Hlazy 5

¹ Hy ABEIPA, ei bie nahthlie la; ei hrona kyh he na pachâ mah y.

² Ei Beichaipa nata ei Khazohpa, ei cha awna pyu he nahthlie mah y, nâma lâ tlaita thlahchhâpa châ tlôh na ta.

³ Hy ABEIPA, my ta ei ao thei chi ta; my ta nâma châta atheihna a chhuadypa ta, ei vaw mokhâh tyh aw.

⁴ Hmoparaona liata aly khohpa Khazohpa châ tlôh lei khâh chi ta; moleipa cha na ota vaw tlô aw veih ei.

⁵ Apalaipa zy cha na mo hmôna liata a duah leipa aw ei ta; moleipa zydua cha a hao tlôh chi.

⁶ Haihthaipa zy cha pahleipadia aw chi ta; ABEIPA chata thisaih palo hmâhpa nata dô hmâhpa cha pasi tlôh ta.

⁷ Châhrasala kei deikua cha na kyhpachâna kawh ngaita kawpa vâta na o liata ei vaw ngia thei, nâma china chôta na achhyna-o pathaihpa lâ aheina chôta ei châ chhy tyh aw.

⁸ Hy ABEIPA, ei chariahpa zy vâta na siana ta nâ chhi la; ei hmiakô liana heta na lâpi cha patlâhsa mah y.

⁹ Ama pakah liana cha ngiachhiena rai y leipa ta; ama palôh cha paraona sai a châ. ama rao cha thlâ a pahypa hawhta châ ta, ama paleih ta ama reithai pakhei tyh.

¹⁰ Hy Khazohpa, ama thai leina cha paphaosa la; ama ryraona tlai chata papaosa ei sala; ama moleina hluhpi vâta thypa châ ei sala, nâma châ tysai tlôh ei ta.

¹¹ Nâma liata ama ngâna a pahniehpa zydua deikua cha aly ei sala. chhâzaw ta alypa ta hla sa ei se; na pabohsa vâ ei ta, na moh a pasôpa zy chhao aly ngaitapa ta y ei se.

¹² Hy ABEIPA, chyhsa siapa cha byhnâ pie aw chi ta; ano cha khokheina ta vyhphao hawhta na padô.