Mathai 6

¹ Chyhsazy mohmô ta nama siana hmopha taopazy cha a chado teh u; chata leipa ta la nama Paw avâ liatahpa hnohta lymâ hnei aw veih ei chi.

² “Cha hawhna chata ngiachhiena hmozy na pie tita, haiphiahpazy ta apakhyna o liata nata othliahzy liata, chyhsa reithaina ama hlaona awpa ta ama taopa hawhta na hmiakô ta chiahmie patôsa khâ. Hmeihseihta ta, ei cha chho ei chu, ama lymâ cha ama hmô haw.

³ Nâ deikua chata ngiachhiena hmozy na pie tita, na ku chachâh lâta a taopa cha na ku chavei lâta pahno khah se,

⁴ chatanachata na ngiachhiena hmozy cha a ru lâta y thei aw ta; na Paw a ru lâta cha hmotuhpa chata a cha thô aw.

⁵ “Thlah nama chhâ tita, chyhsa haiphiahpazy hawhta y khah u, chyhsa hmôpa ta ama y theina awpa ta apakhyna o liata zy, othliah ki liata zy, a duahpa ta thlah chhâ khoh tlôh ei ta. Hmeihseihta ta, ei cha chho ei chuh, ama lymâ cha ama hmô haw.

⁶ Nâ deikua cha thlah na chhâ tita, na chhôhpadâhpa lialiah chaipa liata a ngia la, ochhi khaw la, na Paw a ru lâta a ypa hnohna cha thlahchhâ teh; na Paw a ru lâta cha hmôtuhpa chata a cha chyh ei aw.

⁷ “Thlah nama chhâ nota, Zenitaizy tahpa hawhta reih chanei thlâhthli khah u; ama rei hluhpa vâta thei hluh via awpa ta pangiasa tlôh ei ta.

⁸ Âmo hawhta y khah u, Khazohpa nama Paw chata nama hia hlâ chhaota nama khopa pahno thlâh ha tlôh ta.

⁹ He hawhna heta nâmo cha thlahchhâ teh u:‘Eima Paw avâ liatahpa, Na moh zachhih mawh sy.

¹⁰ Na khihnarâh vaw tlô mawh sy.Na khopa la avâ liata ama tahpa hawhta,Alei liatahpa ta tah mawh sy.

¹¹ Atanoh châta eima niepa maniah pie mah y;

¹² Hmo maniah a bâhpazy eimâ ngiahthaipa hawhta.Keimo chhao hmo eimâ a bâhpazy maniah a ngiahthai mah y;"

¹³ Reipasaona liata maniah a chhi khah y, Moleipa liata maniah pachha mah y.’

¹⁴ Chyhsa ama paraopazy namâ ngiahthai khiahta cha, nama Paw avâ liatahpa chata a châ ngiahthai hra aw ei;

¹⁵ châhrasala chyhsa ama paraopazy namâ ngiahthai vei khiahta cha, nama Paw ta nama paraopazy cha ngiahthai hra aw veih ei?

¹⁶ Nie leipa ta nama y tita, haiphiahpazy hawhta nama hmia a pasaih khah u, chyhsazy hmiakô ta ama nie leipa a lâ theina awpa ta ama hmia amâ pachhiesa tyh. Hmeihseihta ta, ei cha chho ei chuh, ama lymâ cha ama hmô haw.

¹⁷ Nâ deikua ta nie leipa ta na y tita na luh sathaw a thu la, na hmia a pahlie teh,

¹⁸ nie leipa ta na ypa cha na Paw a ru lâtahpa mohmô lia dei leipa ta cha chyhsa mohmô ta a lâ aw va chi; chatawhcha na Paw a ru lâta cha hmôtuhpa chata a cha thô aw.

¹⁹ Alei liata chhôma-u nata sai-iepa ta niepa ta, a parupazy ta paraopa ta ama paruna liata nama châta ryuzy pachô khah u,

²⁰ châhrasala avâ liata chhôma-u nata sai-iepa ta a nie leina liata nata a parupazy ta paraopa ta ama paru leina liata nama châta ryuzy pachô teh u.

²¹ Na ryu yna liata na pathipalôh chhao a y aw.

²² Pôhpa meiôh cha mo a châ. Na mo a sia khiahtala, na pôhpa zydua ta a cha khaih aw;

²³ na mo a rao khiahta cha na pôhpa duata a zoh khai aw. Chatanachata nâma liata khaihna cha zohna châ ha sala, zohna cha a zoh kaluh kaw dia!

²⁴ “Ahy hmah abei pano chakao pabaoh thei aw veih ei; pakha cha a hao aw ta, a hropa cha kyh a pachâ aw, cha leipa ta pakha cha a pyh aw ta, a hropa cha a mopakhô aw. Khazohpa nata khizaw sôh chakao pabaoh thei veih eichi.

²⁵ “Chavâta ei cha chho ei chuh, khâpa e nama nie aw, khâpa e nama doh aw nama hrona kyh nata khâpa namâ bu aw tahpa ta pôhpa kyh liata pachâ chhie kha u. Niepa hlâta hrona nata chysia hlâta pôhpa pasô via veih eichi ma?

²⁶ Pavaw avâ liata a zawpazy he pachâ teh u; sâh tu veih ei, hria hra veih ei, sawvâ liata paso hra leipa ei ta, châhrasala nama Paw avâ liatahpa ta âmo a pasa tyh ei. Nâmo cha âmozy hlâta sôh via syulyu veih eichi ma?

²⁷ Nâmo hryta ahy e pachâ chhiepa ta a doh lâta dy kha ta a pasâh via thei?

²⁸ Khazia chysia kyh ta nama pachâ a chhie? Râh liata tlôma-u, laiseih zie he pachâ teh u; hriapasa leipa ei ta, pala so hra veih ei;

²⁹ châhrasala ei cha chho ei chuh, Sawlawmaw tlai chhao a rôhnahna zydua liana cha, cha pawpi sâkha hawhna cha y vei.

³⁰ Râh liata sibiepa atanoh hroh ta a mylâ ta mei liata thypa hmahta Khazohpa ta cha tlatlu ta a tobi khiahta cha, Hy nâmo ngiapâ chyhpa saih u, cha tobi via syulyu veih ei ma?

³¹ Chatanachata, ‘Khâpa e eima nie aw?’ ‘Khâpa e eima doh aw?’ ‘Khâpa e eimâ bu aw?’ tahpa ta pachâ chhie kha u.

³² Zenitaizy ta he hmo zydua he ama tlua tyh; he zydua he nama Paw avâ liatahpa chata nama byuhpa a châ tahpa pahno thlâh ha tlôh ta.

³³ A Khihnarâh nata a siana tlua tua teh u, chatanachata he zydua he a cha baichha aw ei.

³⁴ “Chavâta mylâ châta pachâ chhie kha u, mylâ châta cha pachâ chhi chhypa châ tlôh aw ta. Noh kha châta noh kha pachârôh â daih.;