Theihthaina 6

² Ahyrai ta hmo paraopata ABEIPA bie parao haw sala, sôh pavaosana kyh liata tlyma, a vyuhna kyh tlyma, parupa kyh tlyma liata a vaihzy pasaipa-ipa ta tlyma, a vaihzy dô haw sala,

³ cha leipa ta, hmo aleipazy a huatuhpa, dôpakheipa ta, haipa ta chhie sa sala, he hmo zydua a kheihawhpa rai he a parao khiahtala.

⁴ he hawhna heta châ aw ta, molei tlaita, thai lei a châ khiahtala, a hmo parupazy, pasaipa-ipata hmo a lapazy, a hnohta sôh pavaosapazy, hmo a leipa a huapazy.

⁵ haipa ta chhie a sana hmo kheihawhpa rai cha a thô heih awpa a châ, a kipa ta thô khai heih aw ta, su pangawh pachhaih ta su kha cha a hleipa ta a bai aw, thai lei châna noh chata a hneituhpa cha a pie awpa a châ.

⁶ A hmo paraopa hlâna mietahkupa zaw hry liatahpa, a paraona nata â phuhpa, mietahkupa tôhpa seina hnei leipa paraopa hlâna ta ABEIPA châta theihthaipa lâta â vaw chhi awpa a châ.

⁷ theihthaipa ta ABEIPA hmiakô liata aryhna taopa aw ta, angiahthaipa a châ aw; thai lei châna awpa ta hmo a taopa maih kyh lianazy chata,” tahpa ta.

⁸ ABEIPA ta Mawsi chho ta,

⁹ “Arawna nata a sawchapawpazy hnohta, he he raopa hlâpa yzie awpa a châ, raopa hlâpa cha maisâh chô liata a raona liana chata a zozâkhidei ta a mylâ taihta y aw ta, maisâh liata mei cha a ia ngâthlâh ha awpa a châ.

¹⁰ Theihthaipa chata a poh rih dipa chysia a tao aw ta, a sapa khu nawpata a poh rih dipa chaopasypa a pasy aw ta, maisâh liata raopa hlâpa kâna paohzy cha la aw ta, maisâh kâ lâta a soh awpa a châ.

¹¹ Chatawhcha a chysia cha pahluh aw ta, chysia hropa a tao aw ta, a paohpazy cha ariena su khôtho lâ, su pathaihpa lâta a siekhei awpa a châ.

¹² Maisâh chô liata mei cha pa-ia ngâthlâh hapa châ aw ta, a thi awpa châ vei; theihthaipa chata a my chareih tho ti aw ta, raopa hlâpa cha a phapata soh aw ta, cha liana chata adyhna hlâpazy thaw cha a rao awpa a châ.

¹³ Maisâh liata mei ia ngâthlâh ha aw ta, a thi awpa châ vei.

¹⁴ He he niepa hlâna yzie awpa a châ. Arawna sawchapawpazy chata maisâh hmiakô liata, ABEIPA hmiakô liata ama hlâ awpa a châ.

¹⁵ Ano ta pazah kha ta niepa hlâna liatahpa viadie di ngaitapa nata a sathaw nata niepa hlâna chôta deiryh zydua cha la aw ta, cha cha ABEIPA châta rohpahâh ngaitapa myleina châta maisâh liata a rao awpa a châ.

¹⁶ Chatawhcha la bâhpazy cha Arawna nata a sawchapawpazy ta ama nie awpa a châ, cha cha su pathaihpa liata thinô pahlao leipata nie aw ei ta; ahmaohpakhyna poh-o dôhpachhôh liata ama nie awpa a châ.

¹⁷ Thinô pahlaopa ta chho awpa châ vei. Mei ta ei hmohlâpa ama tovyuh châta ei piepa a châ; cha cha moleina hlâna nata paraopa hlâna hmo pathaih ngaitapa a châ.

¹⁸ Arawna pathla chapaw zydua ta ama nie awpa a châ, cha cha ABEIPA châta raopa hlâna kyh liata nama pathlazy taihta chhâzaw ryhpa a châ aw; ahyrai cha a hriapa maih cha pathaihpa ama châ aw, tahpa ta bie pie teh,” tahpa ta.

¹⁹ ABEIPA ta Mawsi chho ta.

²⁰ “Sathaw thupa ta a y noh liata, Arawna nata a sawchapawpazy ta, ABEIPA lâta ama hlâ awpa hmohlâpa cha he he a châ; niepa hlâna ta hlâ tyh awpa viadie di ngaitapa ephah su hrawh pachhaih ta su kha, my ta â khophie, zâ ta â khophie.

²¹ Chhona beih liata sathaw pahlaopa ta tao awpa a châ; a pahlaopa â tly khai nahta vaw la aw chi ta, a tlaw chyhta ta chhoh chiehpa ta niepa hlâna cha ABEIPA châta rohpahâhpa ta na hlâ awpa a châ.

²² A sawchapawpazy hry liatahpa a thlatuhpa sathaw thupa theihthaipa chata hlâ aw ta, chhâzaw ryhpa awpa hawhta; ABEIPA châta rao khai awpa a châ.

²³ Theihthaipa niepa hlâpa maih cha rao khai awpa châ ta; nie chachei ta awpa châ vei,” tahpa ta.

²⁴ ABEIPA ta Mawsi chho ta.

²⁵ “He he moleina hlâna yzie awpa cha a châ. Raopa hlâna thie tyhna liata moleina hlâna chhao cha ABEIPA hmiakô liata thie awpa a châ; cha cha hmo pathaih ngaitapa a châ.

²⁶ Moleina hlâna a hlâtuhpa theihthaipa chata nie aw ta; ahmaohpakhyna poh-o dôhpachhôh liata su pathaihpa liata a nie awpa a châ.

²⁷ Ahyrai châ sala a hriapa maih cha pathaihpa ama châ aw; a thisaih cha khâpa poh liata rai hiepa ta, â pie sala a hniana maih cha su pathaihpa liata na pasu awpa a châ.

²⁸ A chhona alei beih cha pakei awpa châ ta; dawhbeih ta chhopa a châ khiahta deikua cha a siapa ta chatah awpa nata ti ta pasi awpa a châ.

²⁹ Chapaw theihthaipa zydua ta cha ama nie awpa a châ; cha cha hmo pathaih ngaitapa a châ.

³⁰ Moleina hlâna a thisaih su pathaihpa liata aryhna taona awpata ahmaohpakhyna poh-o lâta vaw cheihpa na nie awpa châ vei, mei ta rao awpa a châ.