Ryhpachaneina 1

Учиться

   

1 He biezy he Zawdâh nochhi lâ râhpathohpa Paran nata Tophel nata Laba nata Hazerô nata Dizaha likawh ta Supha daih lâ, Arabah liata Mawsi ta Izarel chyhsa zydua hnohta a reipa cha a châ.

2 Hôriba tawhta Kadesabania cha Seira Tlâh lâpi lâta noh hrawhleikha siena a châ.

3 Chatawhcha kô sypalih thla hrawhleikhana, cha thla noh kha noh liana chata, ABEIPA ta âmo chho awpa ta bie a piepa hawhpa zydua cha Izarel pathlazy hnohta Mawsi ta reih ta.

4 Hesbaw liata a ypa Amawri sahlao abeipa Sihaw nata Edrei nata Astro liata a ypa Basana abeipa Ôka a thi tawhta.

5 Zawdâh nochhi lâ Môaba râh liata he ryhpa he Mawsi ta phuah pathao haw ta.

6 ABEIPA eima Khazohpa chata Hôriba liata bie maniah chho ta. ‘He tlâh liana heta bohpi y haw eichi ta.

7 a pasie bâ ula. Amawri sahlao tlâh râh liata nata a chheipâh zydua Arabah liata zy, tlâh râh liata bypi râh liata zy, Neke râh liata zy, Kana sahlaozy yna tilaipi kiah liata nata Lebanaw liata zy, vahpi Euphrate chavah taihta sie teh u.

8 Moh teh u, râh cha ei cha pie haw ei hih; nama mahpaw Abaraha zy, Aisika zy, Zakaw zy nata ama hnôh lâta ama pathla pachhuahzy hnohta chhiesapa ta ABEIPA ta a piepa râh cha kei pahrâ teh u,’ tahpa ta.

9 Cha nona chata nama hnohta, ‘Keima deita ta cha cha pahnie leipa ei na ta.

10 ABEIPA nama Khazohpa chata cha papôh ei ta, atahmâ he nama hluhna lâ cha avâ awhsi zie tlaita vaw châ haw eichi ta.

11 ABEIPA nama mahpawzy Khazohpa chata atahmâ hlâta a lie sâh ta cha papôh ei sala, a châ taihpa hawh ei ta, byhnâ cha pie ei se.

12 Kheihta e keima deita ta namâ tymâna zy, nama phaohri zy, namâ hryusina zy cha ei phaoh thei aw.

13 Nama pho hry liatahpa chyhsa sopa aryhna a pahnopa, yzie a pahnopa chyhsazy a tlyh ula, nama chô liata hyutuhpa ta ei tao aw na,’ tahpa ta cha chho ei na ta.

14 Nâmo ta, ‘Na reipa cha eima châta a pha kaw na,’ tahpa ta nâ chhy eichi ta.

15 Chatanachata nama pho hyutuhpazy cha a pyh na ta, nama pho hry liatahpa chyhsa sopa, aryhna a pahnopa chyhsazy, nama chô liata hyutuhpa ta tao na ta, a sâhzy chô liata hyutuhpazy, a zazy chô liata hyutuhpazy, sypangawhzy chô liata hyutuhpazy, pahrawhzy chô liata hyutuhpazy, pawhrâhpazy chhao.

16 Cha nona chata nama ryureituhpazy cha, ‘Nama unawhpazy likawh liata bie cha nahthliepa ula, unawh nata unawh likawh liata nata râh hropa chyhsa a ylâhpa nata ama likawh liata a sia ngaitapa ta ryureih teh u.

17 Ryureina liata pathlua hlei hnei awpa châ vei; chyhsa nawhpa nata chyhsa laipa miakha ta nama nahthliepa awpa a châ; ahyhmah nama chi awpa châ vei, ryureina cha Khazohpa eih châ tlôh ta; nama châta bie ru tupa cha kei lâta vaw tlôkhei tyh aw eichi ta, cha cha ei vaw nahthlie tyh aw,’ tahpa ta bie pie na ta.

18 Cha nona chata hmo nama taonazie awpa zydua liata bie cha pie ei na ta.

19 ABEIPA ta bie maniah a piepa hawhta Hôriba tawhna chata pua pi ta, Amawri mo tlâh râh lâpi lâta râhpathohpa kawh ngaitapa nata rarôh y ngaitapa nama hmôpa kha, sie pahlie khai pi ta; Kadesabania khih kei tlô pi ta.

20 Chatawhcha nama hnohta, ‘ABEIPA eima Khazohpa ta maniah a piepa Amawri mo tlâh râh cha vaw tlô haw eichi ta.

21 Moh teh u, ABEIPA nama Khazohpa ta râh cha a cha pie haw ei; khy ula, ABEIPA nama mahpawzy Khazohpa ta a vaw rei hawpa hawhna khata pahrâ teh u; chi khah u, riahchhiepa ta y hra khah u,’ tah na ta.

