Ryhpachaneina 17

¹ Viahchao tôhpa tlyma, mietahkupa tlyma, seina a hneipa nata a pha leina a hneipa chata ABEIPA nama Khazopa lâta namâ theih awpa châ vei, cha cha ABEIPA nama Khazohpa châta hmo pasichhihpa châ tlôh ta."

² Nama hry liata ABEIPA nama Khazohpa ta a cha piepa nama yna, khataih liata rai, chapaw tlyma, chanô tlyma rai biehrai paraopa ta.

³ khazoh hropa chakaopa ta ei bie pie leipa a taopa ama ypa ta,

⁴ ama cha chhopa nata nâma ta na thei nahta; phahnai khoh ngaitapa ta na hiahri nahta â dopa châ ta, bie a sia nahta cha hawhpa hmo pasichhihpa Izarel zy hry liata taopa a vaw châ khiahtala,

⁵ cha hmo moleipa a taotuhpa chapaw tlyma, chanô tlyma cha nama kuh chhikao khôtho lâta chapaw tlyma chanô tlyma tlai cha a chhi aw eichi ta, alô ta nama vawh sao awpa a châ.

⁶ Pahnotuhpa pano tlyma, pathôh tlyma, pakah tawhta a thi awpa cha thie awpa châ ta; pahnotuhpa pakha pakah tawhna chata thie awpa châ vei.

⁷ Thiena awpa liana chata pahnotuhpa zy chata ama ku pathlâ tua aw ei ta, cha tawhna chata zawpi zydua ta. Cha hawhna chata nama hry tawhtapa cha hmo pha leipa cha nama pahlei awpa a châ.

⁸ Thisaih a palona kyh liata zy, sôh nata piah kyh liata zy, atuna kyh liata zy, nama yna liata a khoh na kyh rai liata zy ta, nama châta ryureipa a ru tupa a y khiahtala, ABEIPA nama Khazohpa ta su a rao awpa liana chata sie aw eichi ta,

⁹ cha daihti liata theihthaipa Livai mozy nata ryureituhpazy hnohna chata vawh aw eichi ta, a chhohia aw eichi ta, âmo ta bie pathlânazie a cha chho aw ei.

¹⁰ Chatanachata nâmo ta ABEIPA ta su a rao awpa tawhta bie pathlânazie ama cha chhopa hawhna chata tao aw eichi ta; ama cha pachuna lymâ hawhta a chado ngaitapa ta nama tao aw;

¹¹ bie pathlâna zie ama cha pachupa nata ryureina zie ama cha chhopa lymâ hawhna chata tao aw eichi ta; bie pathlâna zie ama cha chhopa cha chachâh lâ tlyma, chavei lâ tlyma nama tlei sai awpa châ vei.

¹² ABEIPA nama Khazohpa hmiakô liata a chakaotuhpa theihthaipa nata ryureituhpa bie a pyh leipa ta a tao raruahpa maih, cha chyhsa cha thie awpa a châ; Izarel hry tawhtapa cha hmo pha leipa cha nama pahlei awpa a châ.

¹³ Chatanachata chyhsa zydua ta thei aw ei ta, chi aw ei ta, tao raruah khao aw veih ei.

¹⁴ ABEIPA nama Khazohpa ta râh a cha piepa nama kei tlô nata nama pahrâ nahta, nama kei y nahta, ‘Eima chheipâh liata pho zydua hawh hra ta abei hnei ei suh u,’ nama tah tina chata.

¹⁵ ABEIPA nama Khazohpa ta a tlyhpa tlai cha abei ta nama hnei awpa châ ta. Nama unawhpa hry liatahpa pakha nama beipa ta nama tao awpa a châ; pho hropa chyhsa nama unawhpa a châ leipa cha nâmo a vaotuhpa châta nama tao awpa châ vei.

¹⁶ Anodeikuacha arâ hluhpi a hnei awpa châ leipa ta, arâ a hluhpi a hnei thei nawpa ta Izi râh lâta chyhsa zy a tuah awpa châ hra vei. ‘ABEIPA chata atahmâ tawhta cha cha lâna chata nama kua heih awpa châ vei,’ nama hnohta khâchâ tah haw tlôh ta.

¹⁷ A palôhrupa a pavia lei nawpa ta lahpinô chhao a hluhpi a hnei awpa châ leipa ta; tâkâ nata ngôh chhao a hluhpi a hnei awpa châ hra vei.

¹⁸ Chatawhcha a khihnarâh abeidyuchhai liata â tyu tina chata theihthaipa Livai mozy a vao tyhpa ryhpa he châbu liata parosa pachhuah aw ta;

¹⁹ a vao aw ta, a hro chhôhta a reih tyh awpa a châ, he ryhpa zy nata he bieraopa zydua he a pyhpa ta, zyhpa ta, tao awpa ta, ABEIPA a Khazohpa china zie a chupa ta;

²⁰ a palôhrupa a unawhpa zy chô liata a palai leipa ta, chachâh lâ tlyma, chavei lâ tlyma biepiepa cha a tlei sai lei nawpa nata Izarel zy hryta ano nata a pathlazy a khihnarâh liana heta ama hro pasih thei nawpa ta.