Zawsua 4

¹ A pho zydua ta Zawdâh ama chaka khai nahta, ABEIPA ta Zawsua hnohta,

² Zawpi zy hry liatahpa he chyhsa pahrawhleino pho to liata chyhsa pakha lymâ a tlyh la.

³ ama hnohta, ‘Zawdâh liahliah theihthaipa sahlao a duana liatahpa, alô miahrawleino la ula, cheih ula, ariena su atazâ ta namâ riena awpa liata soh muh vy’, tahpa ta bie pie mah y,” tahpa ta reih ta.

⁴ Zawsua chata Izarel pathlazy hry liata chyhsa pahrawhleino, pho to liata chyhsa pakha lymâ a tlyhpa zy cha aw ta;

⁵ ama hnohta, “ABEIPA nama Khazohpa Byh hmiakô liana khata, Zawdâh liah liata chaka ula, Izarel pathlazy a pho hluhna zie lymâ ta chyhsa tota alô miakha chyu a pia muh vy,

⁶ chatanachata hezy he nama hry liata pahnona a châ aw, a noh hro ta nama sawzy ta, ‘He alô zy he khâpa tahna ma a châ tly?’ tahpa ta ama cha hiahri tita,

⁷ nâmo ta ama hnohta, ABEIPA Biehrai Byh hmiakô liata Zawdâh tizy cha a chie pachhô hawpa vâta a châ; Zawdâh a chaka nota Zawdâh tizy cha a chie pachhô haw. Chatanachata he alô zy he Izarel pathlazy ta chhâzaw ta amâ thei thlâh ha nawpa ta a châ hih, nama tah aw,” tah ta.

⁸ Izarel pathlazy chata Zawsua ta bie a piepa hawhna chata tao ei ta, Izarel pathlazy a pho hluhna zie lymâ hawhta Zawdâh liah liatahpa alô miahrawhleino la ei ta, amâ riena su lâta cheih ei ta, cha liana chata soh ei ta.

⁹ Chatawhcha Biehrai Byh a sytuhpa theihthaipa sahlao a duana lia tlaita, Zawdâh liah liana chata Zawsua ta alô miahrawhleino bô ta; chazy cha atanoh taihta a y thlâh haw.

¹⁰ Mawsi ta Zawsua bie a pie hawpa zydua hawhta ABEIPA ta zawpi zy hnohta tao awpa ta Zawsua bie a piepa cha ama tao khai hlâ lei cha theihthaipa Byh a sytuhpa zy cha Zawdâh liah liana chata a duah thlâh ha ei ta. Zawpi zy cha a parah ei ta, chaka haw ei ta;

¹¹ zawpi zydua ama chaka khai tawhta ABEIPA Byh nata theihthaipa zy cha zawpi zy mohmô liana chata chaka haw hra ei ta.

¹² Rubena pathlazy, Kada pathlazy nata Manase pho khophie zy cha Mawsi ta ama hnohta a rei hawpa hawhna khata Izarel pathlazy hmiakô liata chariah chhaichhi tobipa ta chaka ei ta;

¹³ chariah chhaichhi ta a tobipa chyhsa thy palih a dyuh awpa ta Zerikô by zy liana chata ABEIPA hmiakô liata ama chaka.

¹⁴ Cha noh liana chata ABEIPA ta Zawsua cha Izarel sahlao zydua mohmô liata palyupalih ta; Mawsi ama chipa hawhna khata a hroh chhôh zydua cha chi ei ta.

¹⁵ ABEIPA ta Zawsua hnohta,

¹⁶ “Theihthaipa sahlao Bie pahnosana Byh a sytuhpa zy kha Zawdâh tawhta vaw pua awpa bie pie teh,” tahpa ta reih ta.

¹⁷ Zawsua ta theihthaipa sahlao zy cha, “Zawdâh tawhtapa kha vaw pua teh u,” tahpa ta bie pie ta.

¹⁸ Chatawhcha theihthaipa sahlao ABEIPA Biehrai Byh a sytuhpa zy cha Zawdâh lialiah tawhtapa puapa ta, theihthaipa sahlao phei zy chata alei hipa a tly pata nahta Zawdâh tizy cha a loh tyhpa hawhta vaw loh ha heih ta, hmialâ tahpa hawhna khata a kao zydua cha khô ngâ kaw ta.

¹⁹ Zawpi zy cha thla khana, noh hrawh noh ta Zawdâh tawhtapa cha pua ei ta, Zerikô nochhi lâchhâh Kilkal liata ariena su tao ei ta.

²⁰ Chatawhcha cha alô miahrawhleino Zawdâh tawhtapa ama lapa cha Zawsua ta Kilkal liata bô ta.

²¹ Izarel pathlazy hnohna chata, “Noh hro ta nama pathlazy ta ama pawzy hnohta, ‘He alô zy he khâpa tahna ma a châ tly?’ tahpa ta amâ hiahri tita,

²² ‘Izarel sahlao zy chata Zawdâh he alei hipa ta ama chaka,’ tahpa ta nama pathlazy cha nama pahnosa aw.

²³ ABEIPA nama Khazohpa ta eikhano Tilaipi Saihpa cha eima chaka hlâ lei ta eima hmiakô liata a pakuapa hawhna khata ABEIPA nama Khazohpa ta Zawdâh tizy he nama chaka hlâ lei

²⁴ leilô liata pho to ta ABEIPA ku he a tha a tlô tahpa pahnopa ta ABEIPA nama Khazohpa cha chhâzaw ta ama chi thei nawpa ta,” tahpa ta reih ta.