1 Samuel 15

¹ Samuel chata Sawla hnohta, ”ABEIPA ta a chyhsa Izarel mozy chô liata abei châta sathaw cha thu awpa ta eina tuah; chatanachata ABEIPA bie reipa ao cha nahthlie teh.

² Pheisaih zy ABEIPA chata, ‘Amale mozy ta Izarel mozy chô liata ama hmotaopa Izi râh tawhta ama pua no ta, ama pakhâna zie zy kha ngia thlâh ha na ta.

³ Amale mozy adyuh awpa ta sie la, ama hmo hneipa zydua pahlôh leipa ta, pahleipadia khai teh; a chanô, a chapaw nata hawsaih zy, sâhpi angiapâ pazy, viahchao tôhpa zy, mietahkupa zy, râraoseihpa zy, alâ zy chhaota thie khai mah y,’ a tah,” tah ta.

⁴ Sawla chata zawpi zy aw ta, Telai khih liata reih ta, phei ta siepa thy syno nata Zudah chyhsa thy kha châ ei ta.

⁵ Sawla chata Amale mo khih cha za tlô ta, saikao liata a byhkhâ ta.

⁶ Sawla chata Keni mozy hnohta, “Vaw pua ula, Amale mozy hry tawhtapa he a panano teh u, cha leipa ta la ei cha thiepâ pathlei aw na; nâmo la Izarel pathla zydua Izi râh tawhta ama vaw pua nona khata vaw ngiachhi tlôh eichi ta,” tah ta. Chatanachata Keni mozy cha Amale mozy hry tawhtapa pua haw ei ta.

⁷ Sawla chata Amale mozy cha Havila tawhta Izi râh daih lâ Shura taihta adyuh ta.

⁸ Amale mozy beipa Akaka cha a hrohpa ta patu ta, zawpi zydua cha zaozi ta chhawh sao khai ta.

⁹ Anodeikuacha Sawla nata zawpi zy chata Akaka pahlôh ei ta, mietahkupa phapa zy, viahchao tôhpa a phapa zy, athawpa zy, mietahkupa tawzy, a phapa maih chhaota, chazy cha thie khoh leipa ei ta; a pha leipa nata ama kho leipa mai deikua cha thie khai ei ta.

¹⁰ ABEIPA bie cha Samuel hnohta vaw tlô ta.

¹¹ “Sawla abei ta ei raopa ei ngiapachhi na; eina zi haipa cha hnôh na chhypa ta, ei biepiepa hawhta tao tlôh lei khâh ta,” tah ta. Samuel cha a pathi-ia ta; zâkhihdei ta ABEIPA cha pado ta.

¹² Samuel cha Sawla dy awpa ta mydi ta thyu ta; “Sawla cha Kamel lâta sie ta, cha liana chata athei thlâh hana alô bô ta, kua heih ta, sie lymâ ta, Kilkal lâta zu ta,” tahpa ta Samuel chhopa châ ta.

¹³ Samuel cha Sawla lâta sie ta. Sawla chata a hnohta, “ABEIPA ta byhnâ cha pie mawh sy; ABEIPA biepiepa hawhta ei tao,” tah ta.

¹⁴ Samuel chata, “Cha mietahkupa a sâhpa ei nahkhao liata a vaw ngiapa nata viahchao tôhpa a aopa ei theipa zy cha kheihta zie ta e a châ?” tah ta.

¹⁵ Sawla chata, “Amale mozy eih, ama vaw cheipa a châ; ABEIPA na Khazohpa lâta atheih nawpa ta zawpi zy ta mietahkupa phapa nata viahchao tôhpa phapa ama pahlôh; a hropa zydua cha eima thie khai haw,” tah ta.

¹⁶ Samuel ta Sawla hnohta, “Tah mâh khâ, zâhia ABEIPA ta ei hnohta bie a reipa ei cha chho aw,” tah ta. Ano chata a hnohta, “Reih teh,” tah ta.

¹⁷ Samuel chata, “Nama pachâ ta chyhsa chyh ngaitapa châ hra la, Izarel pho hyutuhpa chata a cha taopa châ va chi mâ? ABEIPA chata Izarel mo abei chata sathaw cha thu ta.

