Hlazy 18

¹ Hy ABEIPA, ei thatlôna, kyh ei cha pachâ na.

² Ei Khazohpa, ei lôpanô, ano liana chata ei ngâ aw, ei vyhphao nata ei pachhana ki nata ei kuh osâhpa a châ.

³ Reithai tlâh ABEIPA, cha aw aw na ta, chatanachata ei chariahpazy tawhta pachhapa ta ei y aw.

⁴ Thina khawhrizy chata na chazei ta, leidiana tilaipazy chata eina pachisa;

⁵ Sheôl khawhrizy chata na chahry ta, thina khoheizy ta eina chô khâh.

⁶ Ei pachârôhna noh liata ABEIPA cha pado na ta; ei Khazohpa cha na bao awpa ta ei aw tyh. Achhyna-o tawhta ei ao a thei tyh, ei awna ao cha a nahkhao ta thei ta.

⁷ Chatawhcha alei he a chathopa ta a chalyu haw ta; a hiehâhna va chata, tlâhpi zy chhao cha a bôna chhaota a chalyu haw ta.

⁸ A hnapasu tawhna chata meikhuh cha pua ta, a pakah tawhta mei cha kâ ta; cha chata meihei chhao pakâsa ngâ kaw ta.

⁹ Ano chata avâzy chhao pabô ta, cho ha ta; a phei ry liana chata zoh kaluhna vaw y ta.

¹⁰ Cherubizy chô liata kiah ta, â zaw haw; thlih mathlawzy liana chata thlai a zaw ta.

¹¹ Zohna he a chheipâh zydua liata khu awpa ta tao ta, ti liata zohna avâ meihdo chhakalupazy cha.

¹² A hmiakô liata khaihna vâna chata meihdo chhakaluhpazy cha pai ta, pareih nata mei-iazy thata a suah.

¹³ ABEIPA cha vâ liana khita a thua ngâ ta, Chônôchaipa cha a ao papua ta, pareihzy nata mei-iazy thata a suah

¹⁴ Chatawhcha a châtai ka ta. a papai khai haw; dôhlazy pathlisa ngâ ta, a patypamâ hra.

¹⁵ Cha tina chata, hy ABEIPA, rana vâta, na hnapasu tawhta hu a puapa ta, thata a hmôpa vâta ti lonazy cha a vaw lâ ta, aleilô bônazy cha palâsapa ta a y haw.

¹⁶ Ano cha a chôlâ tawhta na za paza ta, na patu ta, ti hluhpi tawhtapa einâ daophi.

¹⁷ Na khakhaipa thatlôpa tawhta na pachha ta, nâ haotuhpa tawhtapa chhao; keima châta cha ama thatlô tu haw tlôh ta.

¹⁸ Âmo cha ei vâchhie tyh noh liana chata na tei ei ta; châhrasala ABEIPA ei chhaina chaipa a châ.

¹⁹ Ano chata su tlytlôpapi lâta nâ chhi ta; ei chôta alypa vâta eina pachha haw.

²⁰ ABEIPA cha ei siana zie hawhta lymâ na pie ta; ei kuzy pathaina zie hawh tlaita eina thô hra.

²¹ ABEIPA lâthlôh cha a chhih na ta, ei Khazohpa tawhtapa moleipa ta pavia sai tlôh lei khâh na ta.

²² A ryureina zydua ei hmiakô liata y ta, a ryhraopazy cha thy beih tlôh leipa na ta.

²⁴ Chavâta ABEIPA chata ei siana zie hawhta viari na thô ta, ei kuzy a mohmô ta a siapa zie lyma hawhta.

²⁵ Ngiachhie theipa liana cha ngiachhiena a palâsa chi ta; seina hnei leipa ota seina hnei leipa ta na palâsa;

²⁶ a pathaihpa liata pathaihpa ta a palâsa chi ta; chhorupa liata chhorupa ta na palâsa hra.

