Ryureihtuhpazy 13

¹ Izarel pathlazy chata ABEIPA mohmô liata hmo moleipa tao heih ei ta, ABEIPA ta Philistina mo ku liata kô sypalih paysa ta.

² Zôrah khih liata Dana pho chyhsa pakha y ta, a moh cha Manôah châ ta; a lahpinô cha saw leipa châ ta, saw rai phaoh beih leipa ta.

³ ABEIPA vâlyuhchâpa cha chanô hnohta a vaw luah ta, a hnohta, “Saw leipa châ chi ta, saw rai phaoh leipa chi ta, châhrasala saw phaoh aw chi ta, sawchapawpa na sa aw.

⁴ Chavâta a sohsi teh, kresawti nata sahhma rai doh kha la, nie hrao leipa hmo rai chhao nie chachei ta khâ,

⁵ saw phaoh aw chi ta, sawchapawpa sa tlôh aw chi ta. A luh liana chata sâ ngyuna rai hmâh aw va chi, hawti cha chhi liata a y no tawhta Khazohpa châta Nazarai chyhsa châ tlôh aw ta; ano chata Izarel mozy he Philistina mozy ku tawhtapa cha a pachha pathao aw,” tah ta.

⁶ Chanô chata a vahpa hnohta, “Khazohpa chyhsa mo pakha ei hnohta a vy ta, a hmia cha vâlyuhchâpa hmia hawhta chichhipa a châ; khataih lâ chyhsa ma a châ tahpa hiahri leipa na ta, ano chata a moh na chho hra leipa ta;

⁷ anodeikuacha ei hnohta, ‘Saw phaoh aw chi ta, sawchapawpa na sa aw; kresawti nata sahhma rai doh kha la, nie hrao leipa hmo rai chhao nie chacheita khâ, hawti cha chhi liata a y no tawhta a thina taihta Khazohpa châta Nazarai châ tlôh aw ta,’ tah ta,” tahpa ta reih ta.

⁸ Chatawhcha Manôah chata ABEIPA lâta a haw ta, a hnohta, “Hy ABEIPA y, ngiachhiepa ta Khazohpa chyhsa na vaw tuapa kha, eima hnohta a vy hei sala, hawti a vaw pih awpa cha, kheihta e, eima tao aw maniah vaw pachu mawh sy,’ tah ta.

⁹ Khazohpa ta Manôah bie reipa cha nahthlie ta, chanô cha sibiepa su liata â tyu no ta a hnohta Khazohpa vâlyuhchâpa cha a vy heih ta; a vahpa Manôah deikua cha a hnohta y leipa ta.

¹⁰ Chanô cha a parah ngaitapa ta thlai a râ ta, a vahpa cha kei chho ta, a hnohta, “Moh tua! Zâkhano ta ei hnohta a vypa kha ei hnohta â vaw luah hei,” tah ta.

¹¹ Manôah cha thyu ta, a lahpinô zi ta, cha chyhsa lâna cha kei tlô ta, a hnohta, “Nâma he ma chanô hnohta bie a reihtuhpa chi cha?” tah ta. Ano chata, “Ei châ cha,” tah ta.

¹² Manôah chata, “Na bie lymâ hawhta vaw tlô mawh sy, hawti yzie awpa cha kheihta e, châ aw ta, khâpa e, a hria awpa a châ aw tly?” tah ta.

¹³ ABEIPA vâlyuhchâpa chata Manôah hnohta, “Chanô liata ei reipa zydua kha a phapa ta pachâ thlâh ha mawh sy.

¹⁴ Krezôh liatahpa rai cha nie awpa châ leipa ta, kresawti nata sahhma rai a doh awpa châ vei, nie hrao leipa rai chhao a nie awpa châ vei; bie ei pie hawpa zydua kha a phapa ta avao mawh sy,” tah ta.

¹⁵ Manôah ta ABEIPA vâlyuhchâpa hnohta, “Ngiachhiepata ta cha thlyu aw pi ta, mie taw eima chô chhuahnohpa tua aw,” tah ta.

¹⁶ ABEIPA vâlyuhchâpa chata Manôah hnohta, “Na thlyu hra la, na pati la nie aw va na; raopa hlâna châta a chhuahnohpa na châ khiahtala ABEIPA lâta na hlâ awpa a châ,” tah ta. Manôah chata ano cha ABEIPA vâlyuhchâpa a châ tahpa pahno tlôh leipa ta.

¹⁷ Manôah ta ABEIPA vâlyuhchâpa hnohta, “Na moh ahy maw, na bie reipa hawh tlaita a vaw tlô tita eima cha palyupalih thei nawpa ta?” tah ta.

¹⁸ ABEIPA vâlyuhchâpa chata a hnohta, “Khazia ei moh eina hiahri chi, rei awpa na kawh châ va?” tah ta.

¹⁹ Manôah ta mie taw cha niepa hlâna chhaota la ta, lôpanô chô liata ABEIPA lâta hlâ ta, vâlyuhchâpa chata hmonoâh ngaitapa tao ta. Manôah nata a lahpinô chata moh thlâh ha ei ta,

²⁰ maisâh tawhta mei paleih cha avâ lâ a kiah nona chata ABEIPA vâlyuhchâpa cha maisâh liata mei palei liana chata kiah haw tlôh ta, Manôah nata a lahpinô chata moh thlâh ha ei ta; alei liata â khu lâta pao ei ta.

²¹ Anodeikuacha ABEIPA vâlyuhchâpa cha Manôah nata a lahpinô lâna chata a vaw luah khao vei. Chatanachata Manôah chata ABEIPA vâlyuhchâpa a châ tahpa pahno ta.

²² Manôah chata a lahpinô hnohta, “Khazohpa eima hmô hawpa vâna heta eima thi thlyu aw,” tah ta.

²³ Châhrasala a lahpinô chata a hnohta, “ABEIPA ta thie maniah a chhuah khiahta cha raopa hlâna zy nata niepa hlâna eima hlâpa zy kha a chhy khoh aw mâ, he hawhpa zydua chhao he maniah pamosa leipa aw ta, he hawhpa hmozy chhao he atahmâ maniah chho hra aw vei,” tah ta.

²⁴ Chanô chata sawchapawpa sa ta, a moh Sasawna bi ta; hawsaih cha vaw laiseih ta, ABEIPA ta byhnâ pie ta.

²⁵ Zôrah nata Estawl likawh ta Mahaneda su liana chata ABEIPA Thlahpa ta vaw pahra pathao haw ta.