1 Thatihzy Rona 10

¹ Philistina mozy chata Izarel mozy cha adyuh ei ta; Izarel mozy cha Philistina mozy hmiakô liana chata a râpai ei ta; Kilbô Tlâh liana chata thiepa ta y ei ta.

² Philistina mozy chata Sawla nata a sawchapawpazy cha a chadai ei ta; Philistina mozy chata Sawla sawchapawpa Zawnatha zy, Abinada zy, Malkhisua zy cha thie ei ta.

³ Sawla cha a riethei ngaita ta. Libaw a ka thaipa chyhsa zy chata pha ei ta; hmah paphao haw ei ta.

⁴ Chatanachata Sawla chata a chariah chhaichhi a chabatuhpa hnohta, “Na zaozi kha phia la, na chô pahlie teh, he chopawtai leipa zy heta ei nâ palai thlu pathlei aw ei na,” tah ta. Châhrasala a chariah chhaichhi a chabatuhpa chata tao khoh leipa ta; chi ngaita tlôh ta. Chatanachata Sawla chata a zaozi cha la ta, a zaw thlu haw ta.

⁵ A chariah chhaichhi a chabatuhpa chata Sawla a thi tahpa a pahno nahta ano chhao chata a zaozi cha a zaw thlu hra ta, thi haw hra ta.

⁶ Cha hawhna chata Sawla nata a sawchapawpa zy pathôh cha thi haw ei ta; ama paw saw zydua ta ama thi haw.

⁷ Izarel râh liata a ypa chyhsa zydua chata pheisaih zy amâ râpai tahpa nata Sawla nata a sawchapawpazy cha ama thi haw tahpa ama pahno nata ama khihzy cha puasai ei ta; a râpai ei ta, Philistina mozy chata kei pahrâ haw ei ta.

⁸ A mylâ cha Philistina mozy ta ama chariah thipa zy chysia pahluhpa awpa ta ama vaw nahta, Kilbô Tlâh liata Sawla nata a sawchapawpa zy a thipa cha kei hmô ei ta.

⁹ Chatawhcha a chysia pahluh ei ta, a luh nata a chariah chhaichhi cha la ei ta, ama khazoh nohthlahpa zy nata chyhsa zy hnohta thâtih phuah awpa ta Philistina râh lâna chata paphao ei ta.

¹⁰ Chatawhcha a chariah chhaichhi cha ama khazoh zy o liata soh ei ta, a luh cha Dakô o liata tawh ei ta.

¹¹ Châhrasala Zabesakilia chyhsa zydua ta Philistina mozy ta Sawla ama taona zie zydua kyh ama vaw thei nahta,

¹² chyhsa riahphapa sahlao zydua cha pua ei ta, Sawla ri nata a sawchapawpazy ri cha la ei ta, Zabesa khih lâta siekhei ei ta. A rupa zy cha Zabesa khih liata oaka tho ry liata pabu ei ta, noh sari pati nie leipa ta y ei ta.

¹³ Chatanachata Sawla chata ABEIPA bie a ngiah khoh leipa ta, ABEIPA chô liata a paraopa vâta nata ABEIPA a chhohia leipa ta khazoh a hneipa a pachao thaipa pachaosapa ta a chhohiapa vâta a thipa a châ.

¹⁴ Chavâta thi ta, khihnarâh chhao Zese sawchapawpa Davi cha a pie haw.