²⁷ Chyhsa a reisipa cha pachha aw chi ta; mokhaoh apalaipazy deikua cha na panawhsa aw.

²⁸ Nâ ta ei meiôh na pakhaihpa aw chi ta; ABEIPA ei Khazohpa chata ei zohna kyh he a pakhaisa aw.

²⁹ Na baopa ta chariah a zawhnao na ta; ei Khazohpa baopa ta kuh pâhchhô ei zaw pakhô.

³⁰ Khazohpa lâpi he phapaki ta; ABEIPA bietai cha â do tahpa ta pasiapa a châ haw; ano liata ngâna a pahniehpa zydua châta vyhphao a châ.

³¹ ABEIPA dei leipa cha ahy e Khazohpa a y? Eima Khazohpa dei leipa ta ahy e lôpanô a y?

³² Thatlôna ta ei chai nâ saihtuhpa nata ei lâpi thlahpalôhtuhpa Khazohpa cha.

³³ Ano chata ei phei he sasu phei hawhta tao ta, su sâhpazy liata eina paysa.

³⁴ Ei ku he adyuh thaipa ta na pachu ta, chavâta ei bâhzy heta dawh libaw chhao â kei thei.

³⁵ Nâma ta na pachhana vyhphao na pie chi ta, na ku chachâh lâta na cha-ao chi ta, na nôphana ta eina palaisa chi.

³⁶ Ei ry liata ei keih chakâna pakawh chi ta, chavâta ei pheizy cha a hai vei.

³⁷ Ei chariahpazy a chadai na ta. ei pha aw ei; pahleipadia khaipa ta ama y khai hlâ lei cha kua aw va na.

³⁸ Ama thyu thei khao leina awpa ta. ei chhawh pathlah ei; ei phei ry liana cha ama pao.

³⁹ Nâma ta adyuhna châta thatlôna ei chai liata na pasai chi ta; nâ dyuhtuhpazy cha ei ryta na panawhsa haw.

⁴⁰ Nâ haotuhpazy cha ei pahlei theina awpa ta, nâ ta na dyuhtuhpazy cha keima tawhta hnôh lâ na pakuasa ei.

⁴¹ Âmo cha baona hiapa ta awh ei ta. a pachha awpa y veih ei, ABEIPA cha aw ei ta, châhrasala a chhy tlôh va.

⁴² Ziza ta buchadoh a phaohpa hawhta chhei padi khai ei na ta; tlyhmia chiatlao hawhna heta ei thy pathlah khai ei.

⁴³ Nâ ta zawpi amâ tuna tawhta na pachha chi ta; phopizy luhpa châta eina tao chi; ei pahno beih leipa chyhsa to eina chakao ha aw ei.

⁴⁴ Ei bie ama pahno pata nahta ei rei a ngiah aw ei ta; khichhaipazy chata einâ ngiarih ei.

⁴⁵ Khichhaipazy palôh dia ta, ama su a ipa tawhta a chalyuna chôta ama pua aw.

⁴⁶ ABEIPA cha a hroh thlâh haw; ei lôpanô cha reithaipa ta y mawh sy, ei pachhana Khazohpa cha reithaipa ta y mawh sy,

⁴⁷ ei phuh na lapatuhpa nata chyhsa na pahniepatuhpa Khazohpa cha;

⁴⁸ ano chata ei khakhaipazy tawhta na pachha ha ta; nâ ta na thyuhnaotuhpazy chô lâna chata na chalo chi ta; chyhsa nôchhiepazy tawhtapa eina pachha chi.

⁴⁹ He vâna heta hy ABEIPA, phopizy hry liana chata ei cha reithai aw, na moh reithaipa ta ei sa aw.

⁵⁰ Ano chata a beipa hnohna chata pahniena rôhnah ngaitapa pie ta, a sathaw thupa Davi nata a pathlazy ota, chhâzaw ta kyhpachâna a palâsa aw.