Zawba 32

¹ He pathôhpa zy heta Zawba cha a chhy khao leipa ei ta, anosasyh ta sia a tah kawpa vâta.

² Châhrasala Buza chyhsa, Rama pathla, Barakel sawchapawpa Elihu cha a pathi-ia ngâsâ ta. Khazohpa hla chhaota ano thai a pachâsapa vâta Zawba chôta a hie a hâh;

³ Zawba viasa pathôh penawh chô liata chhao a hie a hâh hra, Zawba cha thai lei ama pachâ thlâh hana chôta achhyna awpa ama pahno leipa vâta.

⁴ Âmo cha ano hlâta a uhthei viapa ama châpa vâta Elihu cha Zawba hnohta bie reih hra leipa ta hâ thlâh ha ta.

⁵ Elihu cha cha chyhsa pathôh penawh tawhta achhyna rai y khao vei tahpa a pahno nahta a hiehâh ngâsâ kaw ta.

⁶ arakel sawchawpa Elihu, Buza chyhsa chata a chhy ta: “Kei hawtipa châ na ta, nâmo machâpa châ eichi ta; chavâta chi na ta, ei pachâna zie chhao cha chho ngâh veih ei na.

⁷ ‘Noh khih pasihpa ta chho sala, kô hluhpa ta sona tlâ pachu se,’ tah na ta.

⁸ Châhrasala chyhsa liata thlahpa a y, Atotaotheipa so thlupa cha, cha chata pahnona a pahneisa.

⁹ Kô hluhpa he so hlei leipa ei ta, machâpa he siana pahno hlei veih ei.

¹⁰ Chavâta, ‘Na nahthlie ula, ei pachâna zie dua na pareisa hra teh u?

¹¹ “Nahthlie teh u, nama bie hâ thlâh ha na ta. rei awpa nama pathâpazina taih khata, nama biezy nahthlie thlâh ha na ta.

¹² A pha ngaitapa ta cha nahthlie ei na ta, Zawba biereipa zy a ei theipa nama hryta y vei eichi.

¹³ A chado teh u, so ngaitapa eimâ tyh hih, Khazohpa dei leipa ta cha chyhsa ta pahnie theipa châ vei,’ tah la eichi.

¹⁴ A bie ta keima na tah leipa ta, nâmo tah zie hawhta a chhy hra aw va na.

¹⁵ “Achhyna rai ama pahno khao leipa vâta a thlih thlâh haw ei ta, rei awpa rai hnei khao veih ei.

¹⁶ Achhyna awpa rai pahno khao leipa ta amâ duah thlâh haw, reina ama pahno khao leipa cha ei hâ thlâh ha aw ma?

¹⁷ Keima ei pata a chhy aw na ta; ei pachâ zie duah ei reih tua hra aw.

¹⁸ Biereipa a hluhpi hnei na ta, ei palôh liata a chhao ngâ kaw.

¹⁹ Pachâ teh u, ei palôhrupa he kresawti hu puana a hnei leipa hawhta a châ; savo tithei thiehpa hawhta a pa dai hmâ.

²⁰ Tha a dâh theina awpa ta ei rei aw; ei pakah â aw na ta, ei chhy aw.

²¹ Ahy hmia hmahta moh tiarâh aw va na, ahy hmah ta papyupahly hra aw vana.

²² Papyupahly thai tlôh leipa na ta; chata leipa ta la na Taotuhpa ta thlai eina pachhâsa aw na.