2 Samuel 23

¹ Hezy he Davi bie rei hnôh chaipa a châ: Zese sawchapawpa Davi, a sâh ngaitapa ta pasâhsapa, Zakaw Khazohpa sathaw thupa, Izarel zy hla ngia ngaitapa a phituhpa chata a reih:

² “ABEIPA Thlahpa chata keima na hmâpa ta reih ta,a bie cha ei palei liata vaw y ta.

³ Izarel zy Khazohpa chata reih ta, Izarel zy Lôpanô chata: Chyhsa chôta a sia ngaitapa ta ryu a reih tyhpa, Khazohpa china chôta ryu a reih tyhpa cha,

⁴ noh vaw chhi ta, meihdo y chachei leipa my pavâhpa hawhna he châ aw ta, vâsua khai tawhta a pathaihpa alei liata sibiepa panyupa hawhpa he a châ aw.

⁵ Eima chhôhkha cha Khazohpa hnoh tahpa châ vei mâ? Chhâzaw biehrai ei hnohta hraih ta, a to siapa nata khâchâ pa-ipa ta Ei pachhana kipa nata ei lôkhopa kipa paysa aw vei mâ?

⁶ Hmoparaopa zy deikua cha ama zydua ta tlyhnypa a hloh hawhta châ aw ei ta, ku ta la awpa châ tlôh ei va.

⁷ a hriatuh awpa chata thua nata asei bi hmâ awpa châ ta, chatanachata ama su liata mei ta rao khaipa ama châ aw, tahpa ta na chho ta,” tah ta.

⁸ Hezy he Davi pheisaih riahphapa mohzy cha a châ: Takhemaw chyhsa Zôsebasebe cha pheisaih hyutuhpa zy pathôh hry liata hyutuh chaipa châ ta; ano cha ei khata chyhsa za charie a thietuhpa a châ.

⁹ Chatawhcha a pazipa cha Ahôhi sawchapawpa Dôdô sawchapawpa Eliaza châ ta. Cha chyhsa cha Philistina mozy adyuh awpa ta pôhpakhypa ta pahao ei ta, Izarel mozy ama pai khai nota Davi hnohta pheisaih riahphapa pathôh hryta pakhapa kha a châ.

¹⁰ Ano cha thyu ta a ku si ta, a zaozi chhao pathlie thei khao leina taihta Philistina mozy cha thie ta; cha noh liana chata ABEIPA ta thata âmo pahniepa ta; zawpi zy cha a hnôh lâta hraona hmo la awpa deita ta vaw kua heih ei ta.

¹¹ Chatawhcha cha a pazipa cha Hara chyhsa Aki sawchapawpa Shamah châ ta. Chatawhcha abie phi kaluna su liata Philistina mozy cha la a chhuahpa ta a pahmaoh ei ta; chatawhcha zawpi zy chata Philistina mozy cha a râpai sai ei ta.

¹² Chârasala ano cha cha su liana chata a duah ta, liahsa vaih ta, Philistina mozy cha thie ta; ABEIPA ta âmo châta thata pahnie pa ta.

¹³ Chatawhcha pheisaih riahphapa sythôh hry ta pathôh cha zu ei ta, sâhhria no tlaita Davi lâta Adula lôpu lâta sie ei ta, Philistina pheisaih sahlao chata Rephai saikao liata riehmo tao ei ta.

¹⁴ Cha nona chata Davi cha kuh liata y ta; Philistina pheisaih sahlao cha Bethlehe liata y ei ta.

¹⁵ Davi chata ti khoh ngâsâ ta, “Bethlehe liata tikhaorei ti kuh ochhi kiapâh liatahpa kha do awpa ta na piepa ama y mawh sala!” tah ta.