¹⁸ ABEIPA chata cha tuah ta, ‘Sie la moleipa sahlao Amale mozy cha thie khai la, ama leidia khai hlâ lei cha adyuh lymâ teh, cha tah ta.

¹⁹ Khazia e ABEIPA bie zyh leipa ta hraona hmo cha a zaw hnao chi ta, ABEIPA mohmô liata hmo pha leipa na tao?” tah ta.

²⁰ Sawla chata Samuel hnohta, “ABEIPA bie cha ei zyh mâ tâh. ABEIPA eina tuana lâna chata sie na ta, Amale beipa Akaka vaw patu na ta, Amale mozy ei thie khai ha mâ tâh.

²¹ Anodeikuacha zawpi zy chata hraona hmo mietahkupa nata viahchao tôhpa zy pahleipadia awpa hry liata a phapa maih cha, Kilkal liata ABEIPA na Khazohpa lâta atheih nawpa ta ama vaw cheih,” tah ta.

²² Chatawcha Samuel chata, “ABEIPA chata ABEIPA bie a ngiahpa cha a lypa hawhta raopa hlânazy nata atheihna zy he aly ma? Atheihna hlâta reingiahna pha via ta, mietahkupa tôhpa thawpa hlâta a bie pyhpa cha a pha via.

²³ Atyna he pachao thaina moleipa zy nata a lyu ta, chhoruna he nohthlahpa a chhypa nata khazoh nohthlahpa a chhypa tluta a châ. ABEIPA bie na khoh leipa vâta ano chhaota abei châta cha khoh hra vei,” tah ta.

²⁴ Sawla chata Samuel hnohta, “Hmo ei parao haw; ABEIPA biepiepa nata na bie cha ei vaw parao haw hih, zawpi zy chi na ta, ama rei ei ngiahna liana heta.

²⁵ Chatanachata ei molei a ngiahthai la, ABEIPA ei chhy thei nawpa ta na dikhei heih teh,” tah ta.

²⁶ Samuel chata Sawla hnohta, “Cha dikhei cheita aw va na; ABEIPA bie cha khoh tlôh lei khâh chi ta, ABEIPA chhaota Izarel sahlaozy abei châta cha khoh khao hra vei,” tah ta.

²⁷ Samuel cha sie awpa ta a vaw heih nahta, a poh pai cha Sawla ta patu ta, hrie haw ta.

²⁸ Chatawhcha Samuel ta a hnohta, “Atanoh tawhna heta ABEIPA ta Izarel khihnarâh he cha chhu haw ta, na hlâta a pha viapa, na vaih a pie haw.

²⁹ Izarel zy Rôhnahna cha hai leipa aw ta, a ngiapachhi hra aw vei; chyhsapa hawhta ngiapachhi heihpa châ tlôh lei khâh ta,” tah ta.

³⁰ Ano chata, “Ei vaw molei ha na; châhrasala ei chyhsa zy machâ nata Izarel sahlaozy hmiakô liana heta na palyupalih awpa ta ei châ haw, ABEIPA na Khazohpa ei chhy thei nawpa ta na dikhei tlai mah y,” tah ta.

³¹ Chatawhcha Samuel chata Sawla cha a dikhei haw ta; Sawla chata ABEIPA cha a chhy haw ta.

³² Samuel chata, “Amale mozy abei Akaka cha kei lâta a vaw chhi teh u,” tah ta. Akaka cha ano lâta a lypa ta vawh ta, Akaka chata, “Thina chi chhihna kha cha ei khôkhâh ha thlyu aw,” tah ta.

³³ Samuel chata, “Na zaozi ta chanô zy saw leipa ta a taopa hawhta, na nô chhao chanô hry liata saw hnei leipa chyhsa a châ aw,” tah ta. Chatanachata Samuel chata Akaka cha Kilkal liata ABEIPA hmiakô liana chata chhawhsao haw ta.

³⁴ Samuel cha Ramah khih lâta sie ta; Sawla cha Kibia khih ano o lâta khy ta.

³⁵ Samuel chata a thi noh taihta Sawla cha a hmô khao leipa ta, Samuel cha Sawla vâta a pachâ a rôh kaw. ABEIPA chata Izarel zy abei châta Sawla a taopa’ cha a ngiapachhi pa a châ.