Luka 21

¹ Zisu cha mohmia pasaih ta, chysa hneirôhpazy ta thyu pakhyna byh liata ama thyuna pathla haipa hmô ta;

² nôhmei dyhchhiepa ta ahy tlyma phusâ dipa sâno a vaw pathlapa hmô hra ta.

³ Zisu ta, “Hmeiseihta ta, ei cha chho ei chuh, he zydua hlâna heta he nôhmei dyhchhiepa heta a pathla hluh via;

⁴ he zydua heta ama hnei laipa liatahpa thyupakhyna liata ama pathla, ano deikua heta, a kho ngaitapa a pahrona awpa ta a hnei chhôhpa ta a pathla khai haw,” tah ta.

⁵ Chatawhcha ahyzy tlyma Khazohpa achhyna-o kyh, alô pha ngaitapa nata hmo piepa ta ama pangiazie cha ama rei nota, ano chata,

⁶ “He hmozy nama hmôpa he, pacho leipa ta alô a ypa rai he liana heta y aw vei, cha hawhpa noh cha a vaw tlô aw,” tah ta.

⁷ Âmo chata a hnohta, “Pachutuhpa y, chazy cha khatita ma a vaw y aw tly? Chazy cha a vaw tlô chy liata ngiana khâpa a y aw?” tahpa ta hiahri ei ta.

⁸ Zisu ta, ‘Ama cha dô lei nawpa ta a a chado teh u; chyhsa hluhpi ta, ‘Ano cha ei châ!’ ‘A daihti a tlô daihmâ ha na!’ tahpa ta, keima moh reipa ta amâ vy aw. Cha chyhsazy cha zi khah u.

⁹ Adyuhna kyh nata tyhreina kyh nama thei tita, chi khah u; chazy cha a tlô tua awpa raina a châ, chhâna deikua cha thlai tlô mâh aw vei,” tah ta.

¹⁰ Ama hnohta, “Pho hropa nata pho hropa adyuh aw ei ta, râh hropa nata râh hropa adyuh aw ei ta;

¹¹ alosihpa ru ngaitapazy y aw ta, su hluhpi liata chakâhnazy y aw ta, hrizy charei hra aw ta; avâ tawhta hmo chichhihpazy nata ngiana rarôhy ngaitapazy a y aw.

¹² Châhrasala cha zydua tlô hlâna chata cha patu aw ei ta, apakhyna-o liata chyhsazy nata patâhna o liata chyhsazy lâta chhihthapa ta cha taola aw ei ta, keima moh vata abeizy nata hyutuhpazy hmiakô liata a châ chhi aw ei.

¹³ Nama thai châna a châ via pachai aw.

¹⁴ Chatanachata a chhyna awpa pachâ chhielie leipa ta, nama palôhrupa liata a pa-i teh u;

¹⁵ nama khakhaipa zydua ta ama ei thei lei nawpa nata ama châ dyuh thei lei nawpa ta pakah nata sona cha pie tlôh aw ei na ta.

¹⁶ Chatawhcha nama nô nata nama pawzy, nama unawhpazy, nama heinawhzy chhaota ama cha patusa aw ei, thokha cha pathiesa aw ei ta;

¹⁷ keima moh vâta chyhsa zydua a haopa nama châ aw.

¹⁸ Châhrasala nama sâbu sâkha chhao leidia aw vei.

¹⁹ Nama tiamana ta nama hrona nama pabohsa aw.

²⁰ “Châhrasala pheisaih sahlaozy ta Zerusale khih ama padôpa nama hmô tita, leidiana a hnia tahpa pahno teh u.

²¹ Cha tina chata Zudia râh liata a ypazy cha tlâh lâtazy a râ ei se, khihpi chhôh liata a ypazy chata puasai ei se, râh liata a ypazy cha a chhôh liata a ngia khah ei se;

²² cha noh cha phuh lana noh a châ, bie ama ropa zydua a vaw tlô thei nawpa ta.

²³ Cha nohzy liana chata saw a phaohpazy nata hawsaih a pyhpazy chô liana chata ama hu a po aw! Khizaw liana heta rietheina thata a tlô awpa vâ nata he chizy chô liana heta hiehâna a vaw tlô awpa vâta;

²⁴ zaozi ta thie aw ei ta, pho to lâta sei ta chhihthapa ta ama y aw. Zenitaizy noh a ki hlâ lei cha Zerusale khih cha Zenitaizy tly pâpa ta a y aw.

²⁵ “Chatawhcha noh liata zy, thlâpâ liata zy, awhsi liata zy ngiana y aw ta, tilaipi pyu nata a chatlaona vâta alei liata chhao pho to rietheina nata nôpona a tlô aw,

²⁶ chyhsazy rietheina vâta nata khizaw liata hmo a vaw tlô awpa cha pachâna vâta chipa ta ama no a maoh aw; avâ hmotaotheinazy cha a chalyu tlôh aw ta.

²⁷ Cha daihti liana chata Chyhsa Sawchapawpa he hmotaotheina nata rônah ngaitapa ta meihdo hry liata a zupa ama hmô aw.

²⁸ Cha hmo cha a vaw tlôpa ta nahta a chô lâta moh ula, nama chatlaina cha a hnia kawpa vâta,” tah ta.

²⁹ Ama hnohta pakhona bie reih ta, “Theiku kô nata tho zydua moh teh u;

³⁰ a chhy panyupa a thaopa nama hmô nahta nopi a hnia aw tahpa nama pahno tyh.

³¹ Cha hawhna hra chata nâmo chhaota chazy cha a vaw tlôpa nama hmô tita cha, Khazohpa Khihnarâh a hnia haw tahpa pahno teh u.

³² Hmeiseihta ta, ei cha chho ei chuh, hmo zydua a tlô paki hlâ leita cha he chhâ he leidia aw vei.

³³ Alei nata avâ tlao a leidia aw, ei bie deikua cha leidia aw vei.

³⁴ ‘Anodeikuacha a chado teh u, chata leipa ta la rihbie tupa ta nata sahma parina chhaota hro chhôh khihsana pachâna vâta nama palôhrupa pabiepa ta a y pathlei aw na, cha noh liana chata khohei hawhta sôkhata nama chô liata a vaw tlô pathlei aw na;

³⁵ cha hawhna tlai chata alei liata a pahrâpa zydua chô liana chata tlô chyu tlôh aw ta.

³⁶ Cha hmo a vaw tlô awpa zydua cha khôkhâh tlâh awpa nata Chyhsa Sawchapawpa hmiakô liata a duah tlâh awpa ta raopa nama châ thei nawpa ta, khâpa no rai chhaota thlahchhâna chôta riavaih teh u,” tah ta.

³⁷ Noh to Khazohpa achhyna-o liata pachusa tyh ta, zâ tato ta pua ta, Ôli tlâh ama tahpa liana chata a rie tyh ta.

³⁸ My dikarita a bie nahthlie awpa ta chyhsa zydua Khazohpa achhyna-o liata a hnohta amâ vy tyh.;