Hosia 4

¹ Izarel pathla saih u, ABEIPA bie cha nahthlie teh u; he râh liana heta hmeihseihna nata ngiachhiena nata Khazohpa pahnona a y leipa vâta, ABEIPA chata râh a pahrâtuhpazy adyuhna awpa a hnei;

² chhiesapa zy, adopa zy, athipa zy, parupa zy, aphei hmâhpa zy pôh ta; thisaih a zaohmia thlâh haw.

³ Chavâta râh ta machhie sa aw ta, a chhôh liata a pahrâpa to a panao aw, lyurâhpa sazy a zawpa pavawzy chhaota; tilaipi liata ngazy taihta siekheipa ta a châ aw.

⁴ Anodeikuacha ahy hmahta anosasyh ta a siehnao kha sala, ahy hmahta anosasyh ta a ra hra kha se; na chyhsazy cha theihthaipa adyuhtuhpazy hawhta châ tlôh ei ta.

⁵ Nohchhô ta pao aw chi ta, hrohsopa chhao zâ ta pao aw ta; na nô chhao ei pahleipadia aw.

⁶ Ei chyhsazy cha pahnohna aphahlapa vâta pahleipadiapa châ ei ta, pahnona na dythapa vâta kei chhaota ei theihthaipa na châna tawhta eicha dytha ha aw. Na Khazohpa ryhpa my bao hra chi ta, kei chhaota na sawzy ei my hra aw.

⁷ Ama pôh nata ei chô liata molei rili bao hra ei ta, ama rôhnahna cha maohphyuna ta ei pachâsa aw.

⁸ Ei chyhsazy moleina nie ei ta, ama hmoparaona liana chata ama pathipalôh soh ei ta,

⁹ A zawpi nata theihthaipa chhaota miakha ama châ aw, ama hmotaopazy viari ei thô aw.

¹⁰ Nie taraw aw ei ta, lôhrâtlôpa ta y tlôh aw veih ei; sihry hmah aw ei ta, poh aw veih ei, ABEIPA apapeisana ama hnei leipa vâta; sihrypa ta ama y.

¹¹ Kresawti zy, kresawti thiehpa zy chata pathipalôh a pahlei tyh.

¹² Ei chyhsazy chata tho ta ama taopa a chhohia ei ta, ama chôhchahrei chata a chhô tyh ei. Sihryna palôhrupa chata paviakhei ta, ama Khazohpa siesaipa ta sihry haw tlôh ei ta.

¹³ Tlâhpizy laki liana chata atheih ei ta, tlâh byuhpazy liana chata rohpahâhpa rao ei ta,oaka nata pôpla nata teribia kôry liana zy chata a nodi a phapa vâta; chavâta nama sawchanôzy chata sihry ama hmâh.

¹⁴ Nama sawchanônôzy ta sihry ei ta, nama myunôzy ama sihry nota hrie aw va na; âmo tlai chhao sihrypazy nata sie nano ei ta, sihrypazy nata atheih tlôh ei ta; pahno thai leipa zawpizy cha ama pao aw.

¹⁵ Izarel, nâ chata sihry hmâh haw hrala, Zudah la pao cheita hra khah se. Kilkal lâ a khy khah ula,Bethave lâ khy hra khah ula, “ABEIPA a hroh chhôh cha,” tahpa ta chhiesa hra khah u:

¹⁶ Viahchao zeinô chhorupa hawh tlaita Izarel sahlao chhoru ei ta; atahmâ cha ABEIPA ta mietahkupataw hawhta su kawh ngaitapa liata a pasa aw ma?

¹⁷ Ephrai chata khazoh nohthlahpa a zaokhei haw ta, ano y ta y se.

¹⁸ Ama sahhmah dopa cha thao ta,Sihry haw tyh ei ta; a ryureituhpazy chata hmo noza chhihpa tao ama pasô kaw.

¹⁹ Thlih ta a mathlawzy ta hmô ta, ama theina zy vâta âmo no a za aw.