2 Thatihzy Rona 30

¹ Hezekiah chata Izarel râh nata Zudah râh zydua liata chyhsa tuah ta, Ephrai râh nata Manase râh lâta chhao ABEIPA Izarel zy Khazohpa chata zawpakhô a ô awpa ta Zerusale liata ABEIPA o lâta a vy awpa ta châ paphao hra ta.

² Abei nata a molaipa zy nata Zerusale liata zawpi zydua chata thla nona liata, zawpakhô hnei awpa ta pahrua ei ta.

³ Cha nona chata kyhchhi hnei thei leipa ei ta, theihthaipa a pathaisapa zy ama hluhna zie a dai leipa ta, Zerusale liata zawpi ama hmaohpakhy leipa vâta.

⁴ Ama raona zie cha abei nata zawpi sahlao pachâna zie ta a dopa châ ta.

⁵ Izarel râh zydua Besheba tawhta Dana taihta, ABEIPA Izarel zy Khazohpa chata zawpakhô hnei awpa ta Zerusale lâta a vy awpa ta phuah awpa ta bie pa-i haw ei ta: a yzie ta hawhta a hluhpa chata hmâh beih leipa ei ta.

⁶ Chatanachata cha a siekheituhpa zy cha abei nata a molaipa zy cha chabapa ta, Izarel nata Zudah râh zydua lâta sie awpa ta abei biepiepa hawhta pua ei ta, “Nâmo Izarel pathlazy saih u, Suria abeipa zy ku tawhta puapa ta a laibâhpa zy lâ cha a vaw heih thei nawpa ta ABEIPA Abaraha zy, Aisika zy, Izarel zy Khazohpa lâ cha a vaw heih heih teh u.

⁷ Namo la nama mahpaw zy nata nama unawhpa zy ABEIPA ama mahpaw zy Khazohpa chô liata hmo paraopa ypa ta roryhra awpa ta a pathlua hawpa nama hmôpa zy hawhna chata y hra khah u.

⁸ Nama mahpaw zy hawhta chhorupa ta y kha ula, ABEIPA lâta tlao a ngiarih ula, chhâzaw châta a pathaisapa, a su pathaihpa liana chata a vaw ngia ula, ABEIPA nama Khazohpa cha chakao teh u. Chatanachata a pathi-iana ru ngaitapa cha nâmo tawhta a papai aw.

⁹ ABEIPA lâta nama vaw heih khiahtala nama unawhpa zy nata nama saw zy cha sei ta a patutuhpa zy cha ngiachhie aw ei ta, he râh liana heta amâ vy heih aw: ABEIPA nama Khazohpa cha nôpha ngaitapa nata zawngiah thei ngaitapa châ tlôh ta, ano lâta namâ heih khiahtala châ heisai aw veih ei,” tahpa ta.

¹⁰ Chatanachata cha a siekheituhpa zy cha khi to liata Ephrai nata Manase râh zydua liata Zebulawna taihta sie ei ta, châhrasala âmo chata vaw pahneisao ei ta, vaw mohnao ei ta.

¹¹ Anodeikuacha Asera mo nata Manase mo nata Zebulawna mo hluhpi cha a ngiarih ei ta, Zerusale lâna cha vawh ei ta.

¹² Zudah râh zy cha ABEIPA bie abei nata molaipa sahlao biepiepa cha zyh awpa ta Khazohpa ta palôhrupa miakha paphaosa ta.

¹³ A thla nona liana chata viahchhâ thinô pahlao leipa kyhchhi hnei awpa ta chyhsa hluhpi Zerusale lâna chata a hmaohpakhy ei ta, hluh ngaita ei ta.

¹⁴ Chatawhcha thyu ei ta, Zerusale liata maisâh zy cha la ei ta, rohpahâhpa raona maisâh zy chhao la ei ta, Kidraw chavah liata thy ei ta.

¹⁵ A thla nona noh hrawhleipalih noh liana chata zawpakhô mietahkupa taw cha thie ei ta. Chatawhcha theihthaipa zy nata Livai sahlao cha a zakhei kaw ei ta, chatanachata a pathaisa ei ta, raopa hlâna cha ABEIPA o liata a ngiakhei ei ta.

¹⁶ Khazohpa chyhsa Mawsi ryhpa hawh tlaita âmo su chyu liata aduah ei ta; theihthaipa zy chata Livai mozy tawhta ama lapa thisaih cha hie ei ta.

¹⁷ Zawpi hry liana chata a pathaisa leipa hluh tlôh ei ta; chavâta ABEIPA chata pathai awpa ta a pathaih leipa maih chata Livai mozy chata zawpakhô mietahkupa taw cha thie ei ta.

¹⁸ Ephrai mozy, Manase mozy, Iskara mozy, Zebulawna mozy a hluhpi cha ama pathaisa lei tarawpa ta, ryhpa leipa hawhta zawpakhô kyhchhi cha nie hra ei ta.

¹⁹ Hezekiah ta, “Ahyrai ama pathipalôh ta Khazohpa ABEIPA ama mahpaw zy Khazohpa a tluatuhpa maih: cha su pathaihpa ryhpa hawh tlaita a pathai vei hra sala, ABEIPA zawngiah thei ngaitapa chata angiahthai chyu mawh sy,” tahpa ta thlahchhâpa ta.

²⁰ ABEIPA ta Hezekiah thlahchhâna cha nahthlie ta, zawpi zy cha patlâh haw ta.

²¹ Izarel mo Zerusale liata a ypa zy chata viahchhâ thinô pahlao leipa kyhchhi cha thapha ngaitapa ta noh sari hmâh ei ta; Livai mo nata theihthaipa sahlao chata totâ paro ngaitapa nata ABEIPA palyupalihpa ta hla sapa ta noh chareih ABEIPA reithai ei ta.

²² Hezekiah chata thai ngaitapa ta ABEIPA a ngia ngaitapa ta a reithaituhpa Livai sahlao zy cha ama thlahpalôh ta. Chatanachata ABEIPA ama mahpaw zy Khazohpa lâta reipha cheipa ta adyhna hlâna zy hlâpa ta noh sari chhôh cha kyhchhina ta hmâh ei ta.

²³ Chatawhcha zawpi chata noh sari hropa kyhchhina hnei heih awpa ta pahrua ei ta; chatanachata noh sari hropa thapha ngaitapa ta kyhchhi heih ei ta.

²⁴ Zudah beipa Hezekiah chata zawpi zy cha viahchao tôhpa sâh kha nata mietahkupa sâh sari thie awpa ta pie ta; molaipa sahlao chhaota zawpi zy cha viahchao tôhpa sâh kha nata mietahkupa thy kha pie hra ei ta. Theihthaipa hluhpi a pathaisa ei ta.

²⁵ Zudah zawpi zydua cha theihthaipa zy chhaota Izarel râh tawhta zawpi a vypa zydua nata pho hropa Izarel râh tawhta a vypa, Zudah râh liata a ypa zy cha thapha ngaitapa ta y ei ta.

²⁶ Chatawhcha thaphana rôhnah ngaitapa Zerusale liata y ta: Izarel beipa Davi sawchapawpa Sawlawmaw rakha tawhta cha hawhna rai cha Zerusale liata y beih vei.

²⁷ Chanachata theihthaipa Livai sahlao cha thyu ei ta; zawpi zy cha byhnâ aw pa ei ta, ama ao cha nahthliepa ta y ta, ama thlahchhâna chata a pahrâna avâ cha tlô haw ta.