2 Abeizy 15

Studie

   

1 Izarel beipa Zerôbaw kô syno nata kô sari a bei kô ta, Zudah beipa Amaziah sawchapawpa Azariah a bei pathao ta.

2 A bei tua nota kô hrawhleicharupa châ ta, Zerusale liata kô sypangawh nata kô no a bei ta. A nô moh cha Zekôliah, Zerusale chyhsa a châ.

3 A paw Amaziah hmotaopa hawhpa maih tao hrapa ta, ABEIPA mohmô liata hmo pha ngaitapa tao tyh ta.

4 Anodeikuacha su sâhpa zy cha pahleipadia hlei vei; su sâhpa zy liana chata chyhsa zy cha atheih ei ta, rohpahâhpa ama rao tyh.

5 ABEIPA ta abei cha hrie ta, chatanachata a thi noh taihta phawh ta, o nano ta y haw ta. Chatawhcha abei sawchapawpa Zawtha cha ama râh liata chyhsa zy ryureipa ta o chhôh lâ hyutuhpa ta y haw ta.

6 Azariah thâtih hropa nata a hmotaopa zydua cha Zudah abei zy amâ bei no tahpa kyh rona châbu liata ropa ta y vei ma?

7 Chatawhcha Azariah cha a mahpaw zy hnohta a mô ta, a mahpaw zy hry liata Davi khihpi liata pabu haw ei ta, sawchapawpa Zawtha cha ano vyuhpa ta abei ta.

8 Zudah beipa Azariah kô sythôh nata kô charie a bei kô ta, Zerôbaw sawchapawpa Zekaria cha Izarel zy chô liata Samari liata thla charu abei ta.

9 A mahpaw zy taopa hawh hra ta ABEIPA mohmô liata hmo pha lei ngaitapa tao tyh ta. Izarel zy hmo paraosapa ta a taopa Neba sawchapawpa Zerôbaw moleina zy kha siesai leipa ta.

10 Zabesa sawchapawpa Shaluma ta a ru lâta ano tei ta, zawpi zy hmiakô liata adyuh ta, thie ta, ano vyuhpa ta abei haw ta.

11 Zekaria thâtih hropa zy cha Izarel zy ama bei no tahpa kyh rona châbu liata ropa ta a châ.

12 (Cha cha ABEIPA ta Zehu hnohta, “Na sawchapawpa zy cha chhâ palihna taihta, Izarel zy abei dyuchhai liata amâ tyuh aw,” tahpa a reipa hawhna khata.)

13 Zudah beipa Uziah kô sythôh nata kô chaki a bei kô ta Zabesa sawchapawpa Shaluma cha abei pathao ta, Samari liata thla kha chhôh a bei ta.

14 Kadi sawchapawpa Menahe cha Tirzah tawhta Samari lâ khy ta, Zabesa sawchapawpa cha Samari liana chata adyuh ta, thie ta, ano vyuhpa ta abei haw ta.

15 Shaluma thâtih hropa zy a teina kyh zy cha Izarel abei zy amâ bei no tahpa kyh rona châbu liata ropa ta a y.

16 Chatanachata Menahe ta Tirzah tawhta Tiphasa khih nata a chhôh liata a ypa zydua nata a râh zy cha adyuh ta; ama pahy leipa vâta â dyuh, chazy liata nawh a hneipa chanô zydua cha hriechhei ta.

17 Zudah beipa Azariah kô sythôh nata kô chaki a bei kô ta, Kadi sawchapawpa Menahe cha Izarel zy chô liata a bei pathao ta, Samari liata kô hrawh a bei ta.

18 ABEIPA mohmô liata hmo pha lei ngaitapa tao tyh ta; Izarel zy hmo paraosapa ta a taopa Neba sawchapawpa Zerôbaw moleina zy kha a hro chhôh ta siesai vei.

19 Asuria beipa Pula ta ama râh cha a vaw dyuh ta; râh cha â ipa ta a hnei thei nawpa ta Menahe chata Pula cha tâkâ talent sâh kha pie ta.

