Ezekiel 12

¹ ABEIPA bie cha ei hnohta vaw tlô heih ta:

² “Chyhsa y, atyhmâhpa chhôhkha hmôna awpa ta mo hneipa ta a hmô tlôh leipa, theina awpa ta nahkhao hneipa ta a thei tlôh leipa hry liata na pahrâ,

³ atyhmâhpa chhôhkha châ tlôh ei ta. Chavâta, nâ chyhsa y, seichâna lâta a sie awpa hawhta na hmodâhzy a phapa ta chaty la; nohchhô a khaihna liata ama mohmôna tlai liata pua teh, ama mohmô tlai liata na su tawhta su hro lâ na pua awpa a châ. Atyhmâhpa chhôhkha ama châ tarawpa ta ama pachâpa ngyu aw la.

⁴ Na hmo cha nohchhô a khaihpa liata ama mohmô tlai liata seichâna ta sie awpa hmo lapa hawh tlaita la aw chi ta; nâma tlai chhao ama mohmô liata râh hro lâ pasiesa awpa siepa hawhta na sie awpa a châ.

⁵ Ama mohmô tlai liata kuh pâhchhô cha papyu la, cha liana chata puakhei teh.

⁶ Ama mohmô tlai liata na ngiatlâh ta a pu aw chi ta, zohna liata na pua awpa a châ; râh na hmô lei nawpa ta na hmia nâ khu awpa a châ; Izarel chhôhkhapazy chata pamosa chhieliena ta ei cha tao papa châ tlôh ta,” tah ta.

⁷ Chatawhcha bie eina piepa hawhna chata tao na ta. Ei hmo cha seichâna lâ a sie awpa hmo hawhta nohchhô a khaihpa liata puakhei na ta, ei ku ta pâhchhô cha zâ lâta papyu na ta; a zo ta puakhei na ta, ama mohmô tlai liata a pu na ta.

⁸ Myta ABEIPA bie ei hnohta vaw tlô ta:

⁹ “Chyhsa y, Izarel chhôhkha atyhmâhpa chhôhkhazy chata na hnohta, ‘Khâpa ma na tao?’ cha tah veih ei ma?

¹⁰ Ama hnohna chata, Abeipa KHAZOHPA ta he tana heta a tah: He he Zerusale abeisawzy nata Izarel chhôhkha zydua ama yna chyhsazy thâtih awpa a châ.

¹¹ Nama châta pamosa chhieliena ei cha hih: ei taopa hawhna tlai heta nama chô liata taopa a châ aw; pasiesapa ta sei châ awpa ta nama sie aw,’ tah ta.

¹² Chatawhcha ama hry liata abeisaw a ypa chata a zohna ry liata a ngiatlâh ta a pu aw ta, a pua aw; ama puakheina awpa ta pâhchhô cha papyu aw ei ta; a mokhao ta râh cha a hmô khao leipa vâta a hmia khu awpa a châ.

¹³ Ano cha ei sao ta khu aw na ta, ei khohei liata a aopa a châ; Kaldia râh liata Babylaw liana chata a vaw chhi aw na ta, cha liana chata a thi awpa a châ tarawpa ta, hmô aw vei.

¹⁴ Ano bao awpa ta a kiapâh liata a y tyhpazy nata a vaihtuhpa zydua râh to lâta papai aw na ta; zaozi phiapa ta ei chadai aw.

¹⁵ Chatawhcha phopizy hry liata papaipa ta râh to liata ei papao tina chata, ABEIPA cha ei châ tahpa ama pahno aw.

¹⁶ Anodeikuacha zaozi zy, chakâhna zy, potla zy tawhna chata chyhsa chyhta ei pahlôh aw, chazy chata amâ vyna râh liata phopizy hnohna chata ama pasichhihna zydua cha ama phuah nawpa ta, chatanachata kei ABEIPA cha ei châ tahpa ama pahno aw,” tah ta.

¹⁷ Cha tawhna heih chata ABEIPA bie cha ei hnohta vaw tlô ta;

¹⁸ ‘Chyhsa y, na viahchhâ cha a chalyuna chôta nie la, na ti cha nôpopa ta a chalyuna chôta doh teh;

¹⁹ chatawhcha râh liata chyhsazy hnohna chata Abeipa KHAZOHPA chata Zerusale liata a pahrâpazy kyh liata nata Izarel râh kyh liana chata he tana heta a tah: Ama niepazy cha tichho sa ngaitapa ta nie aw ei ta, ama ti cha nôpo ngaitapa ta doh aw ei ta, a râh cha a chhôh liata a pahrâpazy nôchhiena vâta a chhôh liata hmo a ypa zydua tawhna chata roryhrapa ta y tlôh aw ta.

²⁰ Chatawhcha pahrâpa ta, a ypa khihpizy cha paraopa ta y aw ta, râh cha rory pahrasapa ta y aw ta, chatanachata ABEIPA cha ei châ tahpa nama pahno aw, tahpa ta reih teh,” tah ta.

²¹ Chatawhcha ABEIPA bie cha ei hnohta vaw tlô ta:

²² Chyhsa y, Izarel râh liata he bieso nama hneipa he khâpa tahna a châ tly? Noh khi a pasih nata, aluahna maih khâpa hrao leipa a châ tyh,’ nama tahpa he.

²³ Chavâta, ‘Abeipa KHAZOHPA chata he tana heta a tah: He bieso he pabâh aw na ta, Izarel râh liata bieso ta hmâh khao aw veih ei. Noh cha a hnia haw ta, aluahna to a dopa ta tlô nawpa noh cha,’ tahpa ta ama hnohta tlao reih teh.

²⁴ Izarel chhôhkhazy hry liata aluahna khâpa hrao leipa rei nata pachaona phapa lâta dôveipa ta reina rai y khao aw vei.

²⁵ ABEIPA cha châ tlôh na ta, ei bie reipa cha patlôpa aw na ta, pakheipa châ aw vei. Hy atyhmâhpa chhôhkhapazy saih u, nama hro noh tlai heta bie reih aw na ta, patlô tlôh aw na ta, Abeipa KHAZOHPA ta a tah,” tah ta.

²⁶ ABEIPA bie cha ei hnohta vaw tlô heih ta:

²⁷ “Chyhsa y, Izarel chhôhkhapazy liatahpa chata, ‘Aluahna liata hmôpazy cha a vaw tlôpa nohro châta châ awpa châ ta, a rei chhieliepazy chhao lâhlapi châta a châ awpa a châ,’ ama tah.

²⁸ Chavâta âmo hnohta Abeipa KHAZOHPA chata he tana heta a tah: Ei bie khâpa hmah pakheipa châ leipa aw ta, ei bie reipa maih cha patlôpa ta tlao a y lymâ aw, Abeipa KHAZOHPA ta a tah, tahpa ta, chho teh,” tah ta.