Malureina 28

¹ ABEIPA ta Mawsi chho ta.

² “Izarel pathlazy cha bie pie la, ama hnohta, ‘Ei niepa, ei châta rohpahâhpa, mei ta hmohlâpa, ei hnohta hmohlâpa cha a daihti lymâ liata nama hlâ awpa a châ, tah la.

³ Ama hnohta, he he mei ta hmohlâpa ABEIPA lâta nama hlâ awpa cha a châ; mietahkupa taw a chapawpa kô khapa seina hnei leipa, noh tato ta pô no raopa hlana hlâ tyh nawpa ta.

⁴ Mietahkupa taw pô kha cha myta hlâ aw eichi ta, pô kha zâlâ ta hlâ aw eichi ta.

⁵ niepa hiana châta viahdie dipa ephah su hrawh ta pachhaih ta su kha, thaw saopa hin su palih ta pachhaih ta su kha ta pahlaopa chhaota.

⁶ ABEIPA châta mei ta hmohlâpa rohpahâhpa chata Sinai Tlâh liata raopa, raopa hlana hlâ tyh awpa khâ a châ.

⁷ Mietahkupa taw pô kha hlana liata dopa hlana cha hin su palih ta pachhaih ta su kha a châ awpa a châ; ABEIPA châta kresawti dopa hiana cha su pathaihpa liata na patlai awpa a châ.

⁸ Mietahkupa taw pô kha a hropa cha zâlâ ta na hlâ awpa a châ; myta niepa hiana hawhta nahta cha liata dopa hiana hawhna hra chata ABEIPA châta rohpahâhpa mei ta hmohlâpa cha na hlâ awpa a châ.

⁹ “Pahânoh ta mietahkupa taw a chapawpa, kô khapa seina a hnei leipa pô no nata niepa hlana châta viahdie dipa ephah su hrawh ta pachhaih ta su no sathaw ta pahlaopa nata cha liata dopa hlana chhaota na hlâ awpa a châ.

¹⁰ he he pahânoh maihta raopa hlana hlâ tyhpa nata cha liata dopa hlana rei leipa ta, raopa hlana hlâ awpa cha a châ.

¹¹ “Nama thla thiehpa maihta ABEIPA châta raopa hlana nama hlâ awpa a châ: viahchao tôh dawpa pô no nata mietahkupa tôhpa pô kha nata mietahkupa taw a chapawpa kô khapa seina a hnei leipa pô sari.

¹² viahchao tôhpa to liata niepa hlâna châta viahdie dipa sathaw pahlaopa ephah su hrawh ta pachhaih ta su thôh; mietahkupa pô kha liata niepa hlâna viahdie dipa sathaw ta pahlaopa, su hrawh ta pachhaih ta su no;

¹³ mietahkupa taw to liata niepa hlâna ta viahdie dipa sathaw ta pahlaopa su hrawh ta pachhaih ta su kha; he he raopa hlâna rohpahâhpa ABEIPA châta mei ta hmohlâpa a châ.

¹⁴ Ama dopa hlâna cha viahchao tôhpa pô kha liata kresawti hin khophie châ aw ta, mietahkupa tôhpa pô kha liata hin su thôh ta pachhaih ta su kha, mietahkupa taw pô kha liata hin su palih ta pachhaih ta su kha; he he kô kha chhôhta, thla tato ta raopa hlâna a châ.

¹⁵ ABEIPA lâta molei atheihna châta mie tôhpa pô kha nama hlâ awpa a châ; raopa hlâna hlâ tyhpa nata cha liata dopa hlâna rei leipa ta.

¹⁶ “Thla khana noh hrawhleipalih noh cha ABEIPA zawpakhô a châ.

¹⁷ Cha thla noh hrawhleipangawh noh cha kyhchhi noh a châ aw; noh sari cha viahchhâ thinô pahlao leipa nie awpa a châ aw.

¹⁸ Noh kha noh cha pakhypi pathaihpa châ aw ta: khâpa rai rupa hmahta nama hria awpa châ leipa ta.

¹⁹ mei ta hmohlâpa raopa hlâna deikua cha ABEIPA lâta nama hlâ awpa a châ: viahchao tôh dawpa pô no nata mietahkupa tôhpa pô kha nata mietahkupa taw a chapawpa kô khapa pô sari; nama pachâpa ta seina a hnei leipa a châ awpa a châ.

²⁰ viahdie dipa sathaw pahlaopa ama niepa hlâna chhaota; viahchao tôhpa pô kha liata ephah su hrawh ta pachhaih ta su thôh, mietahkupa tôhpa pô kha liata su hrawh ta pachhaih ta su no.

²¹ mietahkupa taw pô sari cha mietahkupa taw pô kha liata su hrawh ta pachhaih ta su kha a châ awpa a châ;

²² Enama châta aryhna tao nawpa ta molei atheihna châta mie tôhpa pô kha.

²³ Hezy he myta raopa hlâna hlâ tyhpa rei leipa ta nama hlâ awpa a châ.

²⁴ He hawhna heta ABEIPA châta rohpahâhpa mei ta hmohlâpa niepa cha noh tato, noh sari, nama hlâ awpa a châ; raopa hlâna hlâ tyhpa nata cha liata dopa hlâna rei leipa ta.

²⁵ A noh sari noh chata pakhypi pathaihpa hnei aw eichi ta; khâpa rai rupa hmahta nama hria awpa châ vei.

²⁶ “Nama noh sari nohzy kyhchhi, nama sa a daih tuapa kyhchhi, ABEIPA châta thei hmia tuapa niepa hlâna nama hlâ no chhaota, pakhypi pathaihpa hnei aw eichi ta, khâpa rai rupa hmahta nama hria awpa châ leipa ta.

²⁷ ABEIPA châta rohpahâhpa raopa hlâna deikua cha nama hlâ awpa a châ: viahchao tôh dawpa pô no, mietahkupa tôhpa pô kha, mietahkupa taw a chapawpa kô khapa pô sari.

²⁸ ama niepa hlâna viahdie dipa sathaw ta pahlaopa, viahchao tôhpa pô kha liata ephah su hrawh ta pachhaih ta su thôh, mietahkupa tôhpa pô kha liata su hrawh ta pachhaih ta su no.

²⁹ mietahkupa taw pô sari, mietahkupa taw pô kha lymâ liata su hrawh ta pachhaih ta su kha.

³⁰ nama châta aryhna tao nawpa ta mie tôhpa pô kha chhaota.

³¹ Nama pachâpa ta seina a hnei leipa a châ awpa a châ, raopa hlâna hlâ tyhpa nata cha liata niepa hlâna nata dopa hlâna rei leipa ta nama hlâ awpa a châ.