20 Menahe chata Asuria beipa pie awpa ta Izarel chyhsa a hneirôhpa zydua tawhna chata tâkâ sekel sypangawh chyu khei ta. Chanachata Asuria beipa cha kua heih ta, cha râh liana chata y thlâh ha vei.

21 Menahe thâtih hropa zy, a hmotaopa zydua cha Izarel abeizy amâ bei no tahpa kyh rona châbu liata ropa ta y vei ma?

22 Chatawhcha Menahe cha a mahpaw zy hnohta a mô ta, a sawchapawpa Pekahia cha ano vyuhpa ta abei haw ta.

23 Zudah beipa Azariah kô sypangawh a bei kô ta Menahe sawchapawpa Pekahia cha Izarel zy chô liata Samari liata a bei pathao ta, kô no abei ta.

24 ABEIPA mohmô liata hmo pha lei ngaitapa tao tyh ta; Izarel zy hmo paraosapa ta a taopa Neba sawchapawpa Zerôbaw moleina zy kha siesai vei.

25 A pheisaih hyutuhpa Remaliah sawchapawpa Pekah ta ano cha tei ta, Samari liata abei o liata kuh liata Arakô nata Aria chhao ta thie ta, ano hnohta Kilia chyhsa sypangawh y hra ei ta; chatanachata Pekahia cha thi ta, ano vyuhpa ta abei haw ta.

26 Pekahia thâtih hropa zy, a hmotaopa zydua cha Izarel abei zy amâ bei nota THÂTIHZY rona châbu liata ropa ta a y.

27 Zudah beipa Azariah kô sypangawh nata kô no a bei kô ta, Remaliah sawchapawpa Pekah cha Izarel zy chô liata Samari liata abei pathao ta, kô syno abei ta.

28 ABEIPA mohmô liata hmo pha lei ngaitapa tao tyh ta; Izarel zy hmo paraopa ta a taopa Neba sawchapawpa Zerôbaw moleina zy kha siesai vei.

29 Izarel beipa Pekah a bei nota Asuria beipa Tiklapilesa ta Izaw khih zy, Abelamakah khih zy, Zanôa khih zy, Kadesa khih zy, Hazaw khih zy, Kilia nata Kalili râh zy, Nathalai râh zydua cha la ta; chatawhcha Asuria râh lâta sei ta a chhi ta.

30 Chatawhcha Elah sawchapawpa Hosia ta Ramaliah sawchapawpa cha Pekah cha tei ta, adyuh ta, thie ta, Uziah sawchapawpa Zawtha kô syno a bei kô ta ano vyuhpa ta abei haw ta.

31 Pekah thâtih hropa zy, a hmotaopa zydua cha Izarel zy amâ bei no tahpa kyh rona châbu liata ropa ta a y.

32 Izarel beipa Remaliah sawchapawpa Pekah kô syno a bei kô ta Zudah beipa Uziah sawchapawpa Zawtha cha abei pathao ta.

33 A bei pathao nota kô syno nata kô pangawh châ ta, Zerusale liata kô hrawhleicharu abei ta. Ano nô moh cha Zerusa, Zadôka sawchanônô a châ.

34 Chatawhcha a paw Uziah hmotaopa hawhpa maih tao hrapa ta ABEIPA mohmô liata hmo pha ngaitapa tao tyh ta.

35 Anodeikuacha su sâhpa zy cha pahleipadia hlei vei; su sâhpa zy liana chata chyhsa zy cha a theipa ta rohpahâhpa ama rao tyh, ABEIPA o chhikao machhuah lâ tahpa cha tao pathi ta.

36 Zawtha thâtih hropa zy, a hmotaopa zydua cha Zudah abei zy amâ bei no tahpa kyh rona châbu liata ropa ta y vei mâ?

37 Cha nona chata Suria beipa Rezi nata Remaliah sawchapawpa Pekah cha Zudah sahlao adyuh awpa ta ABEIPA ta tuah pathao haw ta.

38 Zawtha cha a mahpaw zy hnohta a mô ta, a mahpaw zy hry liata a mahpaw Davi khihpi liata pabu haw ei ta; sawchapawpa Ahaza cha ano vyuhpa ta abei ta.