Ruthi 2

¹ Naomi chata a vahpa heinawh Elimeleka pathla chyhsa hneiro ngaitapa sanawh hnei ta, a moh cha Bôaza a châ.

² Môaba zuah Ruthi chata Naomi hnohta, “Lyu lâ sie aw na ta, na ngiachhietuhpa maih sâh kâmo ei tho aw,” tah ta. A nohnô chata a hnohta, “Sie mah y, ei sawchanônô y,” tah ta. .

³ Chatanachata sie ta, lyu liata sâh a hriatuhpa zy ama mypa cha kâmo tho ta; Elimeleka pathla Bôaza lyu liana tlai chata kei sie chho ta.

⁴ Bethlehe tawhta Bôaza cha sie ta; sâh hriatuhpa zy hnohna chata, “Nama hnohta ABEIPA y mawh sy!” tah ta. Âmo chata, “ABEIPA ta byhnâ cha pie mawh sy,” tahpa ta a chhy ei ta.

⁵ Chatanachata Bôaza chata a chakaotuhpa, sâh hriatuhpa zy chô liata hyutuhpa hnohna chata, “He he khataih lâta laihsa ma a châ tly?” tah ta.

⁶ Sâh hriatuhpa zy chô liata hyutuhpa, a chakaotuhpa chata, “Môaba laihsa, Môaba râh tawhta Naomi hnohta a vy hrapa a châ.

⁷ Ano chata, ‘Na ngiachhie la, nama sâh kâmo tho aw na ta, sâh hriatuhpa zy ama sapiah ama pakhy khai nahta kâmo ei tho lymâ aw,’ tah ta. Chatanachata a vy ta, o liata buakha ta a ypa dei leipa ta cha my tawhta a y ngâthlâh haw,” tahpa ta a chhy ta.

⁸ Bôaza chata Ruthi hnohta, “Ei sawchanônô y, pachâ teh, lyu hro lâ cha kâmo tho awpa ta sie kha la, he tawhna heta a pasie kha y, ei chakaotuhpa laihsa zy hnohna heta y thlâh ha teh.

⁹ Ama sâh hriapa he moh thlâh ha la, ama hnie chathô lymâ teh. Satliazy cha kheihta hmah a cha tah lei awpa ei ta bie ei pie haw vana ma? Chatawhcha na dâhphina maihta ti beih liata satlia zy ti thai chiehpa doh tyh mah y,” tah ta.

¹⁰ A hmiakô liata a bôh ta, alei lâ a khupa ta, pakhu paneih ta, a hnohta, “Pho hropa châ tlôh na ta, nâma ta he hawhta na pahno khoh chi ta, eina ngiachhiepa chi he kheihta zie ta e a châ?” tah ta.

¹¹ Bôaza chata a chhy ta a hnohta, “Na vahpa a thi tawhta na nohnô chô liata na hmotao zie zydua chyhsa ta na chho khai ei ta, na nô nata na paw nata na pina râh siesaipa ta, cha hlâta na pahno beih leipa zy lâta na vyna zie chhao he.

¹² ABEIPA Izarel zy Khazohpa a paboh nawpa ta a mathlaw ry liata nâ vaw ngiapa chata na phana thata cha pie mawh sy;” tah ta.

¹³ Ano chata, “Ei beipa y, na ngiachhie mah y, nâma ta thlah na palôh chi ta, na chakaotuhpa laihsa zy hry liatahpa châ vei hraw sala, na chakaotuhnô he a pha ngaitapa ta bie na chho haw tlôh chi ta,” tah ta.

¹⁴ Pati nie tina chata Bôaza ta a hnohta, “A vy tua, viahchhâ zy he vaw nie hra la, viahchhâ tlawzy cha kresawti thaopa liata ny hra teh,” tah ta. Chatanachata sâh hriatuhpa zy kiapâh liana chata a tyuh ta, viahchhâ cha pie ei ta; a khodâh hawhta nie ta, a rih bie tawh chhaota a nie bâhpa y ta.

¹⁵ Kâmo tho heih awpa ta a thao heih nata Bôaza chata a satlia zy hnohta, “Sapia zy hry liatahpa chhao he a huah lymâ sala, ra khah u.

¹⁶ A ty zy hry liatahpa chhao thaopa ula, ano hua awpa ta siesai lymâ ula, ra khah u,” tahpa ta bie pie ta.

¹⁷ Chatanachata lyu liata sâh kâmopa cha zâlâ taihta tho ta; a tlua chiehpa cha chakhy ta, bali sâh ephah miakha tlyma a châ.

¹⁸ Sâh phaoh ta, khih lâna chata sie haw ta; a nohnô cha a kâmo thopa cha pahmô ta, a rih bie tawhta a nie bâhpa cha pachhi ta, a nohnô pie ta.

¹⁹ A nohnô chata a hnohta, “Atanoh he khataih lâ kâmo na tho? Khataih liata e na hria? Cha pahno khohtuhpa cha byhnâ topa ta y mawh sy,” tah ta. Chatawhcha ano chata ahy hnohta a hria tahpa a nohnô chho ta. “Atanoh ei kei hriapa paw cha a moh cha Bôaza a châ,” tah ta.

²⁰ Naomi chata a myuhnô hnohta, “ABEIPA a hropa nata athiehpa chô liata ngiachhiena a bâh beih leipa chata ano cha byhnâ pie mawh sy.” tah ta. Naomi chata a hnohta, “Cha chyhsa cha eima heinawh hniapa, eima sanawhpa a châ mâ tâh,” tah ta.

²¹ Môaba zuah Ruthi chata, “Cha leipa chhaota ei hnohta, ‘Ei sâh he ama hria khai hlâ lei cha ei satlia sahlao hnohna heta a hlao thlâh ha mah y,’ eina tah mâ tâh,” tah ta.

²² Naomi chata a myuhnô Ruthi hnohta, “Ei sawchanônô y, lyu hro lâ sie leipa ta a chakaotuhpa laihsa sahlao hry liana sai chata sie la, a pha aw,” tah ta.

²³ Chatanachata bali sâh nata uit sâh hria khaina taihta Bôaza chakaotuhpa laihsa sahlao hry liana sai ta kâmo thopa ta sie ta, a nohnô hnohna chata pahrâ lymâ ta.