¹⁶ Chatanachata pheisaih riahphapa pathôh chata Philistina pheisaih sahlao cha chatôh pathla ei ta, kuh chhikao kiapâh liata Bethlehe liata tikhaorei cha kei thaihpa cheingei ei ta, Davi lâ vaw khei ei ta. Châhrasala doh khoh leipa ta; ABEIPA chata tlao patlai ta.

¹⁷ “Hy ABEIPA y, he he ei tao lei awpa zie cha thi ngâhpa ta a siepa zy thisaih cha ei doh aw mâ?” tah ta. Chavâta doh khoh leipa ta. Cha hmo zy cha pheisaih riahphapa zy pathôh chata ama tao.

¹⁸ Zeruia sawchapawpa Zôaba unawhpa Abisai cha ama pathôh hry liata hyutuhchaipa châ ta. A asei ta chyhsa zathôh cha thyuhnao ta, thie ta, pathôh hry liana chata moh phana to ta.

¹⁹ Pathôh hry liana chata palyupalih tlâh chaipa châ vei mâ? Chavâta ama hyutuhpa ta tao ei ta; châhrasala hnôh chaipa pathôh hry ta reipâpa châ vei.

²⁰ Kabzel chyhsa riahphapa sawchapawpa Zehôiada sawchapawpa Benai, hmo thata a taotuhpa cha ta; Môaba chyhsa riahphapa pano cha thie ta. Chatawhcha zu ta, dâhaw tla daihti nota khaotlô liata chakeibarôhneipa thie hra ta.

²¹ Chatawhcha Izi chyhsa hmiphapa thie ta. Izi chyhsa chata asei chaba ta, châhrasala ano chata chôhchahrei chabapa ta za pangai ta, Izi chyhsa asei chabapa cha chhu ta, ano cha a chô sao haw ta.

²² Zehôiada sawchapawpa Benai chata cha hawhpa hmo cha a taopa vâta pheisaih riahphapa pathôh hry liana chata moh phana a to.

²³ Chyhsa sythôh hlâta cha palyupalih tlâh châ ta, châhrasala chônô chaipa pathôh hry liata reipâpa châ vei. Chatawhcha Davi chata ano a vaihtuhpa hyutuhpa ta soh ta.

²⁴ Zôaba unawhpa Asahel cha sythôh hry liata pakha cha châ ta; Bethlehe khihpa Dôdô sawchapawpa Elhana zy,

²⁵ Harô chyhsa Shamah zy, Harô chyhsa Elika zy,

²⁶ Palti chyhsa Heleza zy, Tekô chyhsa Ikesa sawchapawpa Irai zy,

²⁷ Anathô chyhsa Abiza zy, Husatha chyhsa Mebunai zy,

²⁸ Ahô chyhsa Zalmaw zy, Netôphah chyhsa Maharai zy,

²⁹ Netôphah chyhsa Banah sawchapawpa Heleba zy, Benzami pathla Kibia khihpa Ribai sawchapawpa Itai zy,

³⁰ Pirathô chyhsa Benai zy, Kasa liata vatiepa zy liatahpa Hidai zy,

³¹ Arba chyhsa Abialbô zy, Barahu chyhsa Azamave zy,

³² Shaalbô chyhsa Eliaba zy, Zase sawchapawpazy hry ta Zawnatha zy,

³³ Hara chyhsa Shamah zy, Hara chyhsa Shara sawchapawpa Ahiama zy,

³⁴ Maaka chyhsa Ahasabai sawchapawpa Eliphelei zy, Kelô chyhsa Ahithôpel sawchapawpa Eliama zy.

³⁵ Kamel chyhsa Hezrô zy, Atabi chyhsa Parai zy,

³⁶ Zôbah khihpa Natha sawchapawpa Zôaba chariah chhaichi a chabatuhpa Amawna chyhsa Zale zy, Berô chyhsa Naharai zy,

³⁸ Ithari chyhsa Ira zy, Ithari chyhsa Kera zy,

³⁹ Hiti chyhsa Uriah zy ama châ; ama zydua ta sythôh nata pasari ama châ.