1
Châhrasala Khazohpa ta Naw nata hmo hroh hneipa to nata sahroh zydua a hnohta balyh liata a ypazy cha a thei thlâh ha ta. Chatawhcha Khazohpa ta alei chô liana heta thlih pathlisa ta, tizy cha a sy pathao haw ta.
2
ti a thu ngaitapa hnawhzy nata avâ opyzy chhao avaw khaw ta, ava tawhta vâsuana cha pahiasapa ta y haw hra ta,
3
tizy cha alei chô tawhtapa a sy via lymâ ta. Noh za kha nata sypangawh chhâna lâta cha tizy cha a vaw sy via haw ta.
4
chatanachata balyh cha thla sarina, noh hrawhhleisari noh liana chata, Ararat tlâhpi chô liana chata a vaw chahâ haw ta.
5
Chatawhcha tizy cha thla hrawhna taihta a vaw sy lymâ ta; thla hrawhna, noh khana liana chata, tlâh lakizy cha a vaw lâ haw ta.
6
Noh sypalih chhâna lâ cha, Naw chata balyh opy a taopa kha pahy haw ta,
7
chatawhcha ra-awh pazaw ta; alei tawhta tizy â sy khai lei vâta a zaw ngâ ta.
8
Chatawhcha alei tawhta tizy cha a sy khai nata sy khai lei pahno nawpa ta vachhuh pazaw heih ta.
9
châhrasala vachhuh cha â cho nawpa rai a hmô leipa vâta, a hnohta balyh lâ vaw kua heih ta, tizy cha alei chô zydua liana cha y tlôh ta. Chatanachata paza ta, patu ta balyh chhôh lâ a hnohta la haw ta.
10
Noh sari chhôh hâ chy heih ta, chatawhcha vachhuh cha balyh tawhta pazaw heih ta;
11
chatanachata vachhuh cha zâlâ ta a hnohta a vaw di heih ta, a hmao liana chata ôli hna lyu thiehpa vaw cheih ta; cha vâna chata Naw chata alei tawhta tizy â sy haw tahpa pahno ta.
12
Chatawhcha noh sari chhôh hâ ta, vachhuh cha pazaw heih ta; chatawhcha a hnohta vaw kua heih khao vei.
13
Kô za charu nata kô khana liata, a thla khana, noh khana noh liana chata, tizy cha alei tawhtapa kua khai haw ta; chatanachata Naw chata balyh khuna cha pasi ta, moh ta, alei chô cha vaw hi haw ta.
14
Chatawhcha a thla nona, noh syno nata noh sarina noh liana chata alei cha vaw hi khai haw ta.
15
Chatawhcha Khazohpa chata Naw hnohta,
16
“Balyh tawhta pua teh, nâ nata na lahpinô nata na sawchapawpazy nata na sawchapawpazy lahpinôzy chhao na hnohta pua hra mawh ei sy.
17
Sapa zydua hry liatahpa hmo hrohhneipa to na ylâhpazy kha, pavaw ne, sahroh ne, hmo hrohhneipa alyh thaipa to chhaota na hnohta puakhei teh, aleina liana heta taw a hluhpi patawhpa ta, chi a hluhpi pathlapa ta pôh ei se,” tah ta.
18
Chatanachata Naw cha pua ta, a sawchapawpazy nata a lahpinô nata a sawchapawpazy lahpinôzy chhao pua hra ei ta.
19
Chatawhcha sa to zy, alyh thaipa to zy, pavaw to zy, alei chôta â pie thaipa maih zy cha, âmo chi haw chyu ta balyh tawhta pua ei ta.
20
Chatawhcha Naw chata ABEIPA lâta maisâh tao ta, sa a pathaihpa to hry liatahpa la ta, maisâh liana cha raona hlânazy hlâ ta.
21
Chatawhcha ABEIPA ta rohpahâhpa cha thei ta, ABEIPA ta a palôhrupa ta, “Alei cha chyhsapa vâta chhiesa heih khao aw va na, chyhsapa palôhrupa pachâna cha a hawti no tawhta moleipa châ tlôh ta; atahmâ ta ei hriepa hawhna heta hmohrohhneipa to cha hrie heih khao aw va na.
22
Alei y chhôhta, sâh tu nata sâh hria zy, chasipaw nata nopi zy, sao nata chhia zy, chhô nata zâ zy cha, lei aw vei,” tah ta.
