1 Abeizy 6

¹ Izarel pathlazy Izi râh tawhta ama pua rakha tawhta kô za palih nata sychariena kô, Izarel sahlao zy chô liata Sawlawmaw a beina kô palihna, Ziva thla, thla nona liata ABEIPA o sapa cha pathao ta.

² Abeipa Sawlawmaw ta ABEIPA châta o a sapa cha a doh lâ dy sycharu châ ta, a hâ lâ dy syno châ ta, a sâhna lâ dy sythôh a châ.

³ Cha achhyna-o hmia lâta aika cha a hâ lâ hawhta dy syno a seihpa châ ta, a o hmia lâta pa a doh lâ cha dy hrawh a châ.

⁴ Chatawhcha o chata opy a buahpa ta a vâchapiapa ypa ta tao ta.

⁵ A o pâhchhô a dopa ta, achhyna-o pâhchhô nata achhyna su pâhchhô a dopa ta chhao, cha o pâhchhô pasusapa ta o a chhâh a hneipa sa ta; chatanachata a dopa ta chhôhpadâhpa tao ta.

⁶ A chhâh a hnai chaipa cha a hâ lâ dy pangawh châ ta, a liah liah tahpa cha a hâ lâ dy charu châ ta, a miathôhna cha a hâ lâ dy sari a châ; khâpia zy cha o pâhchhô liata chahrao byuh leipa ta, khôtho lâta o pâhchhô liana chata a hniena tao tlôh ta.

⁷ Chatawhcha o cha ama sa nota alô a chaona su liata daih chiehpa saita sapa a châ, chatanachata ama sa chhôh zydua cha syulô pyu zy, ahrei pyu zy, thua chhaichhi pyu rai zy cha o liana chata theipa châ vei.

⁸ Chhôhpadâhpa liahliah chaipa zy chhikao cha, cha o chachâh lâchhâh ta y ta; a liah liah tahpa liana chata a kiana ta kiah ei ta, a liah liah tahpa tawhna chata a miathôhpa lâta.

⁹ Chatanachata o cha sa ta, palo haw ta; o cha sidy pakô nata a thophia ta khu ta.

¹⁰ A chhâh a hneipa zy cha a o pasusapa ta dy pangawh chyu a sâhpa ta sa ta, chazy cha o nata sidy tho ta pazaopa a châ.

¹¹ ABEIPA bie cha Sawlawmaw hnohta vaw tlô ta,

¹² “He o na sa haipa kyh he, ei bieraopa zy a pyhpa ta, ei ryureina zy a ngiahpa ta, ei biepiepa zydua a ngiah awpa ta nâ pyh khiahtala, na paw Davi hnohta ei rei hawpa ei bie kha na chô liata ei pa-i aw.

¹³ Chatawhcha Izarel pathlazy hry liata pahrâ aw na ta, ei chyhsa Izarel sahlao zy he pathlua aw va na,” tahpa ta.

¹⁴ Chatanachata Sawlawmaw chata o cha sa ta, palo haw ta.

¹⁵ O chhôh lâ pâhchhô cha sidy thophia ta khu ta; siphiah tawhta a chôlô vâphuh taihta a chhôh lâ cha tho bai khai ta; a siphia chata meisa thophia phaw hra ta.

¹⁶ O chhôchâ lâ dy syno cha a siphia tawhta a vâphuh taihta sidy thophia sai ta chhô ta; a chhôh lâ cha supathaihpa su pathaih chaipa châta hmâh ta.

¹⁷ O a chhyna supathaihpa patypa cha a doh lâ dy sypalih a châ.

¹⁸ O chhôh lâta sidy tho liana chata pawpi pabyuhpa nata a paw pakaipa nohthlahpa taopa sai châ ta; a zydua ta sidy tho sai châ ta, alô rai a la vei.

¹⁹ ABEIPA Biehraina Byh sona awpa ta cha o liata a chhôh liata supathaihpa liana chata a su a chhuahnoh ta.

²⁰ Cha supathaihpa chhôh cha a doh lâ dy syno, a hâ lâ dy syno, â sâhna lâ dy syno châ ta; cha cha ngôh suapa ta pahu ta. Sidy maisâh cha pahu hra ta.

²¹ Chatawhcha Sawlawmaw chata cha o chhôh cha ngôh suapa ta pahu ta, supathaihpa hmialâ cha ngôh bâlia zy ta chhô ta.

²² O cha a palohna taihta a pôhpalôhpa ta ngôh ta pahu lymâ ta, supathaihpa liata maisâh chhao cha ngôh ta pahu ta.

²³ Supathaihpa liana chata dy hrawh rairieh a sâhpa ta cherubi sâno ôli tho ta tao ta.

²⁴ Cherubi mathlaw miakha cha dy pangawh châ ta, cherubi mathlaw hiakhalâ cha dy pangawh a châ hra; a mathlaw miakha pawhmao tawhta mathlaw hiakha lâ pawhmao taihta dy hrawh a châ.

²⁵ Cherubi miakha chhao cha dy hrawh châ ta; cherubi zy cha â khopa nata yzie alyu rairiehpa a châ.

²⁶ Cherubi miakha a sâhna lâ cha dy hrawh châ ta, cherubi miakha chhao cha cha sa hra cha a châ.

²⁷ Cherubi zy cha o chhôh chaipa liana chata soh ta; cherubi zy mathlaw cha a pakaipa châ ta, miakha mathlaw chhaota pâhchhô hiakha lâ hria ta, cherubi miakhapa mathlaw chhaota pâhchhô hiakha lâ cha hria hra ta; cha o liahliah liana chata ama mathlaw cha a tyh ta.

²⁸ Chatawhcha cherubi zy cha ngôh ta pahu ta.

²⁹ O pâhchhô zydua cha â dopa ta cherubi zy, thiahra kô nata pawpi pakaipa nohthlahpa zy, angiapâ ta taopa ta, a chhôh lâ nata khôtho lâta tao ta.

³⁰ A o siphiah cha a chhôh lâ nata khôtho lâta ngôh ta pahu ta.

³¹ Supathaihpa a ngiana châta ôli tho ochhi tao ta; chhikao luh chô nata chhikao tôh zy cha a pâhchhô su pangawh ta pachhaih ta su kha tluta a châ.

³² Ôli tho ta ochhi miano tao ta, cha liana chata cherubi zy thiahra kô nata pawpi pakaipa nohthlahpa zy tao ta; chazy cha ngôh ta pahu ta, cherubi zy nata thiahra kô zy cha ngôh ta khu ta.

³³ Chatawhcha achhyna-o a ngiana châta a pâhchhô su palih ta pachhaih ta su kha tluta ôli tho chhikao tôh zy tao hra ta,

³⁴ meisa tho ochhi miano chhaota; ochhi miakha liata thophia miano cha thlâkadi theipa châ ta, ochhi miakhapa liata phia no chhao cha thlâkadi theipa a châ.

³⁵ Chazy liana chata cherubi zy, thiahra kô nata pawpi pakaipa nohthlahpa zy tao ta, cha taopa cha a mih ngaitapa ta ngôh ta pabu ta.

³⁶ Achhyna-o dôhpachhôh tlyhmia chhôh chaipa cha alô daipa chhâh thôh nata sidy tho tlâ chhâh kha ta tao ta.

³⁷ A kô palihna Ziva thlâ liana chata ABEIPA o lôbôpa cha paryhpa châ ta.

³⁸ Chatawhcha kô hrawhleikhana Bula thla, thla chariena liana chata o cha patopatiana zy haw tlai ta, a to cha paloh khaipa châ ta, Kô sari tlai a sa.