22 Chatanachata ei hnohta a vykhai eichi ta, ‘A râhzy kei mohparupa ta eima khyna awpa lâ lâpi nata eima siena awpa khih thâtihzy, maniah a vaw chho heih awpa ta eima hmiakô lâta chyhsa tuah ei sihla,’ tah eichi ta.

23 Cha chata na palysa kaw ta, nama hry liatahpa chyhsa pahrawhleino, pho kha liata pakha lymâ atlyh na ta;

24 pua haw ei ta, tlâh lâna chata kiah ei ta, Eskawl Saikao kei tlô ei ta, mohparu khai ei ta.

25 Cha râh liata theilâpazy cha lyu ei ta, vaw cheih ei ta, thâtih maniah vaw chho ei ta, ABEIPA eima Khazohpa ta râh maniah a piepa cha a pha ngaita,’ tah ei ta.

26 Châhrasala khy khoh leipa eichi ta, ABEIPA nama Khazohpa biepiepa cha aty sai eichi ta;

27 nama poh-ozy liata paphôh eichi ta, ‘ABEIPA chata maniah â haopa vâta maniah pahleipadia awpa ta Amawri mozy ku liata pie awpa ta Izi râh tawhtapa maniah a chhihtha.

28 Khataihlâ cha ma eima khy aw? Eima unawhpazy chata, “Chyhsa cha keimo hlâta lai viapa ta sâh via hra ei ta; khihzy lai kaw ta, avâ phana taihta kuh chhao a hnei; Anaki pathlazy chhao hmô hra pi ta,” tahpa ta eima pathipalôh riahpachhie ei ta,’ tah eichi ta.

29 Chatawhcha kei ta nama hnohta, Thlah zoh khah u, âmo cha chi hra khah u.

30 ABEIPA nama Khazohpa cha chhihthatuhpa chata Izi râh liata a cha taopa hawpa zydua hawhna khata châ dyuhkhei aw ei ta.

31 râhpathohpa liata chhao chyhsa ta a saw a pihpa hawhta nama Khazohpa chata he su nama tlôna taihta, lâpi tlykha ta a cha pipa ei, nama hmôpa kha,’ tah na ta.

32 Cha chôna chhaota nama poh-o paraina awpa cha tluapa awpa naht.

33 nama lâpi cha pahmô awpa ta zâ ta mei ta, nohchhô ta ameih ta cha chhihthatuhpa ABEIPA Khazohpa cha ngâ leipa eichi ta.

34 ABEIPA ta nama bie reipa cha thei ta, a hiehâh ta.

35 He chhâ molei ngaitapa liatahpa heta cha pakha hmahta ama mahpawzy pie awpa ta chhie ei sapa râh pha ngaitapa cha hmô leipa aw ei ta.

36 Zephune sawchapawpa Kaleba deita leipa ta cha; anodeikua cha a hmô aw, a kei tlypa râh cha ano nata a sawzy ei pie aw, ano chata ABEIPA cha liahsa a zipa vâta!’ tahpa ta chhie sa ta.

37 Nâmo vâta ei chô liata chhao ABEIPA cha a pathi-ia ta, ‘Nâ chhao he cha liana chata a ngia leipa aw chi ta;

38 cha chakaotuhpa Nuna sawchapawpa Zawsua he cha â ngia aw; ano he pasyu teh, Izarel sahlaozy cha a patosa aw.

39 Nama sawnawh chyhpa ta hraona ta ama la aw nama tahpa nahta atahmâ a chhie nata a pha a pahno leipa nama sawzy he a ngia aw ei ta, âmo cha pie aw na ta, ama hnei aw.

40 Nâmo deikua cha a pasie ula Tilaipi Saihpa lâta râhpathohpa liata sie teh u,’ tahpa ta.

41 Chatawhcha nâmo ta, ‘ABEIPA chô liata eima vaw molei ha na; khy aw pi ta, ABEIPA eima Khazohpa ta bie maniah a piepa zydua hawhta eimâ dyuh aw na,’ tahpa ta nâ chhy eichi ta. Adyuhna chhaichhi a tobi chyu eichi ta, tlâh lâta khypa cha hmo chyhpata ta pachâ eichi ta.

42 ABEIPA ta ei hnohta, ‘Khy khah u, adyuh hra khah u, nama hry liata y tlôh lei khâh na ta; nama khakhaipazy chata ama cha vaw thie pathlei aw na, ama hnohta tah teh,’ na tah ta.

43 Cha chho ei na ta, apyh leipa eichi ta; ABEIPA biepiepa cha tlao aty sai eichi ta; tlâh lâna chata khy raruah eichi ta.

44 Tlâh liata a ypa Amawri mo chata cha vaw dyuh ei ta, akheih chyhsa a chadaipa hawhta châ vaw chadai ei ta, Seira tawhta Hômah taihta cha thie lymâ ei ta.

45 Vaw kua heih eichi ta, ABEIPA hmiakô liata cha eichi ta; châhrasala ABEIPA chata nama ao cha nahthlie khoh leipa ta a nah chhao pachôh khoh leipa ta.

46 Chatanachata cha liata nama y chhôh cha pachâpa ta Kadesa liata bohpi nama y.