Athaona 48

¹ Cha hnôh lâna chata Zawsi hnohta, “Na paw tlâh vei,” tah ei ta; chatanachata a sawchapawpazy pano Manase nata Ephrai cha a chhi ta.

² Zakaw hnohta, “Na sawchapawpa Zawsi nâma lâta a vy na,” tahpa ta chho ei ta; Izarel cha a pasosa ta, rakhô liana chata a tyuh ta.

³ Chatawhcha Zakaw ta Zawsi hnohta, “Khazohpa Atotaotheipa cha Kana râh liata Luza khih liana chata ei hnohta a luah ta, byhnâ na aw pa ta,

⁴ ei hnohta, ‘Chi hluhpi cha pathlasa aw na ta, cha papôh hra aw na ta, chi nanopa ypakhypa lâta ei cha tao aw, chatawhcha he râh he, na hnôh lâta na pathlazy hnohna chata chhâzaw ryu châta ei cha pie aw na,’ tah ta.

⁵ Chatawhcha na sawchapaw pano, Izi liata na hnohta ei vy hlâta Izi râh liata na sapazy he kei eih ama châ; Ephrai nata Manase hi, Rubena nata Simeôna haw hra ta keima eih ama châ aw.

⁶ He chyhsazy hnôh lâta saw na hneipazy cha nâ eih ama châ aw; ama ryuto liata cha ama uhtazy moh cha amâ hly aw.

⁷ Chatawhcha keima kyh la, Padanara tawhta ei vy nona khata Rakheli cha Kana râh liata lâpi liata Ephra cha, â hla kaw chy nota, ei kiahpâh liata thi ta; cha Ephra khih lâpi liana chata pabu haw na ta (cha cha Bethlehe a châ)” tah ta.

⁸ Chatawhcha Izarel ta, Zawsi sawchapawpazy cha moh ta, “He he ahyzy maw?” tah ta.

⁹ Zawsi chata a paw hnohta, “Hezy he ei sawchapawpa Khazohpa ta he liata eina piepazy cha ama châ,” tah ta. Ano chata, “Ngiachhiepa ta kei lâta vaw pahnia teh, âmo byhnâ ei aw pa aw na,” tah ta.

¹⁰ Izarel mo cha a pawpipa vâta sia leipa ta, hmô thei vei. Chatawhcha vaw pahnia ei ta; ano chata vaw sy ta, a vaw pyh ta.

¹¹ Izarel ta Zawsi hnohta, “Na hmia hmô he, ei hnabei sei khao leipa ta; châhrasala Khazohpa ta na pathlazy hmia taih chhao eina pahmôsa hih,” tah ta.

¹² Zawsi chata âmp cha a paw pakhuh likawh tawhtapa cha hnei ta, a hmia a bôhpa ta a naoh ta.

¹³ Zawsi ta ama pano ta cha-ao ta Ephrai cha a ku chachâh lâta, Izarel ku chavei lachhah ta cha-ao ta, Manase cha a ku chavei lâta, Izarel ku chachâh lâchhâh ta cha-ao ta, a vaw chhi ta.

¹⁴ Izarel chata a bâh vâchapiah raruah ta, a ku chachâh lâ chata paza ta, Ephrai a seihnai viapa luh chô liata pahnie ta, Manase cha saw tuapa châ tlôh ta.

¹⁵ Zawsi cha byhnâ aw pa ta, “Na pathlatuhpa Abaraha nata Aisika a hmiakô liata ama y tyhna Khazohpa, atanoh taihta ei hroh chhôh zydua liata a pasatuhpa Khazohpa,

¹⁶ moleipa zydua liatahpa na chatlaituhpa vâlyuhchâpa chata hawtizy he byhnâ pie mawh sy; chatawhcha ei moh nata nâ pathlatuhpa Abaraha nata Aisika moh cha, âmo mohta bai mawh sy; chatawhcha khizaw liahlia liata zawpi hluh ngaitapa cha awpa ta vaw pôh mawh sy,” tah ta.

¹⁷ Zawsi cha a paw ta ku chachâh lâ Ephrai luh chôta a pahniehpa cha a hmô nata a palôh châ khao leipa ta; chatanachata a paw ku Ephrai luh tawhtapa cha Manase luh chôta pasie awpa ta chalo ta.

¹⁸ Zawsi ta a paw hnohta, “Ei pâ y, he hawhta châ vei; he he na saw tuapa cha a châ; na ku chachâh lâ he a luh liata tlao pahnieh teh,” tah ta.

¹⁹ Châhrasala a paw chata khoh leipa ta, “Ei pahno na, ei sawchapawpa y, ei pahno na: ano chhao pho ta rei khi ta y hra aw ta, ano chhao a rôhnah hra aw; anodeikuacha a nawhta he ano hlâta rôhnah via aw ta, a pathlazy chhao chi nanopa hluhpi ama châ aw,” tah ta.

²⁰ Chatanachata Zakaw ta cha noh liana chata âmo cha byhnâ aw pa ta,“Izarel sahlao chata, ‘Ephrai nata Manase hawhta Khazohpa ta cha paysa mawh sy,’ tahpa ta, nâma moh reipa ta, byhnâ a cha aw pa tyh aw ei,”tahpa ta, Ephrai cha manase hmia lâta paysa haw ta.

²¹ Izarel chata Zawsi hnohta, “Ei thi daihmâ na, châhrasala Khazohpa cha nama hnohta y aw ta, cha pathlatuhpazy râh lâna chata a cha chhitha heih aw ei.

²² Cha leipa chhao cha na unawhpazy tovyuh hlâta tovyuh miakha a hleipa ta ei cha pie, ei zaozi nata ei libaw Amawna sahlao ku tawhta ei lapa kha,” tah ta.