Zawhana 21

¹ Cha hnôh lâna chata Taibiria Tipo liata Zisu a pachupazy hnohta a luah heih ta; he tana heta â luah.

² Saimaw Pity zy, Thawma Maphi ama tahpa zy, Kalili râh liata Kena khihpa Nathanael zy, Zebadi sawchapawpa pano zy, a pachupa hropa pano chhaota hmaokha ta y ei ta.

³ Saimaw Pity chata ama hnohta, “Nga patu awpa ta ei sie aw,” tah ta. Âmo chata a hnohta, “Keimo chhao na hnohta eima sie hra aw,” tah ei ta. Chatawhcha sie ei ta, balyh liata kiah ei ta, cha zâ liana chata khâpahma patu veih ei.

⁴ Chatawhcha khih pavâ chyta, Zisu raphyu liata a duah ta; châhrasala pachupazy chata Zisu a châ tahpa pahno tlôh ei va.

⁵ Zisu ta ama hnohta, “Ei nawhta saih u, niepa khâpaleipa nama hnei ma?” tah ta. Âmo chata a hnohta, “Hnei ma pi,” tah ei ta a chhy ei ta.

⁶ Ano chata ama hnohta, “Balyh kâ lâ chachâh lâna khata sao vawh ula, nama hmô aw,” tah ta. Chatawhcha vawh ei ta, nga a hluh ngaitapa vâta a daophi thei khao leipa ei ta.

⁷ ‘Pachupa Zisu ta a kyh a pachâpa khata Pity hnohta, “Abeipa a châ hao!” tah ta. Abeipa a châ tahpa Saimaw Pity ta a theipa ta nahta, a poh a sai ta, thluahruapa ta a ypa châ tlôh ta, tipo liata a zaw pathlah ta.

⁸ Châhrasala pachupa hropazy chata balyh chyhpa ta ta sao nga chhaota a daophipa ta vaw pangai ei ta, ngiakâh tawhta â hla tlôh lei khâh ei ta, dy za no tlyma deita châ ta.

⁹ Chatawhcha ngiakâh ama puapa ta nahta, cha liana chata meihei ta mei patipa hmô ei ta, a chô liata ngasa nata viahchhâ raopa chhaota.

¹⁰ Zisu ta ama hnohta, “Atahmâ nga nama patupa kha vaw cheih bâ teh u,” tah ta.

¹¹ Saimaw Pity kiah ta sao cha nga laipapi ta a biepa ta ngiakâ lâ a daophi ta, za kha nata sypangawh nata miathôh a châ; cha tlatluta y hrasala, sao cha a hrie vei.

¹² Zisu ta ama hnohta. “My pati vaw nie teh u,” tah ta. Chatawhcha pachupazy hry liata ahyhma ta, “Ahyma na châ?” tahpa ta hiahri ngâh veih ei. Abeipa a châ tahpa pahno thlâh ha ei ta.

¹³ Chatawhcha Zisu a vy ta, viahchhâ cha la ta, ama hnohta pie ta, ngazy chhao cha cha hawhna chata pie hra ta.

¹⁴ Cha cha Zisu athihpa hry tawhta a thyu heih tawhta pachupazy hnohta a luahna ei thôhna a châ.

¹⁵ My pati ama nie khai nahta Zisu ta Saimaw Pity hnohna chata, “Saimaw, Zawhana sawchapawpa, hezy hlâna heta nâ ta ei kyh eina pachâ via chi ma?” tah ta. Ano chata a hnohta, “Y, Abeipa y; na kyh ei cha pachâ tahpa na pahno na,” tah ta. Ano chata a hnohta, “Ei mietahkupa tawzy pasa teh,” tah ta.

¹⁶ A ei nona ta a hnohta, “Saimaw, Zawhana sawchapawpa, nâ ta ei kyh eina pachâ chi ma?” tah heih ta. Ano chata a hnohta, “Y, na kyh ei cha pachâpa na pahno na,” tah heih ta. Ano chata a hnohta, “Ei mietahkupazy mohôh teh,” tah ta.

¹⁷ A ei thôhna liana chata a hnohta, “Saimaw, Zawhana sawchapawpa, nâ ta ei kyh eina pachâ chi ma?” tah ta. Chatawhcha a ei thôhna liata, “Nâ ta ei kyh eina pachâ chi ma?” a tahpa vâna chata, Pity a pachârôh ta, a hnohta, “Abeipa y, ato pahno chi ta; na kyh ei cha pachâpa na pahno na,” tah ta. Zisu ta a hnohta, “Ei mietahkupazy pasa teh.

¹⁸ Hmeiseihta ta, hmeiseihta ta, ei cha chho, na hawti nona khata na chai a saih chi ta, na khona lâ maihta sie tyh chi ta; châhrasala na machâ tita na kuzy pazawh aw chi ta, mo hropa ta na chai châ sai aw ei ta, na kho leina lâta am châ daophi aw,” tah ta.

¹⁹ Cha biezy cha kheihtazie ta thipa ta ma Khazohpa a palyupalih aw tahpa pahnosana a reih. Cha cha a rei khai nahta a hnohta, “Na zi teh,” tah ta.

²⁰ Pity cha a heih ta, Zisu ta pachupa kyh a pachâpa zâ pati nie nota a chachôhna a hniepa ta a vaw heihpa ta, “Cha patusatuh awpa cha ahyma a châ?” a tahtuhpa khata a vaw zipa hmô ta.

²¹ Pity ta ano cha hmô ta, Zisu hnohta, “Abeipa, he chyhsa he kheihta ma a châ aw?” tah ta.

²² Zisu ta a hnohta, “Ei vy heihna taihta a y thlâh ha awpa chhochhi khoh aw sala, cha cha khâpa ma a cha châpa aw? Nâ ta na zi thlâh ha teh!” tah ta.

²³ Cha pachupa cha thi lei awpa ta a bie cha unawhzy hry liana chata pathâh ha ta; châhrasala Zisu ta thi aw vei tahpa a hnohta reih tlôh va, “Ei vy heina taihta a y awpa chhochhi khoh aw sala, cha cha khâpa a cha châpa aw?” a tahpa châ tlôh ta.

²⁴ Cha pachupa cha he biezy pahnosatuhpa nata rohtuhpa he a châ; a bie pahnosapa he â do ngaitapa a châ tahpa eima pahno na.

²⁵ Chatawhcha hezy leipa heta Zisu hmotaopa hropa hluhpi a y; chazy cha ro khaipa châ sala châbu ro awpa zydua cha khizaw liana chhao heta a tlôpa ta pangiasa va na.;