Athaona 11

¹ Chatawhcha chyhsa zydua cha reih miakha nata biereizie miakha châ ta.

² Chatawhcha chyhsazy cha nochhi lâchhâh ta amâ pasie laih no ta, Shinara râh liata bypi hmô ei ta; cha liana chata pahrâ haw ei ta.

³ Âmo nata âmo liata, “Â vy teh u, beihlei tlozy tao ei sihla, rao ei suh vy,” a tah chyu ei ta. Chatanachata alô vyuhpa ta beihleitlo raopa hnei ei ta, a baipâna châta chiatlao hnei hra ei ta.

⁴ Chatawhcha âmo chata, “Avy teh u, khihpi tao ei sihla, o sâhpa a laki avâ daih awpa ta sa ei sihla, eima moh pathâhsa ei suh vy, chata leipa ta la alei chô zydua liana heta papaipa ta eima y pathlei aw na,” a tah ei ta.

⁵ Chatawhcha ABEIPA cha chyhsa sawzy ta, khihpi nata o sâhpa ama sapa cha moh awpa ta a zu ta.

⁶ ABEIPA chata, “Moh teh u, chyhsazy cha pôhkha châ ei ta, ama zydua ta reih miakha hmâh tlôh ei ta; he hmo he tao a chhuahpa he pakhâ theipa rimâ châ khao aw vei.

⁷ A vy ula, zu ei sihla, reih amâ pahno thei khao leipa ta, ama reih za pananopa ei suh vy,” tah ta.

⁸ Chatanachata ABEIPA chata âmo sahlao cha, cha su tawhna cha alei zydua lâna chata papai ta, ama khihpi sapa cha bâsai ei ta.

⁹ Chavâta â mo cha Babel tah ei ta, ABEIPA ta cha liana chata alei liata chyhsa zydua reih cha a panano khai hawpa vâta; cha tawhna chata ABEIPA ta âmo sahlao cha alei chô zydua liana cha papai haw ta.

¹⁰ Hezy he Sema pathlazy a châ. Sema cha kô za khapa châ ta, tipa-ua hnôhlâ kô no rakha liana chata sawchapawpa Arapasa sa ta.

¹¹ Arapasa a sa tawhta Sema cha kô za pangawh hroh heih ta, sawchapawzy nata sawchanôzy hropa sa heih ta.

¹² Arapasa chata kô sythôh nata kô pangawh a châ nahta sawchapaw Shelah sa ta.

¹³ Shelah a sa tawhna chata Arapasa cha kô za palih nata kô thôh hroh heih ta, sawchapawzy nata sawchanôzy hropa sa heih ta.

¹⁴ Shelah chata kô sythôh a châ nahta sawchapaw Ebera sa ta.

¹⁵ Abera a sa tawhna chata Shelah cha kô za palih nata kô thôh hroh heih ta, sawchapawzy nata sawchanôzy hropa sa heih ta.

¹⁶ Ebera chata kô sythôh nata kô palih a châ nahta, Peleka sa ta.

¹⁷ Peleka a sa tawhna chata Ebera cha kô za palih nata kô sythôh hroh heih ta, sawchapawzy nata sawchanôzy hropa sa heih ta.

¹⁸ Peleka chata kô sythôh a châ nahta Reu sa ta.

¹⁹ Reu a sa tawhna chata Peleka cha kô za no nata kô chaki hroh heih ta, sawchapawzy nata sawchanôzy sa heih ta.

²⁰ Reu chata kô sythôh nata kô no a châ nata, Seruka sa ta.

²¹ Seruka a sa tawhna chata Reu cha kô za no nata kô sari hrih heih ta, sawchapawzy nata sawchanôzy hropa sa heih ta.

²² Seruka chata kô sythôh a châ nahta Nahaw sa ta.

²³ Nahaw a sa tawhna chata, Seruka cha kô za no hroh heih ta, sawchapawzy nata sawchanôzy sa heih ta.

²⁴ Nahaw chata kô syno nata kô chaki a châ nahta, Tera sa ta.

²⁵ Tera a sa tawhna chata Nahaw cha kô za kha nata kô hrawhleichaki hroh heih ta, sawchapawzy nata sawchanôzy hropa a heih ta.

²⁶ Tera chata kô sysari a châ nahta Abara zy, Nahaw zy, Harana zy sa ta.

²⁷ Hezy he Tera pathlazy ama châ. Tera chata Abara zy, Nahaw zy, Harana zy sa ta; Harana chata Lawta sa ta.

²⁸ Harana cha a pina râh Kaldia sahlao khih Ur liata a paw Tera hmiakô ta thi ta.

²⁹ Chatawhcha Abara nata Nahaw chata lahpinô hnei ei ta; Abara lahpinô moh cha Sarai châ ta, Nahaw lahpinô moh cha Harana sawchanônô Milka a châ. Harana cha Milka nata Isaka paw a châ.

³⁰ Chatawhcha Sarai cha saw leipa chanô châ ta, saw rai hnei leipa ta.

³¹ Tera chata a sawchapawpa Abara zy, a samohpa Lawta, Harana sawchapawpa zy, a myuhnô Sarai, Abara lahpinô zy a chhi ta, Kildia sahlao khih Ur tawhna chata Kana râh lâ sie awpa ta hmaohkha ta pua ei ta, Harana khih tlô ei ta, cha liana cha pahrâ ei ta.

³² Tera hro nohzy cha kô za no nata kô pangawh châ ta; chatawhcha Harana khih liata thi ha ta.