1 Samuel 20

¹ Davi cha Ramah khih liata Naiô tawhtapa cha a râ ta, Zawnatha lâta sie ta, “Khâpama ei tao tly? Khâpama ei parao tly? Na paw chô liata khâpama parao na ta he hawhta thie einâ chhuah tly? tah ta.

² Ano chata, “Châ bao va! Thi cheita aw va chi, pachâ teh, ei pâ chata eina pahnosa leipa ta khâparai, a laipa tlyma, a chyhpa tlyma tao beih vei; khazia e he bie he eina phih aw? Phih cheita aw vei,” tah ta.

³ Davi chata, “Na paw ta eina ngiachhiena zie chi he pahnopasia ngaita tlôh ta; ’Zawnatha chata, he he la pahno khah se, chata leipa ta la a pachâ a rôh kaw aw,’ a tahpa a châ aw. Anodeikuacha ABEIPA hrona nata na hrona reipa ta ei reih, thina nata eima likawh cha keih kha deita a châ,” tahpa ta reih heih ta.

⁴ Zawnatha ta Davi hnohta, “Na hrona ta a khopa maih ei cha taopa lymâ aw,” tah ta.

⁵ Davi chata Zawnatha hnohta, “Pachâ teh, mylâ he thla thiehpa châ aw ta, abeipa hnohta pati a dôh thlyu awpa châ na ta; châhrasala a noh thôh noh zâlâ taihta sibiepa su liata a nyu awpa ta na pasai teh.

⁶ Na paw ta ei y leipa a pahno haw khiahtala, ‘Davi cha a khih Bethlehe lâta sie awpa ta na hiah ta, ama chhôhkha chata kô chareih atheihna daihti a châ,’ vaw tah ta.

⁷ ‘A pha na!’ a tah khiahtala na chakaotuhpa cha a thlalôh aw ta; anodeikuacha a pathi a ia khiahtala, hmo pha leipa tao a chhuah tahpa pahno mah y.

⁸ Chavâta na chakaotuhpa he a phapa ta tah mah y, na chakaotuhpa cha ABEIPA biehrai liata a ngiakhei haw tlôh chi ta. Anodeikuacha paraona a hneipa ei châ khiahtala, nâma ta na thie thlâh ha teh, khâpawpa e na paw lâta einâ chhi cheingei aw chi?” tah ta.

⁹ Zawnatha chata, “Châ bao va! Na chô liata hmo pha leipa tao ei pâ ta â chhuah tahpa ei pahno khiahtala cha chho aw vana mâ?” tah ta.

¹⁰ Davi chata Zawnatha hnohta, “Na paw ta a pachhuhpa ta châ vaw chhy hawpa châ sala, ahy e na chho aw?” tah ta.

¹¹ Zawnatha chata Davi hnohta, “A vy tua, sibiepa su lâta vawh tua ei si,” tah ta. Chatanachata sibiepa su lâna chata vawh haw ei ta.

¹² Zawnatha chata Davi hnohta, “ABEIPA Izarel zy Khazohpa cha a pahnotuhpa châ mawh sy! Mylâ he daihti liata tlyma noh thôh noh liata tlyma, ei pâ ei pasia tita, Davi kyh phana lâ a châ khiahtala na hnohta chyhsa tuapa ta cha chho aw vana mâ.

¹³ Ei pâ ta na chô liata hmo pha leipa taopa tao khoh sala, cha chho leipa ta thlalôh ngaitapa ta na sie thei nawpa ta ei cha pathlie leipa khiahtala, ABEIPA ta Zawnatha cha a taopa hawhta tao sala, cha hlâta a tha via chhaota. ABEIPA cha na hnohta y mawh sy, ei pâ hnohta a y tyhpa hawhta.

¹⁴ Ei thi lei nawpa ta ei hro chhôh deita ta ABEIPA ngiachhiena cha na pahmôsapa châ leipa ta.

¹⁵ chhâzaw ta ei chhôhkha zy chhao na ngiachhiena bâh kha se. ABEIPA ta Davi khakhaipa alei chô tawhtapa a pahlei khaina taih chhaota bâh kha y,” tah ta.

¹⁶ Zawnatha chata, “Davi khakhaipa zy liata ABEIPA ta â hnaw aw,” tahpa ta Davi chhôhkha zy lâta bie hraih ta.

¹⁷ Zawnatha chata ano kyh a pachâna reipa ta Davi lâta chhie sa heih ta; ano hrona kyh a pachâpa hawh tlaita a kyh pachâ tlôh ta.

¹⁸ Zawnatha chata a hnohta, “Mylâ he, thla thiehpa châ aw ta; nâ tyuna su a rua awpa vâta, na y leipa a lâ thlyu aw ta.

¹⁹ Noh thôh na y tawhna chata zu parah la, eikhano ta hmo a vaw y nota nâ nyuna su lâna khata sie la, Ezel alô kiapâh liana chata y thlâh ha mah y.

²⁰ Châka a nuapa hawhta châtai miathôh a kâ lâ vaw ka aw na ta.

²¹ Chatawhcha pachâ teh, ‘Vawh la, châtai zy kha kei tlua teh,’ tahpa ta hawti tua aw na ta. Hawti hnohta, ‘Moh tua, châtai zy kha na hnôh lâna kha a y khaw, la la,’ ei tah khiahtala a vy teh, ABEIPA hrona reipa ta ei reih, na châta thlalôh a chhi ta, chi awpa a y leipa châ aw ta.

