngâpa liana chata

¹² Pathi-iapa ta lyurâh tly khai chi ta, hiehâhpa ta phozy na chapia.

¹³ Na chyhsazy pachha nawpa ta na pua, na sathaw thupa pachha nawpa ta Moleipa o cha pacho chi ta, a bohna a lâna taih na tao. Selah

¹⁴ Na chôhchahrei ta a luh hmah na paphaosa, ano zituhpazy cha thlihpipa ta a phaoh khai ei, ama pakah â ei ta, chyhsa rietheipa zy cha ama nie khai.

¹⁵ Na arâ ta tilaipi na sao, chalâhparâpa ru ngaitapa tlai cha.

¹⁶ Ei thei nahta ei chhorupa ta ei chalyu, a ao ta ei hmao a chakhy; ei ru hmy ta, ei su liata a chalyu na ta, Atymâna noh cha hâ na ta, zawpizy ta chariahpa amâ dyuhpa hawhta.

¹⁷ Theiku kô pawh vei hra sa, krezô pathei vei hra sa, ôli tho chhao pathei leipa ta, lyu ta niepa papua vei hra sa, sahdô tawhtapa sahroh zaw pahleipa ta, sahroh o liata sahroh y vei hra sa,

¹⁸ ei ly lymâ aw ABEIPA liata, ei pachhana Khazohpa liana chata khâ ei ly aw.

¹⁹ Abeipa, KHAZOHPA ei thatlôna; ei phei a tao, sakhi phei hawhta, ei su sâhpa lia na chareisa aw.