1
Cha hmo hnôh lâna chata, Izi beipa kresawti a pietuhpa nata a viahchhâ a taotuhpazy chata, ama zibeipa cha a ru pachhô ei ta.
2
Phirao cha a hyutuhpa pano chô liata, a kresawti a piepa hyutuh chaipa chô liata nata a viahchhâ a taotuhpa hyutuh chaipa chô liana chata a hie hâh ta,
3
chatanachata vaihtuhpa py hyutuhpa o liata atâhna o Zawsi chahrypa ta a yna liana chata patâhsa haw ta.
4
Vaihtuhpa py hyutuhpa chata Zawsi cha âmo pamohkhâsa ta, ano chata âmo chakao ta; chatawhcha noh khazie tlyma, atâh chy ei ta.
5
Chatawhcha atâhna o liata chahrypa ta a ypa Izi beipa kresawti a pietuhpa nata viahchhâ a taotuhpa chata ama pano ta zâ zâ kha ta mâ yzie nanopa sa rairieh ei ta.
6
A mylâ myta Zawsi cha âmo lâta a kei ngia ta, âmo cha kei hmô ta, pachârôh kawpa ta vaw y ei ta.
7
Chatanachata ano chata, “Kheihtazie ta e atanoh pachârôh hmia nama phaoh kaw dia?” tahpa ta Phirao hyutuhpa a zibeipa o liata atâhpazy cha hiahri ta.
8
Âmo chata a hnohta, “Mâ sa pi ta, maniah a chhopasia theipa ahymah y veih ei,” tah ei ta. Zawsi chata ama hnohta, “Mâ chhopaianazy cha Khazohpa ei châ vei mâ? Ngiachhiepa ta na vaw chho tua teh u,” tah ta.
9
Chatanachata kresawti a pietuhpa hyutuh chaipa chata, a mâ cha Zawsi chho ta, a hnohta, “Ei mâ lâna chata ei hmiakô liana heta krezô vaw y ta.
10
Krezô liana chata a chiah miathôh y hra ta, chatawhcha chhy a thaopa hawhta vaw y ta, a pawzy vaw pua ta, a paw saozy chata kre hmôpazy vaw papua ta.
11
Phirao nyu cha ei ku liana heta vaw y ta; chatanachata kretheizy cha lyu na ta. Phirao nyu liana chata saoh na ta, nyu cha Phirao ku liata ei kei pie,” tah ta.
12
Zawsi chata a hnohta, “He he a chhopasiana a châ: a chiah miathôh cha noh thôh a châ,
13
atahmâ tawhta noh thôh liana chata Phirao ta na luh cha chalo aw ta, na raihria cha a cha pahriasa heih aw; a kresawti a pietuhpa na châ nota na yzie tyhpa hawhna khata Phirao nyu cha a ku liata na pie heih aw.
14
Anodeikuacha phana na to heih tita nâ thei thlâh ha la, ngiachhiepa ta ta ngiachhiena ei chô liata palâsa la, Phirao hnohta ei thâtih reih la, he o tawhtapa he na papua mah y.
15
Hebrai sahlao râh tawhtapa chyhsa a ru lâta eina parupa ei châ ta, he râh liana chhao heta atâhna chhôh liata eina khôna awpa taihta, khâpahmah parao va na,” tah ta.
16
Viahchhâ taotuhpa chata, chhopasiana cha a pha tahpa a pahno nata Zawsi hnohna chata, “Kei chhao mâ sa na ta: viahchhâ ngyuhpa kachuh miathôh ta ei luh liata khaih na ta.
17
Chatawhcha kachu a chôchaipa liana chata, Phirao niepa viahchhâ taotuhpa taopa chi to he vaw y ta, chazy cha pavawzy ta ei luh liata kachu ei khaipa tawhtapa cha, vaw nie ngâ kaw ei ta,” tah ta.
18
Chatawhcha Zawsi chata a chhy ta, “He he a chhopasiana a châ: kachu miathôh cha noh thôh a châ;
19
atahmâ tawhta noh thôh liana chata, Phirao ta na pôhpa tawhta na luh chalo aw ta, tho ki liata a cha bangie aw; pavawzy ta na sapa cha ama nie aw,” tah ta.
20
A noh thôh noh Phirao pina â tyhna noh liana chata, ano chata a sei zydua châta kyhchhi tao ta, chatawhcha seizy hry liatahpa kresawti a pietuhpa hyutuh chaipa luh nata viahchhâ taotuhpa hyutuh chaipa luh cha chalo haw ta.
21
Zawsi ta âmo a chhopasiana hawh tlaita, kresawti a pietuhpa hyutuh chaipa cha, kresawti a pietuhpa ta pachâsa heih ta. Chatanachata nyu cha Phirao ku liana chata pie haw ta.
22
Viahchhâ a taotuhpa hyutuh chaipa deikua cha bangie haw ta.
23
Châhrasala kresawti a pietuhpa hyutuh chaipa chata Zawsi cha a thei thlâh ha tiarâh leipa ta, my haw ta.
