2 Thatihzy Rona 13

¹ Zerôbaw kô hrawhleicharie a bei kô ta Zudah sahlao chô liata Abizah a bei pathao ta.

² Zerusale liata kô thôh a bei ta, a nô moh cha Mikhai, Kibia chyhsa Uriel sawchanônô a châ. Abizah nata Zerôbaw cha adyuh ei ta.

³ Abizah chata pheisaih adyuhpa chyhsa, chyhsa riahphapa thy sypalih atlypa nata a kei dyuh ei ta Zerôbaw chata chyhsa thatlôpa riahphapa a tlyhpa thy sycharie a paziahpa ta a vaw dyuh ta.

⁴ Abizah cha Ephrai tlâh râh liata Zemarai Tlâh liata a duah ta, “Hy Zerôbaw zy, Izarel sahlao zydua ta vaw nahthlie teh u!

⁵ ABEIPA Izarel zy Khazohpa chata Izarel râh cha Davi nata a sawchapawpa zy cha biehraipa ta chhâzaw châta a pie tahpa a pahno awpa châ vei eichi mâ?

⁶ Châhrasala Neba sawchapawpa Zerôbaw, Davi sawchapawpa Sawlawmaw chakaotuhpa cha a zibeipa chô liata a vaw ty haw ta,

⁷ Rehôbaw cha hawti châ ta, a palôhrupa pachyu leipa ta a pakhâ thei vei nona khata Sawlawmaw sawchapawpa Rehôbaw chakhiapa ta chyhsa dyutlai leipa sahlao hmoparaopa zy a pahmaohpakhy ei ta.

⁸ “Davi sawchapawpa zy liana heta ABEIPA khihnarâh cha adyuh theipa ta a pangiasa eichi ta, a hluh chhao hluh kaw eichi ta, Zerôbaw ta khazoh châta a cha taopapa ei ngôh viahchao taw nohthlahpa zy chhao nama hnohta y hra ta,

⁹ ABEIPA theihthaipa Arawna sawchapawpa zy nata Livai mozy cha papuapa ta râh hropa chyhsa zy taonazie hawhta theihthaipa nama taopa châ vei mâ? Chatanachata viahchao tôh dawpa nata mietahkupa tôhpa pô sari ta a vaw hlâpa maihzy cha khazoh a châ leipa theihthaipa châ thei lymâ ei ta.

¹⁰ Châhrasala keima la ABEIPA cha eima Khazohpa châ ta, ano cha a heisai leipa pi ta ABEIPA châta chakaotuhpa âmo rai chyu a hriapa Arawna sawchapawpa theihthaipa zy nata Livai sahlao zy hnei pi ta.

¹¹ Noh chareih nata zâ chareih ABEIPA châta rohpahâhpa hlâna zy, rohpahâhpa zy rao tyh ei ta, viahchhâ sopa chhao tlâhkhai pathaihpa liata a siapa ta soh tyh ei ta, zâlâ maihta rao awpa ta ngôh meiôh sona a meiôh zy chhaota; keimo ta la ABEIPA eima Khazohpa biepiepa cha a ngiah pi ta, nâmo deikua cha ano cha namâ heisai haw.

¹² Khazohpa cha maniah chhihthatuhpa ta eima hnohta y ta, a theihthaipa zy ama chiahmie ta nâmo papua awpa ta to awpa ta y hra ei ta. Hy Izarel pathlazy saih u, nama mahpaw zy Khazohpa cha adyuh chachei ta khah u; thlao a chhi aw veih eichi,” tah ta.

¹³ Châhrasala Zerôbaw chata ama hnôh lâta a ru lâta pabyhsa ta; Zudah zy hmia lâta y ei ta, a ru lâta a byhtuhpa zy cha ama hnôh lâta y ei ta.

¹⁴ Zudah zy cha amâ heih nahta chariah cha ama hnôh lâ nata hmia lâta y ei ta; ABEIPA cha pado ei ta, theihthaipa zy chata chiahmie zy tô ei ta.

¹⁵ Chatanachata Zudah zy cha thata awh ei ta, cha hawhta Zudah zy ta ama aw nahta cha Abizah nata Zudah sahlao hmiakô liana chata ABEIPA ta Zerôbaw nata Izarel sahlao zydua cha panawh haw ta.

¹⁶ Izarel pathlazy cha Zudah sahlao hmiakô liana chata a râpai ei ta, Khazohpa ta ama ku liata pie haw ta.

¹⁷ Izarel chyhsa atlyhpa thy sypangawh thie ei ta.

¹⁸ Cha nona chata Izarel pathlazy nawhna zie cha cha hawhna cha a châ. Zudah pathlazy chata ABEIPA ama mahpaw zy Khazohpa ama ngâpa vâta pahnie haw ei ta.

¹⁹ Abizah chata Zerôbaw cha a chadai ta a khihzy lapa ta, Bethel a khichapeizy chhaota, Zesanah a khichapeizy chhaota, Ephraw a khichapeizy chhaota.

²⁰ Abizah a bei no chhôh liana chata Zerôbaw ta aduah heina hnei khao vei; ABEIPA ta hrie ta thi haw ta.

²¹ Abizah deikua cha thatlô rilipa ta y ta. Lahpinô pahrawhleipalih hnei ta, sawchapaw syno nata pano nata sawchanô pahrawhleicharu sa ta.

²² Abilah thâtih hropa zy nata a yzie zy, a bie reipa zy cha hrohsopa Idô thâtih bu liata ropa a châ.