Mathai 18

Სწავლა

   

1 Cha nona chata a pachupazy cha Zisu hnohta a vy ei ta, “Vârâh Khihnarâh liata ahy e a rôhnah chai aw tly?” tah ei ta.

2 Zisu ta hawti chyhpa ta aw ta, ama hryta patyusa ta,

3 “Hmeihseihta ta, ei cha tah ei chuh, nama yzie pananopa ta hawti chyhpa ta hawhta nama châ vei khiahtala, vârâh Khihnarâh a ngia chei ta aw veih eichi.

4 Ahy rai he hawti chyhpa ta hawhta a reisipa maih cha chyhsa cha vârâh Khihnarâh liata a rôhnah chai aw.

5 “Ahyrai ei moh vâta, hawti chyhpa ta a lypa maih, keima nâ lypa ama châ;

6 châhrasala ahyrai he na ngiapâtuhpa chyhpa ta zy hry liata pakha chhao a pahluasapa maih cha, ama rao liata charona lô a lai ngaitapa pa-aopa ta, tilaipi athuh ngaitapa liata pathla syulyu ei sala ama châta a pha via aw.

7 “Moleipa ta reipasaonazy vâta khizaw cha a hu pona! Reipasaona cha a y awpa tlai châ ta, châhrasala reipasaona a paysatuhpa hu cha a po na!

8 Na ku tlyma, na phei tlyma a cha pamoleisa khiahta cha, tai la, thy syulyu teh; ku no tlyma, phei no tlyma hnei ta, chhâzaw mei liata thypa hlâta cha, pihpasipa ta tlyma, pheisypa tlyma ta hrona liata a ngia cha na châta a pha via.

9 Chatanacha na mo ta a cha pamoleisa khiahtala, thaoh la, thy syulyu teh; mo no hnei ta hrienasu mei liata thypa hlâta cha, mo kha hnei ta hrona hnei liata a ngia na châta a pha via.

10 “He chyhsa chyhpata zy hryta pakha chhao he mopakhô leipa ta a chado teh u; ama vâlyuhchâpazy ta avâ liata ei Paw avâ liatahpa hmia cha khâ ama hmô tyh tahpa ei cha chho ei hih.

11 Chyhsa Sawchapawpa cha a leidia hawpa pachha awpa ta a zupa a châ.

12 Kheihta e nama pachâ? Chyhsa ahyrai ta mietahkupa za kha hnei sala, ama hryta pô kha lei ha sala, sychaki nata pô chakizy cha tlâh liata siesaipa ta alei hapa cha tlua aw vei ma?

13 Hmeihseihta ta, ei cha chho ei chuh, a hmô heih khiahta cha, sychaki nata pô chaki alei leipa hlâta cha pô kha chô liata tlao a ly via aw.

14 Cha hawhna hra chata he hawti chyhpatazy hry liata pakha leidiapa chhao he nama Paw avâ liatahpa khona zie châ vei.

15 “Na unawhpa ta na chôta hmoparao sala, sie la, ano nata nâma deita pahnopa ta a moleina cha chhorei teh. A cha nahthlie khiahtala, na unawhpa cha na pahniepa a châ ha aw.

16 Châhrasala a cha nahthlie vei khiahta cha, chyhsa hropa pakha tlyma, pano tlyma na hnohta a chhi mah y, bie to rai cha pahnotuhpa pano tlyma, pathôh tlyma pakah liata pa-isapa ta a y thei nawpa ta.

17 Âmo chhao cha a nahthlie khoh vei khiahtala, awnanopa sahlao chho mah y; awnanopa sahlao chhao a nahthlie khoh vei khiahtala, ano cha na châta Zenitai nata chhiekheituhpa hawhta moh mah y.

18 Hmeihseihta ta, ei cha tah ei chuh, alei chô liata khâparai nama pakhâpa maih avâ liata pakhâpa a châ aw, alei chô liata khâparai nama pasaipa maih pasaipa a châ hra aw.

19 Ei cha chho heih ei chuh, alei chô liata chyhsa pano chhaota ama hmo hiapa kyh liata amâ paraoh khiahta cha, ei Paw avâ liatahpa ta a taopa aw ei.

20 Chyhsa pano tlyma, pathôh tlyma ei moh ta amâ pakhyna maih liana chata ama hry liata y tyh tlôh na ta,” tah ta.

21 Cha nona chata a hnohta Pity avy ta, “Abeipa, ei unawhpa ta ei khazie e ei chô liata hmoparao sala ei ngiahthai aw? Ei sari taih ma?” tah ta.

22 Zisu ta a hnohta, “Ei sari taihta cha tah vana, ei sari su sysari taih tlao ei cha tah.

23 “Cha vâna chata vârâh Khihnarâh cha ahy tlyma a seizy hnohta a sôh thâtih pasia a chhuahpa nah chata pakhopa a châ.

24 A pasia pathao na ta, chyhsa pakha talent thy kha a bâhpa a hnohta a vaw chhi ei ta;

25 châhrasala pie awpa hnei leipa ta, a beipa chata a hnohta ano nata a lahpinô nata a saw zydua chhao zuah ta thô awpa ta biepie ta.

26 Sei chata a zibeipa chô liata, ‘Zawh nâ ngiah la, a zydua ta ei pie khai aw,’ tahpa ta a naoh ta.

27 A zibeipa chata sei ngiachhie ngaita ta, sei cha pathlie ta, a bâhpa cha a ngiahthai haw.

28 Cha sei cha sie ta, a sei heih hryta pakha a tâkâ za kha a bâhpa hmô ta, patu ta, “Nâ bâhpa kha na pie teh,’ tahpa ta a rao liata rie ta.

29 A sei heih chata a naohpa ta, ‘Ei chô liata zawh a ngiah la, ei cha pie aw na,’ tahpa ta a haw ta.

30 Châhrasala khoh leipa ta a bâhpa cha a pie khai hlâ lei cha lô-o liata khô ha ta.

31 A sei heihzy chata a hmotaopa ama hmô nahta ama pachârôh ngaita ta, ano hmotaopa zydua cha ama zibeipa kei chho ei ta.

32 A zibeipa chata ano cha aw ta, a hnohta, ‘Sei moleipa! Eina hiapa vâna chi khata nâ bâhpa zydua ei cha ngiahthai;

33 na chôta zawh ei châ ngiahpa hawhna khata, nâ chhaota na sei heihzy chôta zawh nâ ngiah awpa châ vei ma?’ tah ta.

34 A zibeipa cha a hie hâh ta, abâhpa zydua a pie khai hlâ lei cha, patâhtuhpazy hnohta pie ta.

35 Chyhsa tota pathipalôh hmeihseih ta nama unawhpazy namâ ngiahthai vei khiahta cha, ei Paw avâ liatahpa chhaota cha hawhna hra chata a cha tao hra aw ei,” tah ta.;

   
Scroll to see more.