1
Davi chata a palôhrupa ta, “Khatita tlyma cha Sawla ku liana heta ei leidia thlyu ualua aw hih; Philistina mozy râh lâta a râpa hlâta a phapa viapa y ualua aw vei; Sawla chata Izarel râh chhôh zydua liata eina tluapa he a hnabeidy aw ta, chatanachata a ku tawhtapa ei ly aw,” tah ta.
2
Davi cha thyu ta, ano nata a hnohta chyhsa za charu a ypa zy cha Maôka sawchapawpa, Katha beipa Akisa lâta sie haw ei ta.
3
Davi cha ano nata a chyhsa zy nata chyhsa to ama chhôhkha ta, Davi chhao, a lahpinô pano Zezrel chyhsa Ahinô nata Naba panôhmeipa Kamel chyhsa Abikai zy chhaota, Katha khih lâta Akisa hnohta y haw ei ta.
4
Davi cha Katha khih lâta a râ tahpa Sawla chho ei ta, chatanachata tlua khao leipa ta.
5
Davi chata Akisa hnohta, “Na ngiachhie la, na râh liata khih miakha liata yna su na pie hra la, cha liana chata ei y aw: na chakaotuhpa he khazia e abei khih liata na hnohta a y thlâh ha aw?” tah ta.
6
Akisa chata cha nona chata Zikla khih cha pie ta; chavâta Zikla cha atahmâ taihta Zudah râh abei zy eih a châ haw.
7
Philistina râh liata Davi a y chhôh cha, kô kha bohlo nata thla palih a châ.
8
Davi nata a chyhsa zy cha khy ei ta, Kesuri mozy, Kirzi mozy, Amale mozy chho ei ta; cha pho zy cha hlâno tawhta Shura lâchhâh Izi râh taihta a pahrâpa châ ei ta.
9
Davi chata râh cha adyuh ta, a chanô a chapaw ta a pahlôhpa rai y leipa ta, mietahkupa zy, viahchao zy, alâ zy, râraoseihpa zy ama chysia zy la pa khai ta. Chatawhcha kua heih ta Akisa lâta sie ta.
10
Akisa chata, “Atanoh he khataih lâ na chho?” tah ta. Davi chata, “Zudah Neke râh zy, Zerami mo Neke râh zy, Keni mo Neke râh zy,” tah ta.
11
Davi chata, ‘Philistia râh liata a y chhôh ta, “Davi chata, he tana heta a tao tyh ama tah pathlei aw na,” tahpa ta a chanô a chapaw Katha khih lâta a chhi awpa ta pahlôhpa rai hnei vei.
12
Akisa chata Davi bie reipa cha zopa ta, “Ano chyhsa Izarel zy cha a pahaosa kaw ta, chavâta chhâzaw ta ei chakaotuhpa ta a y aw,” tah ta.
