2 Abeizy 5

¹ Suria beipa pheisaih hyutuhpa Naama he ABEIPA ta Suria sahlaozy pachhatuhpa ta a hmâh tyhpa vâta a zibeipa pachâna liata chyhsa zachhih ngaitapa châ ta. Ano cha chyhsa thatlôpa riahphapa châ hra ta; anodeikua cha a phawhpa châ ta.

² Suria sahlaozy cha a hlao a hlao ta hrâ sie ei ta, Izarel râh tawhta chanô hawti chyhpa ta he sei ta a vaw chhi ei ta, ano chata Naama lahpinô chakao tyh ta.

³ Ano chata a zibeinô hnohta, “Ei zibeipa he, Samari liata hrohsopa hmiakô liata vawh sala, ei tah kaw dia! A phawhpa he a vaw patlâh thâh ha awpa tlai,” tah ta.

⁴ Naama cha a kei ngia ta, “Izarel râh liata chanô hawtipa ta khata cha hawhta a tah,” tahpa ta a zibeipa cha chho ta.

⁵ Suria beipa chata, “Vawh teh, Izarel beipa lâta châ ei paphao aw,” tah ta.Chatanachata pua haw ta, tâkâri talent miahrawh nata ngôh tlo sâ charu nata chysia a patly awpa mia hrawh phaoh ta.

⁶ He châ vaw hmô aw chi ta, ei chakaotuhpa Naama he a phawhpa na vaw patlâh awpa ta nâma lâta ei vaw tuah,” tahna châ cha Izarel beipa kei pie ta.

⁷ Izarel beipa ta cha châ cha a reih nata a poh hrie ta, “Chyhsa zy thie thei ta, a pahro heih theituhpa Khazohpa ma châ na ta, he chyhsa heta phawhpa patlâh awpa ta kei lâta a vaw tuah tly? Pachâ ula, a hryu eina pahao tahpa pahno teh u,” tah ta.

⁸ Khazohpa chyhsa Elaisa ta Izarel beipa ta a poh a hrie tahpa a thei nah ta, “Khâpa vâta ma na pohna hrie? Keima lâta a vy sa, chatanachata Izarel râh liana heta hrohsopa a y tahpa a pahno aw,” tahpa ta abeipa lâta chyhsa tuah ta.

⁹ Naama cha a arâ zy chhaota, a talaili zy chhao chata vawh ta, Elaisa o chhikao kiapâh liata a kei duah ta.

¹⁰ Elaisa chata, “Zawdah liata ei sari na ngai a si la, na sapa a ualuapa phaoh heih aw chi ta, na vaw pathaih ha aw,” tahpa chho awpa ta chyhsa tuah ta.

¹¹ Châhrasala Naama cha a hie hâh kaw ta, sie haw ta, “A no tlai cha kei lâta vaw pua aw ta, a vaw duah aw ta, a phawhpa chôta a ku hiepa ta phawhpa a patlâh aw khiah ma, ei tah mâ tâh.

¹² Damaska chavah Abne zy, Phapa zy cha Izarel râh chavah zydua hlâta pha via vei mâ? Chazy liana chata ngai a sipa ta a pathai thei va na mâ?” tah ta. Chatanachata a vaw lie ta, hiehâh ngaitapa ta sie haw ta.

¹³ A chakaotuhpa zy ta a kei hnia ei ta, chho ei ta, “Ei pâ y, hrohsopa khata hmo a khiakhi ngaitapacha pataosa sala, tao aw va chi mâ? ‘Na ngai a kei si la, a kei pathai teh,’ na hnohta a vaw tahpa kha tahna zie awpa châ vei mâ?” tah ei ta.

¹⁴ Chatanachata zu ta, Khazohpa chyhsa a reipa hawhna chata Zawdah liata ei sari a zâ ny ta; a sapa cha hawsaih sapa hawh tlaita vaw châ haw ta, vaw pathaih haw ta.

¹⁶ Châhrasala ano chata, “ABEIPA hrona reipa ta ei reih, khâpahmah la aw va na,” tah ta. La awpa ta reipasao chaimâh ta, châhrasala khoh chachei leipa ta.

¹⁷ Naama chata, “Cha khiahtala, na chakaotuhpa he alâ phao no phao alei na palasa teh; atahmâ tawhta la na chakaotuhpa heta ABEIPA lâta dei leipa ta cha raopa hlâna nata atheihna he khazoh hropa zy lâta hlâ khao cheita aw va na.

¹⁸ He hmo liana heta ABEIPA ta na chakaotuhpa he a ngiahthai mawh sy; ei zibeipa he ei ku a ngâchhâpa ta a naoh awpa ta Rimô o liata ei bôh hrapa kyh liana chata ABEIPA ta na chakaotuhpa he a ngiahthai mawh sy,” tah ta.

¹⁹ Ano chata a hnohta, “Thlahlôh ngaitapa ta sie teh,” tah ta.Ano tawhtapa cha pua ta, kha châ tlyma sie hmâ ta,"

²⁰ Kehazi, Khazohpa chyhsa Elaisa chakaotuhpa chata, “Khei he, ei zibeipa heta Suria chyhsa Naama a hmo a vaw cheipa zy la chachei leipa ta, ngiachhie ta, pasiesa haw ta. ABEIPA hrona reipa ta ei reih, a kei chadai aw na ta, khâpa chhâ tlyma ei kei lapa tua aw,” tah ta.

²¹ Chatanachata Kehazi chata Naama cha a chadai ta. Naama ta ahy tlyma a vaw chadaipa a hmô nahta bie a chho awpa ta talaili tawhtapa chô ta, “Phana lâ kyh bao ma?” tah ta.

²² Ano chata, “Phana lâ kyh na. Ei zibeipa ta, ‘Ephrai tlâh râh tawhta hrohsopa sahlao sawchapawpa zy hry ta satlia pano ta na vaw tly ei ta; âmo cha tâkâri talent miakha nata chysia a patly awpa zo no pie teh,’ tahpa ta eina vaw tuah,” tah ta.

²³ Naama chata, “Talent miano he la teh,” tah ta. Ano chata la awpa ta reipasao chaimâh ta, tâkâri talent miano cha chysia a patly awpa zo no chhaota sykhao zy liata khô ta, a chakaotuhpa pano paphaosa ta, a hmiakô liata siekhei ei ta.

²⁴ Tlâh a kei tlô nahta la ta, o chhôh liata soh ta; cha chyhsa zy cha pasiesa ta, sie haw ei ta.

²⁵ Anodeikuacha a ngia ta, a zibeipa hmiakô liana chata a kei duah ta, Elaisa ta a hnohta, “Kehazi, khataih tawhta nâ vy?” tah ta. Ano chata, “Na chakaotuhpa he khataih lâ hmahta sie va na,” tah ta.

²⁶ Ano chata a hnohta, “Bie cha chho awpa ta a talaili tawhtapa kha chyhsa a zu haipa khata ei palôhrupa na hnohta sie lymâ hra vei mâ?Tâkâ zy, chysia zy, ôli sahdô zy, kresahdô zy, mietahkupa zy, viahchao tôhpa zy, seichapaw nata seichanô zy he a hlapa daihti a châ mâ?"

²⁷ Naama phawhpa khata cha patu aw ta, chhâzaw ta na pathlazy chhao a patu lymâ aw,” tah ta. Kehazi cha ano tawhtapa cha dâhaw hawhta ngyuhpa ta, phawhpa ta pua haw ta.