2 Abeizy 8

¹ Elaisa ta sawchapawpa a patlâhsapa chanô hnohna chata, “Thyu la, nâma nata na chhôhkha chhaota,namay theina su lâta kei y chy teh u; ABEIPA ta chakâhna a patlôsa aw na, he râh liana heta kôsari chhôh tlai a tlô aw tahpa ta vaw reih haw ta.

² Chanô cha thyu ta, Khazohpa chyhsa bie hawhna chata tao ta; a chhôhkha zy chhaota, Philistina sahlao râh lâta kô sari kei y ei ta.

³ Kô sari tawhna chata cha chanô cha Philistina sahlao râh tawhtapa kua haw ta, a o nata a lyuabeipahia awpa ta vawh ta.

⁴ Beipa chata Khazohpa chyhsa a chakaotuhpa Kehazi cha, “Elaisa ta hmo rôhnahpa a taopa zydua na vawchho ta,” tahpa ta a chho hai nota châ ta.

⁵ Chyhsa pakha a thi hawpa a pahro heihna kyh abeipaachho nona chata, a sawchapawpa a pahro heihpa chanô chata a o nata a lyu abeipa vaw hiah hra ta. Kehazi chata, “Hy abeipa, ei zibeipa y, he he chanô cha a châ, he he a sawchapawpa Elaisa a pahro heihpa cha a châ,” tah ta.

⁶ Beipa ta chanô cha a hiahri nata chho haw ta. Beipa chata hyutuhpa pakha rao ta, “Ano eih zydua a lyu tawhta a veihpa zydua taihta he râh a kuasai tawhta atahmâ taih tahpa he pie khai heih teh,” tah ta.

⁷ Elaisa cha Damaska khih lâta sie ta. Suria beipa Benhada cha tlâh leipa ta y ta; “Khazohpa chyhsa he lâ â vy” tahpa ta chho ei ta.

⁸ Beipa ta Hazael hnohta, “Lymâ cheih ta, Khazohpa chyhsa bie a chho awpa ta vawh la, ‘Ei pasapa he ei tlâh heih thei aw tlyma?’ tahpa ta ABEIPA na chhohiapa tua mawh sy,” tah ta.

⁹ Hazael cha ano a chhohia awpa ta vawh ta, lymâ châta Damaska khih liata hmo phapa to, râraoseihpa sypalih phao cheih ta. A hmiakô liata a kei duah ta, “Na sawchapawpa Benhada, Suria beipa ta, ‘Ei pasapa he ei tlâh heih thei aw tlyma?’ tah awpa ta nâ lâta eina vaw tuah,” tah ta.

¹⁰ Elaisa ta a hnohta, “Vawh heih la, a hnohta, ‘Na tlâh heih aw,’ a tah na, tah mah y; anodeikuachaa thi tlai aw tahpa ta ABEIPA ta eina pahnosa,” tah ta.

¹¹ Ano chata nozachhihna taihta tawpa thlâh ha ta. Khazohpa chyhsa cha cha haw ta.

¹² Hazael chata, “Khazia e, ei zibeipa cha a cha tly?” tah ta. Ano chata a chhy ta, “Izarel pathlazy chô liata hmo pha leipa na tao awpa ei pahnopa vâta a châ; ama kuhzy rao aw chi ta, ama satliapa zy zaozi ta thie aw chi ta, ama sawnawh chyhpa ta zy cha tai chhei aw chi ta, nawh a hneipa ama chanô zy cha na hriechhei aw,” tah ta.

¹³ Hazael chata, “Kei, na chakaotuhpa, a rôhnahpa heta cha hawpa hmopapi cha a tao thei awpa ei châ mâ?” tah ta. Elaisa ta a chhy ta, “Suria sahlao chô liata na bei aw tahpa ABEIPA ta eina pahnosa,” tah ta.

¹⁴ Elaisa tawhtapa cha pua ta, a zibeipa lâta vawh haw ta, ano chata, “Elaisa ta khâpa a cha vaw chho?” tah ta. Ano chata, “A tlâh heih tlai aw, tahpa ta eina chho,” tah ta.

¹⁵ A mylâ ta cha poh chhangaitapa la ta, ti liata ny ta, cha chata a hmia pahlypa ta, thie haw ta. Hazael cha ano vyuhpa taâ bei haw ta.

¹⁶ Izarel beipa Ahaba sawchapawpa Zôrama kô pangawh a bei kô ta, cha nona chata Zehôsapha cha Zudah beipa châ ta. Zudah beipa Zehôsapha sawchapawpa Zehôra cha abei pathao ta.

¹⁷ A bei pathao nona chata kô sythôh nata kô nopa châ ta, Zerusale liata kô charie ryu reih ta.

¹⁸ Ahaba chhôhkha zy hawhta Izarel abei zy lâpi a chhipa cha a chhih hra ta, Ahaba sawchanônô lahpinô ta hnei ta. ABEIPA mohmô liata hmo pha lei ngaitapa tao tyh ta.

¹⁹ Anodeikuacha ABEIPA ta a chakaotuhpa Davi vâta Zudah râh cha parao leipa ta a pathlazy taihta meiôh pahneisa thlâh ha awpa bie vaw taih haw tlôh ta.

²⁰ Ano chhâ liana chata Edôma sahlao cha Zudah zy ryureina tawhta aty ei ta, âmo chô liata a bei awpa arao sasyh ta a tao ei ta.

²¹ Zôrama cha Zaira khih lâta a talaili zydua chhaota vawh ta, zâ ta pua ta, âmo a padôtuhpa Edôma sahlao zy nata ama talaili chô liata hyutuhpa zy cha a kei dyuh ta; chyhsa zy cha ama poh-o zy lâta a râ khai haw ei ta.

²² Edôma sahlao cha atanoh taihta Zudah sahlao liata amâ ty. Cha nona chata Libnah khih chhao a vaw ty hra ei ta.

²³ Zôrama thâtih hropa zy nata a hmotaopa zydua cha Zudah bei zy abei no tahpa thâtih rona châbuliata ropa ta y vei mâ?

²⁴ Zorama cha a mahpaw zy hnohta a mô ta, a mahpaw zy hry liata Davi khihpi liata pabu haw ei ta; a sawchapawpa Ahaziah cha ano vyuhpa ta abei ta.

²⁵ Izarel beipa Ahaba sawchapawpa Zorama a beina kô hrawhleino kô liana chata Zudah beipa Zehôra sawchapawpa Ahaziah cha a bei pathao ta.

²⁶ Ahaziah ta ryu a rei pathao nona cha kô syno nata kô nopa châ ta, Zerusale liata kô kha ryu reih ta. A nô moh cha Athaliah, Izarel beipa Ômri sawchanônô a châ.

²⁷ Ahaba chhôhkha zy lâpi a chhihpa cha a chhih hra ta, Ahaba chhôhkha zy hawhta ABEIPA mohmô liata hmo pha lei ngaitapa tao tyh ta, Ahaba chhôhkha zy piahpa châ tlôh ta.

²⁸ Ano cha Ahaba sawchapawpa Zorama ta Ramôkilia khih liata Suria beipa Hazael adyuhna liana chata a hlao hra ta, Suria sahlao chata Zorama cha hmah paphao ei ta.

²⁹ Beipa Zorama cha Suria beipa Hazael amâ dyuhna liata Suria sahlao ta Ramah khih liata hmah ama paphaopa cha Zezrel khih liata a patlâ awpa ta kua haw ta. Zudah beipa Zehôra sawchapawpa Ahaziah cha Ahaba sawchapawpa Zorama a pasapa vâta a hmô awpa ta Zezrel khih lâta zu ta.