Malureina 6

¹ ABEIPA ta Mawsi chho ta.

² lzarel pathlazy hnohta reih la, ama hnohta, chapaw tlyma, chanô tlyma, kheihawhpa tlyma bietaina ABEIPA châta piepa ta Nazarai bietai a taih nona chata.

³ kresawti nata sahhma dopa châ vei; kresawti thaopa chhao, sahhma thaopa chhao, dohpa châ leipa ta, kre ti chhao doh leipa ta, kre thei a thiehpa chhao, a chawhpa chhao a nie awpa châ hra vei.

⁴ A panano chhôh zydua chata krezo liatahpa, a theipa hmô chhao, ahyh chhao niepa châ vei.

⁵ A pananopa ta bie a taih chhôh zydua cha, a luh chhao a ngyu chachei’pa châ vei; ABEIPA chata a pananona chhôh noh â ki hlâta cha pathaihpa châ aw ta; a luh sâ â paseisa awpa a châ.

⁶ ABEIPA chata a panano chhôh zydua cha a thihpa ri â hnia awpa châ leipa ta,

⁷ a paw zy, a nô zy, a unawhpa zy, a sietanô zy tlyma, thina kyh liata chhao a papuapalei awpa châ vei; Khazohpa châta â pananona chata a chahry khaipa vâta.

⁸ Â panano chhôh zydua cha ABEIPA châta pathaihpa a châ aw.

⁹ A kiapâh liata chyhsa sôkhata thipa ta a pananona luh cha vaw papuapalei haw sala, a pathaih noh a noh sari noh ta, a luh a ngyu awpa a châ.

¹⁰ A noh charie noh ta ahmaohpakhyna poh-o chhikao liata theihthaipa hnohta vachhuh pô no tlyma, pivaw pô no tlyma a vaw cheih awpa a châ.

¹¹ chatawhcha theihthaipa chata pô kha cha molei atheihna châta hlâ aw ta, pô kha cha raopa hmohlâpa ta, athihpa vâta a hmo paraona liata aryhna tao pa aw ta. Cha noh ualuana chata a luh cha a pathaih awpa a châ,

¹² chatawhcha thailei atheihna châta mietahkupa taw a chapawhpa kô khapa vaw cheih pata a pananona nohzy cha ABEIPA lâta a tao heih aw, a pananona cha papuapaleipa a châ hawpa vâta a hmialâ tahpa kha khâpa hrao leipa châ haw tlôh ta.

¹³ He he Nazarai chyhsa ama pananona noh â ki tita taonazie awpa cha a châ: ahmaohpakhyna poh-o chhikao liata a chhipa châ aw ta.

¹⁴ ABEIPA châta hmohlâpa ta mietahkupa tôhpa kô khapa seina a hnei leipa raopa hlâna ta pô kha, molei atheihna châta mietahkupa taw a chanôhpa kô khapa seina a hnei leipa pô kha, adyhna hlâna châta mietahkupa tôhpa seina hnei leipa pô kha.

¹⁵ thinô pahlao leipa viahchhâ nata viahdie di ngaitapa sathaw ta nypa taopa viahchhâ tlâ nata sathaw ta hniapa viahchhâ a pâhpa hrâbyh hmo kha, ama niepa hlâna châta nata dopa hlâna châta zy chhaota ama hlâ awpa a châ.

¹⁶ Chatawhcha theihthaipa ta chazy cha ABEIPA hmiakô liata hlâ aw ta, a molei atheihna nata raopa hlâna cha a hlâ aw.

¹⁷ mietahkupa tôhpa cha hrâbyh liata viahchhâ thinô pahlao leipazy chhaota adyhna atheihna hlâna châta zy, ABEIPA lâta hlâ aw ta; theihthaipa châta niepa hlâna nata dopa hlâna chhao cha a hlâ hra aw.

¹⁸ Nazarai chyhsa châta ahmaohpakhyna poh-o chhikao liata a pananona luh cha ngyu aw ta, a pananona sa cha la aw ta, adyhna atheihna hlâna ry liata mei liana chata a rao awpa a châ.

¹⁹ Chatawhcha theihthaipa chata mietahkupa tôhpa palaih pasyu chiehpa nata hrâbyh liata thinô pahlao leipa viahchhâ tlâ kha nata thinô pahlao leipa viahchhâ pâhpa tlâ kha la aw ta, Nazarai chata a pananopa luh a ngyu khai nahta chabasa aw ta.

²⁰ theihthaipa chata hiepa hlâna ta ABEIPA hmiakô liata a hie awpa a châ; he he theihthaipa tovyuh a châ aw, hiepa palôh nata chaluahpa phei chhaota; cha khai nah chata Nazarai chata kresawti a doh thei ha aw.

²¹ He he Nazarai bietai ryhpa nata ABEIPA hmiakô liata ama hmohlâpa ryhpa cha âmo lôhthai ta hlâpa rei leipa ta; a pananona ryhpa bietai yzie lymâ ta a tao awpa a châ, tah teh,” tahpa ta.

²² ABEIPA ta Mawsi chho ta.

²³ Arawna nata a sawchapawpazy hnohta, he hawhna heta Izarel pathlazy byhnâ nama aw pa awpa a châ: ama hnohta,

²⁴ ABEIPA ta byhnâ cha awpa ei sala, cha vaih lymâ ei se:

²⁵ ABEIPA ta a hmia nama chô liata pakhaihsa sala, cha ngiachhie mawh sy.

²⁶ ABEIPA ta nâmo lâ a vaw heih sala thlalôhna cha pie mawh sy:tahpa ta reih teh u, tahpa reih teh.

²⁷ Cha hawhna chata Izarel pathlazy liata ei moh paysapa châ aw ta, chatawhcha kei ta âmo cha byhnâ ei aw pa aw,” tahpa ta.