Amosa 2

¹ ABEIPA ta he tana heta a tah: “Môaba hmoparaona miathôh vâta nata miapalih vâta a hriena cha padia aw va na; Edôma beipa ruzy cha chinai hawh tlaita a kâpa vâta."

² Chavâta Môaba liata mei tuah aw na ta; Môaba cha tymâna nata awpa nata chiahmie pyu ta thie aw ta;

³ cha hry tawhtapa ryureituhpa cha pahlei aw na ta, a molaipa zydua nata, ano chhaota ei thie aw,” ABEIPA ta a tah.

⁴ ABEIPA chata he tana heta a tah: “Zudah hmoparaona miathôh vâta nata miapalih vâta a hriena cha padia aw va na; ABEIPA ryhpa cha dytha ei ta, a biepiepazy a ngiah leipa ei ta, ama pawzy tao tyhpa ama haipa reipazy khata âmo a chhihthapa vâta.

⁵ Chavâta Zudah chô liata mei tuah aw na ta, Zerusale abei ozy cha a kâ khai aw,” tah ta.

⁶ ABEIPA chata he tana heta a tah: “Izarel paraona miathôh vâta nata miapalih vâta a hriena cha padia aw va na; tâkâri ta chyhsa siapa ama zuapa vâta nata pheiky baokha ta chyhsa sipasapa ama zuapa vâta

⁷ sipasapa luh chô liata doh-lei a sokhohpazy nata nônaipazy lâpi a pahleipazy cha; paw nata saw cha laihsa miakhapa hnohta a ngia ei ta, ei moh pathaihpa papuapalei thei nawpa ta;

⁸ maisâh zydua liata chhie sakhâhna pohzy chô liata azia tyh ei ta; ama Khazohpa o liana chata chyhsa ama pacheisapa kresawti doh tyh ei ta.

⁹ Châhrasala âmo hmiakô liata Amawri mo, sidy tho hawhta a sâhpa nata oaka hawhta a châpa chhao kha pahleipadia na ta; a chôlâ tawhtapa a theipa, nata a rylâ tawhtapa a thari chhao pahlei na ta.

¹⁰ Amawri mo râh hnei awpa ta Izi râh tawhta cha chhihtha ei na ta, râhpathohpa liata kô sypalih chhôhta cha chhihtha ei na ta.

¹¹ Chatawhcha hrohsopa châ awpa ta nama satliapazy hry liatahpa tao na ta, thokha cha Nazarai ta ei tao. Hy Izarel sawzy saih u, cha hawhna chata châ vei ma?” ABEIPA ta a tah.

¹² Châhrasala Nazarai chyhsazy hnohta kresawti do awpa pie eichi ta, hrohsopazy hnohta, ‘Bie chho khah u, ‘tahpa ta bie pie eichi ta.

¹³ Pachâ teh u, sapia ta a biepa talaili tlypa hawhta, nama su liata ei cha vi aw ei.

¹⁴ Chyhsa a râ chahrapazy chahrana lei aw ta, chyhsa thatlôpa ta a tha patlôsa via thei leipa ta y aw ei ta, chyhsa thatlô ngaitapa chhao a paboh thei leipa aw ta;

¹⁵ Libaw a hmâhtuhpa chhao a duah thei hra aw vei, a sie chahrapa chyhsa chhao a duah thei hra aw vei; arâ a kiahpa chhao a paboh thei hra leipa aw ta;

¹⁶ cha noh liana chata chyhsa hmotaothei ngaitapa hry liata chyhsa riahphapa chhao cha chhaichhi leipa ta a râ aw,” ABEIPA ta a tah.