652. Quod Dominus omni homini imputet bonum, et non alicui malum, consequenter quod non judicet aliquem ad Infernum, sed omnes, quantum homo sequitur, elevet ad Coelum, constat ex his Ipsius verbis, Jesus dixit, dum exaltatus sum e terra, omnes traham ad Meipsum, Johannes 12:32. Non misit Deus Filium suum in Mundum ut judicet Mundum, sed ut salvetur Mundus per Ipsum; qui credit in Ipsum non judicatur; qui autem non credit jam judicatus est, Johannes 3:17-18. ¹ Si quis mea verba audiverit, et tamen non crediderit, Ego non judico illum, non enim veni ut judicem Mundum, sed ut salvem Mundum; qui spernit Me, et non accipit mea verba, habet quod judicet illum, Verbum quod loquutus sum, judicabit illum in extremo die, Johannes 12:47-48. Jesus dixit, Ego judico neminem, Johannes 8:15, per Judicium hic et alibi in Verbo, intelligitur judicium ad Infernum, quod est damnatio, at de Salvatione non praedicatur judicium, sed resurrectio ad vitam, Johannes 5:24, 29; 3:18.

[2] per Verbum quod judicabit, intelligitur Veritas, ac veritas est, quod omne malum sit ab Inferno, et sic quod unum sint, quare dum malus elevatur a Domino versus Coelum, tunc malum ejus detrahit illum, et quia amat malum, sequitur ipse sua sponte: est quoque veritas in Verbo, quod Bonum sit Coelum, quare dum Bonus a Domino elevatur versus Coelum, ascendit ille sicut sponte sua, ac introducitur; hi dicuntur scripti in Libro vitae, Daniel 12:1; Apocalypsis 13:8; 20:12, 15; ² 17:8; 21:26. ³

[3] Est actualiter Sphaera elevans omnes ad Coelum, quae continue procedit a Domino, ac implet universum Mundum Spiritualem et universum Mundum naturalem, et illa est sicut fortis vena in Oceano, quae ⁴ occulte trahit navem; omnes illi qui ⁵ credunt in Dominum et vivunt secundum praecepta Ipsius, intrant illam sphaeram seu venam, ac elevantur, at illi qui non credunt, non volunt illam intrare, sed removent se ad latera, et ibi abripiuntur a flumine quod tendit in Infernum.

Footnotes: