1 Samuel 4

¹ Chatawhcha Samuel bie cha Izarel mo zydua hry liata pathâh ta."

² Philistina mozy cha Izarel mozy a byhkhâh awpa ta a parai ei ta, chatawhcha amâ dyuh nata Philistina mozy hmiakô liana chata Izarel mozy cha nawh haw ei ta, adyuhna su liana chata pheisaih sâh palih thie ei ta.

³ Pheisaizy amâ riena su lâta ama vawh nata, Izarel machâ zy chata, “Khâpa vâta ma atanoh he Philistina mozy hmiakô liata ABEIPA ta maniah a panawh vâ i? Eima hnohta ypa ta eima khakhaipa zy ku tawhtapa maniah pachha awpa ta Shilôh tawhtapa ABEIPA Biehraina Byh cha la ei suh u,” tah ei ta.

⁴ Chatanachata zawpi zy chata Shilôh lâta chyhsa tuah ei ta, cha tawhtapa cha cherubi chô liata atyuhpa Pheisaih zy ABEIPA Biehraina Byh cha kei la haw ei ta; Khazohpa Biehraina Byh ama lana liana chata Eli sawchapawpa pano Hôphani nata Phineha a hlao hra ei ta.

⁵ ABEIPA Biehraina Byh amâ riena su a vaw tlô nata, Izarel mo zydua cha thata awh ei ta, alei taih chhao a chalyu ta.

⁶ Philistina mozy ta ama awh pa pyu ama thei nahta, “Hebrai mo riehmo liata awh na pyu a paro ngâpa cha kheihtazie ta tlyma?” tah ei ta. Amâ riehmo liata ABEIPA Byh a vaw tlô tahpa pahno haw na ta,

⁷ Philistina mozy chata chi ei ta, “Riehmo lâta khazoh a vy haw chu,” tah ei ta. “Eima hu a po na! Cha hlâta cha hawhpa y beih tlôh lei khâh ta.

⁸ Eima hu a po na! Cha khazoh zy ku thatlô ngaitapa tawhtapa cha ahy e maniah a pachha aw? Cha khazoh zy cha Izi mozy râhpathohpa liata hri tota a thietuhpa kha a châ.

⁹ Hy, nâmo Philistina mozy saih u, nama chakaotuhpa ta ama ypa hawhna khata Hebrai mozy chakaotuhpa ta nama y lei nawpa ta thatlô ngaitapa ta y ula, riahpha ngaitapa ta y teh u; riahphapa ta y ula adyuh lymâ teh u,” tah ei ta.

¹⁰ Philistina mo chata adyuh ei ta, Izarel mozy cha nawh ei ta, ama poh-o chyu lâta a râ khai ei ta; thata thie ei ta, Izarel mo hry liata pheisaih thy thôh ama thi.

¹¹ Khazohpa Byh cha lapa ei ta; Eli sawchapawpa pano Hôphani nata Phineha cha thi hra ei ta.

¹² Pheisai hry liata Benzami pathla chyhsa pakha a râ ta, a poh zy a hriepa ta a luh alei a hlaopa ta cha noh liana chata Shilôh kei tlô ta.

¹³ A kei tlô nahta? Eli chata lâpi kiah liata a tyuna liata a tyuhpa ta vaw sai thlâh ha ta, Khazohpa Byh vâna khata a palôhrupa ta a chalyu ngâ ta. Cha chyhsa chata khih tlôpa ta thâtih a reih nata a khihpi dua ta thata sâh ei ta.

¹⁴ Eli ta ama sâpa pyu cha a thei nahta, “Cha paro ngâpa cha kheihta zie ta tlyma?” tah ta. Cha chyhsa cha a parah ngaitapa ta sie ta, Eli cha kei chho ta.

¹⁵ Eli cha kô sychaki nata kô chariepa châ ta, a mo zoh ha ta, a pavâhpa hmô thei khao leipa ta.

¹⁶ Chyhsa chata Eli hnohta, “Pheisaih hry tawhta a vypa ei châ; atanoh he pheisaih hry tawhta a vaw râpa ei châ,” tah ta. Ano chata, “Ei sawchapawpa y, kheihawhta e hmo a y tly?” tah ta.

¹⁷ Thâtih a vaw tlôkheituhpa chata a chhy ta, “Izarel mozy Philistina mozy hmiakô liana chata a râpai ei ta, zawpizy hry liata a thiena thata y hra ta; na sawchapawpa pano, Hôphani nata Phineha chhao thi ei ta, Khazohpa Byh chhao ama la pâ haw,” tah ta.

¹⁸ Cha hawhta Khazohpa Byh kyh a rei pata nahta chhikao thaby liata dyuchhai tawhtapa cha a die lâta pao ta; a rao thlie ta, thi haw ta, ano he pawpi haw ta, a pahnie khao vei. Izarel chô liata kô sypalih ryurei haw ta.

¹⁹ A myuhnô Phineha lahpinô chata saw phaoh ta, a sana daihti a hnia haw ta. Khazohpa Byh ama lapa kyh thei ta, a parâhpa nata a vahpa ama thi tahpa a pahno nahta a bôh ta, saw sa haw ta; a pasapa chata vaw pachhai haw tlôh ta.

²⁰ Thi daihmâpa ta y ta, a kiapâh liata a duahpa chanô zy chata a hnohta, “Chi khâ, sawchapaw na sa haw hih,” tah ei ta. Châhrasala a chhy leipa ta pachâ hra vei.

²¹ Rôhnahna chata Izarel cha a puasai haw!” tahpa ta hawti moh châta Ikhabaw bi ta, Khazohpa Byh cha la pa haw ei ta, a parâhpa nata a vahpa vâna chhao cha.

²² Ano chata, “Rôhnahna chata Izarel zy cha a puasai haw, Khazohpa Byh cha lapa haw tlôh ei ta,” tah ta.