²² Anodeikuacha hawti hnohta, ‘Moh tua, châtai zy cha na khô lâna kha a y,’ ei tah khiahtala sie syulyu thlâh ha mah y; ABEIPA ta a cha pasiesapa a châ aw.

²³ Nâ nata kei ta hmo eima rei hawhpa kyh liana chata nâma nata eima likawh liana chata ABEIPA cha chhâzaw ta a y,” tah ta.

²⁴ Chatanachata Davi cha sibiepa su liana chata a nyu ta; thla a vaw dieh nahta abei cha pati dôhpa ta a tyuh ta.

²⁵ Abei cha noh hro ta â tyuna tyhpa pâchhô kiapâh liata â tyuna liana chata a tyuh ta; Zawnatha cha ano dady ta a tyuh ta, Abne cha Sawla kiapâh liata a tyuh ta, Davi atyuna deikua cha rua ta.

²⁶ Sawla chata cha noh liana chata khâpahmah reih vei; “A chô liata hmo khâpa tlyma y aw ta; a pathaih leipa tlyma a châ aw, a pathaih leipa a châ thlyu aw,” tahpa ta pachâ ta.

²⁷ Thla thiehpa my a noh nona liana chata Davi su cha rua thlâh ha ta. Sawla chata a sawchapawpa Zawnatha hnohta, “Khazia e, Zese sawchapawpa he zâhia nata atanoh pati dôh awpa ta â vy vei?” tah ta.

²⁸ Zawnatha chata Sawla a chhy ta, “Davi ta, Bethlehe lâ sie awpa na hiah ngâ ta.

²⁹ ‘Na pasiesa teh; eima chhôhkha zy chata khih liata atheihna hnei aw ei ta, ei unawhpa chata y hra awpa ta bie na tah ta. Chatanachata eina ngiachhie thei chi khiahtala na pasiesa la. Ei unawhpa zy ei kei hmô aw,’ a tah. Cha vâna chata abei tlâhkhai lâta a vy leipa a châ,” tah ta.

³⁰ Zawnatha chôta Sawla cha a pathi-ia ta, a hnohta, “Nâ, chanô chhorupa nata atyhmâpa sawchapawpa, Zese sawchapawpa cha na maohphyu nawpa nata na nô thluahruana a pamaohphyu awpa ta nâ tlyh tahpa ei pahno leipa ma a châ.

³¹ Zese sawchapawpa he alei liata a y chhôh zydua pa-ipa châ leipa aw chi ta, na khihnarâh chhao. Chavâta thlai pa-awsa la kei lâta a kaw chhi teh, a thi thlyu awpana a châ,” tah ta.

³² Zawnatha ta a paw Sawla a chhy ta, a hnohta, “Khazia ma thie awpa a châ aw tly? Khâpa a tao?” tah ta.

³³ Sawla chata chakhao a chhuahpa ta a asei cha chaloh ta; cha vâna chata Zawnatha chata a paw ta Davi cha thie â chhuah tlai tahpa pahno haw ta.

³⁴ Zawnatha cha tlâhkhai tawhna chata hiehâh ngaitapa ta thyu ta, cha thla noh nona liana chata pati dôh khao leipa ta, a paw chata Davi a pamaohphyu ngaitapa vâta a pachâ rôhkhei ta.

³⁵ My ta Zawnatha cha hawtipa a chhi ta, sibiepa su lâta Davi nata ama su raopa lâna chata sie ta.

³⁶ A hawti hnohna chata, “A râ la, ei châtai kapa zy he kei tlua teh,” tah ta. Chatawhcha hawti cha a râ hai nona chata a khô lâta chatai ka ta.

³⁷ Hawti chata Zawnatha chatai kapa tlana su a kei tlô nahta, Zawnatha chata hawtipa cha aw ta, “Châtai cha na khô lâ kha châ vei mâ?” tah ta.

³⁸ Zawnatha chata hawti cha aw ta, “A vaw râ parah teh, a parah teh, dusawta ta y kha,” tah ta. Zawnatha hawti chata chatai cha pakhy ta, a zibeipa lâna chata vawh haw ta.

³⁹ Châhrasala hawtipa ta khâpahmah pahno leipa ta; Zawnatha nata Davi deita chata hmo yzie cha pahno ei ta.

⁴⁰ Zawnatha chata a hawti cha a chaihrai cha pie ta, a hnohta “Sie la, khih lâ va cheih ha mah y,” tah ta.

⁴¹ Hawti cha a sie pata nahta Davi cha a yna su chho lâchhâh tawhtapa cha vaw thyu ta alei taihta a khupa ta ei thôh a naoh ta; chatawhcha a sy ei ta, chah rairieh ei ta, Davi deikua châ chah pachaih ta.

⁴² Zawnatha chata Davi hnohta, “Thlalôh ngaitapa ta sie mah y, ‘ABEIPA cha nâ nata eima likawh liata nata ei pathlazy nata na pathlazy likawh liata chhâzaw ta y mawh sy,’ tahpa ta ABEIPA moh ta chhie eima sa rairieh haw khaw,” tah ta. Davi cha thyu ta sie haw ta; Zawnatha chhao cha khih liata a ngia haw ta.